Nazir Samuxda vətəndaşları qəbul edib, mədəniyyət müəssisələrinin fəaliyyəti ilə tanış olub

Azərbaycan Respublikasının Prezidenti İlham Əliyevin tapşırığına əsasən, hər ay mərkəzi icra hakimiyyəti orqanları və digər idarəetmə qurumlarının rəhbərləri tərəfindən şəhər və rayonlarda qəbullar keçirilir, vətəndaşların müxtəlif məsələlərlə bağlı müraciətlərinə baxılır, aidiyyəti üzrə tədbirlər görülür.

Mərkəzi icra hakimiyyəti orqanları rəhbərlərinin qəbul qrafikinə uyğun olaraq, Azərbaycan Respublikasının mədəniyyət naziri Adil Kərimlinin vətəndaşlarla növbəti görüşü iyunun 14-də Samux rayonunda keçirilib.

Qəbuldan öncə nazir və rayonun icra başçısı Firdovsi Əliyev Samux şəhərində Ümummilli lider Heydər Əliyevin abidəsi önünə gül dəstələri qoyaraq əziz xatirəsini ehtiramla yad ediblər.

Samux şəhər Heydər Əliyev Mərkəzində təşkil olunan qəbulda Samux, Goranboy, Göygöl, Daşkəsən rayonlarından, eləcə də Gəncə və Naftalan şəhərlərindən bir qrup vətəndaşın müraciətlərinə baxılıb.

Müraciətlər mədəniyyət sahəsinə dair təklif və təşəbbüslər, işlə təmin olunma və digər məsələlərlə bağlı olub. Həmçinin sahə üzrə bir sıra mövcud problemlər diqqətə çatdırılıb.

Adil Kərimli vətəndaşları dinləyərək hər bir müraciət üzrə məsələlərin operativ şəkildə araşdırılması, qanunvericiliyə uyğun həlli ilə bağlı Mədəniyyət Nazirliyinin məsul nümayəndələrinə tapşırıqlar verib.

Qəbul zamanı şəhid ailələri və qazilər tərəfindən qaldırılan məsələlərə xüsusi diqqət göstərilməsi, vaxtında baxılması məqsədilə müraciətlər qeydiyyata alınaraq nəzarətə götürülüb.

***

Qəbuldan sonra Adil Kərimli Samux rayonunda fəaliyyət göstərən bir sıra mədəniyyət müəssisələrinin fəaliyyəti ilə tanış olub.

Samux şəhər Musiqi məktəbi, Samux rayon Mədəniyyət Mərkəzi, Samux rayon MKS-nin Mərkəzi Kitabxanası və Samux rayonu Sərkar kənd Musiqi məktəbinə baxış keçirilib. Müəssisələrin fəaliyyəti və cari vəziyyəti haqqında məlumat verilib.

Daha sonra Gəncə şəhərinə gələn nazir dahi şair və mütəfəkkir Nizami Gəncəvinin məqbərəsini ziyarət edib. Adil Kərimli Gəncə şəhərində Nizami Muzeyinə də baxış keçirib.

Mədəniyyət ocaqlarında işin günün tələbləri səviyyəsində qurulması ilə bağlı tapşırıq və tövsiyələr verilib.

Mədəniyyət.- 2024.- 21 iyun,№45.- S.4.