Musiqi məktəbi
şagirdinin solo konserti
Naxçıvan şəhər Gənclik Mərkəzində
şəhər Ərtoğrul Cavid adına Uşaq musiqi və
bədii sənətkarlıq məktəbinin tar ixtisası
üzrə IV sinif şagirdi Murad Babazadənin solo konserti
keçirilib. Aprelin 27-də gerçəkləşən
konsert Naxçıvan MR-in 100 illiyinə həsr olunub.
Bildirilib ki, məktəbdə Əməkdar mədəniyyət
işçisi Əbülfəz Rzayevdən sənətin sirlərini
öyrənən 14 yaşlı Murad ötən il
Naxçıvan MR-in bədii təhsil müəssisələri
arasında keçirilən baxış müsabiqəsində
I yerə layiq görülüb, həmçinin ölkəmizdə
ilk dəfə keçirilən Uşaq İncəsənət
Festivalında muxtar respublikanı uğurla təmsil edib.
Konsertdə Səid Rüstəmov, Süleyman Ələsgərov,
Qara Qarayev, Tofiq Bakıxanov, Tofiq Quliyev və başqa bəstəkarların
əsərləri səslənib. Bəzi musiqi nömrələrində
tarzən Murad Babazadəni musiqi məktəbinin fortepiano
ixtisası üzrə VI sinif şagirdi Fatimə Hüseynzadə
müşayiət edib. Musiqi axşamının konsertmeysteri
Naxçıvan MR-in Əməkdar müəllimi Nərminə
Qədimova olub.