Yuğ teatrının “Mənəm, mən”i Daşkənd səhnəsində

Daşkənddə keçirilən Azərbaycan Mədəniyyəti Günlərinin zəngin proqramında Azərbaycan teatr sənətinə də yer verilib.

İyunun 12-də Azərbaycan Dövlət Yuğ Teatrının kollektivi Özbəkistan Dövlət Sənət və Mədəniyyət İnstitutunun (ÖDSMİ) səhnəsində “Mənəm, mən” tamaşasını nümayiş etdirib.

Səhnə əsərini ÖDSMİ-nin professor-müəllim heyəti və tələbələri, qardaş ölkənin mədəniyyət, incəsənət xadimləri izləyiblər.

Nümayişdən əvvəl bildirilib ki, Beynəlxalq Muğam Mərkəzinin direktoru Əməkdar artist Sahib Paşazadə ÖDSMİ-nin fəxri professoru adına layiq görülüb. Tarzənə fəxri professor diplomu təqdim olunub.

Sonra tamaşa göstərilib.

Yazıçı-dramaturq İlqar Fəhminin əsəri əsasında 2019-cu ildə, mütəfəkkir şair İmadəddin Nəsiminin (1369–1417) 650 illiyi münasibətilə hazırlanan tamaşaya Əməkdar incəsənət xadimi Mehriban Ələkbərzadə quruluş verib. Tamaşanın rəssamı Vüsal Rəhim, bəstəkarı Xalq artisti Aygün Səmədzadə, plastik həllin müəllifi Ceyhun Dadaşovdur.

Janrı mistik-psixoloji dram kimi təyin edilən tamaşa Azərbaycan Dövlət Yuğ Teatrı və Türk Mədəniyyəti və İrsi Fondunun birgə layihəsi əsasında ərsəyə gətirilib.

Tamaşada Xalq artisti Məmmədsəfa Qasımov, Əməkdar artist Qasım Nağı, aktyorlar Əbdülqəni Əliyev, Ziya Ağa, Amid Qasımov, Vüqar Hacıyev, Elgün Həmidov, Elşən Əsgərov və Famil Quliyev iştirak ediblər.

Səhnə əsərində hürufilik anlayışı elm, eşq, ilahi yazı və övliyalıq kimi tamaşaçıya təqdim olunur. Kollektiv fərqli zaman və məkan anlayışlarını səhnədə cəm etməklə özbək tamaşaçıları Nəsiminin dövrü, eşqi, kədəri, sevinci, həqiqəti, ölümü və ölümsüzlüyü ilə tanış ediblər.

Fariz Yunisli

Daşkənd

Mədəniyyət.- 2024.- 14 iyun,№44.- S.5.