Yurdumuza bahar gəlir
Martın 19-da ölkəmizdə Novruzun sonuncu müjdəçisi
olan Torpaq çərşənbəsi qeyd olunur. Artıq
elimizə bahar gəlir, təbiət canlanır. Türk etnik-əxlaqi
dəyərlər sistemində torpaq yurd, vətən, el-oba
anlayışına söykənir və buna görə də
müqəddəs hesab olunur.
İllər öncə yağı zülmündən
yurdundan didərgin düşən soydaşlarımız
artıq Novruzu öz ocaqlarında qarşılayırlar. Sərhədləri
bütövləşən, suverenliyi tam bərpa olunan ölkəmizin
hər yerində bayram tonqalları qalanır. Bölgələrdəki
mədəniyyət müəssisələrində də Novruz
bayramı münasibətilə müxtəlif tədbirlər
keçirilir.
Qazax şəhər 1 nömrəli Uşaq musiqi məktəbi
“Fəsillərin gözəli” adlı konsert proqramını
təqdim edib. Qazax rayon Mədəniyyət Mərkəzində
keçirilən konsertdə mahnılar, rəqslər ifa
olunub, Novruz personajları iştirakçıları təbrik
ediblər. Şagirdlərin hazırladıqları səhnəciklər
maraqla qarşılanıb.
Tovuz rayon Aşıq Əsəd Rzayev adına Uşaq
musiqi məktəbinin təşkilatçılığı
ilə Abulbəyli kənd Folklor evində “Yurdumuza bahar gəlir”
adlı konsert proqramı təqdim edilib. Tədbirdə
Qazax-Tovuz RMİ-nin rəisi Nurəddin Mehdiyev, mədəniyyət
işçiləri və rayon ictimaiyyətinin nümayəndələri
iştirak ediblər. Xalq mahnı və rəqsləri,
müxtəlif alətlərdə ifalar, məktəbin xor
kollektivlərinin çıxışları alqışlarla
qarşılanıb.
***
Qusar Dövlət Ləzgi Dram Teatrı Novruz
bayramı ərəfəsində uşaqlar üçün
yeni tamaşa təqdim edib. Vüqar Haqverdiyevin
“Saçları səməni oğlan” əsəri əsasında
hazırlanan tamaşanın quruluşçu rejissoru
Bağır Əhmədov, rəssamı Bədəl Bədəlov,
musiqi tərtibatçısı Şaiq Qardaşovdur. Qusar Mədəniyyət
sarayında nümayiş olunan tamaşa üçün
Novruz atributları ilə zəngin səhnə dekorasiyası
qurulub.
***
Ağcabədi rayon MKS-nin Mərkəzi Kitabxanası
“Açdı çiçək, gəldi yaz” adlı sərgi-tədbir
təşkil edib. Kitabxana əməkdaşları tədbirdə
iştirak edən məktəblilərə Novruz ənənələri
haqqında məlumat veriblər. Sonra birlikdə müxtəlif
oyunlar oynanılıb, rəqslər ifa edilib.
***
Şirvan şəhər Mədəniyyət Mərkəzinin
Şirvan Folklor evi, həmçinin Şirvan klubu Mərkəzi
Kitabxana ilə birgə konsertlər təşkil ediblər.
“Gur”, “Aysun” rəqs kollektivlərinin üzvləri, Mədəniyyət
Mərkəzinin solistləri, incəsənət ustaları
baharı tərənnüm edən çıxışlarla
tamaşaçıların zövqünü
oxşayıblar.
Biləsuvar şəhər Orxan Əkbərov
adına Uşaq incəsənət məktəbində
“Yurdumuza bahar gəlir” adlı tədbir keçirilib.
RMİ-nin rəisi Şahin Şahbazovun da iştirak etdiyi tədbirdə
Novruza aid adət-ənənələr nümayiş etdirilib.
Rəssamlıq sinfi şagirdlərinin bayrama həsr etdikləri
əl işlərindən ibarət sərgi qonaqlarda xoş təəssüratlar
yaradıb.
***
Qəni Vəliyev adına Lənkəran şəhər
Mədəniyyət Mərkəzində bayram tədbiri
keçirilib. Tədbirdə musiqi nömrələri,
şeirlər, rəqslər təqdim olunub, Novruz səhnəcikləri,
sərgilər nümayiş etdirilib.
Masallı rayon Ərkivan qəsəbə Sənətkarlıq
evi və Əlvan Bağırov adına 4 saylı tam orta məktəbin
birgə təşkilatçılığı ilə Novruz
bayramı münasibətilə tədbir keçirilib.
Çıxışlardan sonra tədbir
iştirakçıları rəqs və idman səhnələrini,
xalq yaradıcılığı nümunələrini izləyiblər.
***
Laçın şəhər 2 nömrəli tam orta məktəbdə
bayram tədbiri keçirilib. Milli geyimli məktəblilər
Keçəl və Kosa obrazlarını canlandırıblar.
Həmçinin açılan bayram süfrəsi şəkərbura,
paxlava, qoğal və digər şirniyyatlarla bəzədilib.
Şagirdlər yumurta döyüşdürüb, oyunlar
oynayıb, rəqslər ediblər.
***
Ağsu Rayon İcra Hakimiyyəti və Dağlıq
Şirvan RMİ-nin dəstəyi, Ağsu rayon mədəniyyət
müəssisələrinin təşkilatçılığı
ilə Novruz bayramı qeyd edilib.
Ağsu şəhər Heydər Əliyev parkında
keçirilən şənlikdə Novruz personajları tədbir
iştirakçılarını salamlayaraq onlara ən xoş
arzularını çatdırıb. Gənc rəsm həvəskarlarının
Novruza aid tabloları, xalqımızın milli musiqi alətləri,
adət-ənənələri, geyimlərinin yer
aldığı sərgilər nümayiş olunub, kəndirbazların,
rayon idmançılarının, nağaraçıların
nümunəvi çıxışları maraqla
qarşılanıb.
***
Mil-Muğan RMİ və Əmək və Əhalinin
Sosial Müdafiəsi Nazirliyinin tabeliyindəki Sosial Xidmətlər
Agentliyinin birgə təşkilatçılığı ilə
“Yaşıl çərşənbə” adlı inklüziv
festival keçirilib.
Sabirabad rayon Mədəniyyət Mərkəzində
Novruz bayramına aid milli adət-ənənələrimizi əks
etdirən nümunələrə, o cümlədən əlilliyi
olan şəxslərin əl işlərinə baxış
keçirilib.
Tədbir “Hophopnamə” kitab mərkəzində davam
edib. Rayon icra başçısının birinci müavini Həsən
Həsənov, Sosial Xidmətlər Agentliyi idarə heyətinin
sədri Vüqar Behbudov, Mil-Muğan RMİ-nin rəisi Faiq
Xudanlı çıxış ediblər. Uşaq incəsənət
və musiqi məktəblərinin şagirdləri, dərnək
üzvləri və şəhid övladlarının
ifasında musiqilər, rəqs nümunələri təqdim
edilib, şeirlər səsləndirilib.
***
Salyan Dövlət Kukla Teatrı Sabirabad rayon Mədəniyyət
Mərkəzində “Bahar sovqatı” adlı tamaşa
nümayiş etdirib. Kosa, Keçəl, Bahar qızı və
başqa Novruz personajlarının iştirakı ilə
nümayiş olunan tamaşa balacaların xüsusi
marağına səbəb olub. Tamaşanın
quruluşçu rejissoru Əməkdar mədəniyyət
işçisi Laləzar Hüseynova, quruluşçu rəssamı
Ceyhun Rüstəmbəyli, rəssamı Gülay Abasova, musiqi
tərtibatçısı Elvin İsayev, rejissor assistenti Aynur
Ağalarovadır.
Mədəniyyət .- 2024.- 19 mart(¹21-22).-S.4.