“Yeni adlar”da növbəti
musiqi axşamı
M.Maqomayev adına Azərbaycan Dövlət Akademik
Filarmoniyasının səhnəsində “Yeni adlar” layihəsi
çərçivəsində görkəmli oftalmoloq-alim,
akademik Zərifə Əliyevanın xatirəsinə həsr
olunmuş növbəti konsert (26 aprel) keçirilib.
Konsertdə dirijor Mustafa Mehmandarovun rəhbərliyi,
Ü.Hacıbəyli adına Azərbaycan Dövlət Simfonik
Orkestrinin (bədii rəhbər və baş dirijor – Əməkdar
artist Fuad İbrahimov) müşayiəti ilə solistlər –
respublika və beynəlxalq müsabiqələr laureatları
Nərminə İsmayılova (piano), Rüstəm Zeynalov
(piano), Zərrin Əliyeva (violin), Humay Hacızadə (viola) və
Aynur Abdullayeva (violin) çıxış ediblər.
Musiqi axşamının tamaşaçıları
arasında Prezident Administrasiyası Humanitar siyasət, diaspor,
multikulturalizm və dini məsələlər şöbəsinin
müdiri Fərəh Əliyeva, tanınmış mədəniyyət
və incəsənət xadimləri də olublar.
Proqramda Kamil Sen-Sansın “Le Carnaval des animaux”
süitası, Maks Bruxun “Viola və orkestr üçün
romans” (F-dur op.85), Moris Ravelin “Qaraçı qızı”
rapsodiyası və Sergey Raxmaninovun “Paqanini mövzusuna
rapsodiya” (a-moll op.43) əsərləri səsləndirilib.