Qlobal mədəni
intibah naminə dialoqun təşviqi
VI Ümumdünya Mədəniyyətlərarası
Dialoq Forumu çərçivəsində mayın 1-də
Bakı Konqres Mərkəzində 5-ci Nazirlər
görüşü təşkil edilib.
“Müxtəliflik harmoniyası: qlobal mədəni
intibah naminə mədəniyyətlərarası dialoqun təşviqi”
mövzusuna həsr olunan görüş Azərbaycan
Respublikasının mədəniyyət naziri Adil Kərimlinin
sədrliyi ilə keçirilib.
Qonaqları salamlayan Adil Kərimli bildirib ki, dünyada
etnik və milli zəmində qarşıdurmaların
yaşandığı bir vaxtda Azərbaycanda müxtəlif
xalqların və dinlərin nümayəndələri dinc
yanaşı, mehriban bir ailə kimi yaşayırlar: “Ölkəmiz
beynəlxalq aləmdə tolerantlığa örnək
göstərilir. Biz öz tarixi-mədəni irsimizlə
yanaşı, tolerantlıq ənənələrimizi də
qoruyub təbliğ edirik”.
Birləşmiş Ərəb Əmirliklərinin mədəniyyət
naziri Şeyx Salem Xalid Abdulla Məhəmməd əl-Qasimi
bildirib ki, Forum əlamətdar bir dövrə təsadüf
edir. Bakı eyni zamanda COP29-a ev sahibliyi etməyə
hazırlaşır: “Ötən il COP28 Dubay şəhərində
keçirildi. Orada da biz nazirlərin konfransını
keçirərək müxtəlif istiqamətlər üzrə
müzakirələr apardıq”.
Belarusun mədəniyyət naziri Anatoli Markeviç
çıxışında deyib: “Belarus çoxmillətli
ölkədir – 130-a yaxın icma yaşayır. Biz abidələrimizin
qorunmasına xüsusi diqqət yetiririk. Qəhrəmanlarımızı
unutmuruq, onları hər zaman xatırladır, gənc nəslə
çatdırırıq”. Ölkəsinin Azərbaycanla mədəni
əməkdaşlığı barədə də
danışan nazir bu ilin 1-4 aprel tarixlərində Bakıda
Belarus Mədəniyyəti Günlərinin uğurla
keçirildiyini vurğulayıb.
Gürcüstan Baş nazirinin müavini, mədəniyyət
və idman naziri Tea Sulukiani söyləyib ki, Cənubi Qafqazda
müxtəlif din və mədəniyyətlərin nümayəndələri
hər zaman yanaşı yaşayıb. Gürcüstan əsrlər
boyu formalaşmış qədim mədəni ənənələrini
və təcrübəsini davam etdirəcək.
Rusiya Federasiyasının mədəniyyət naziri
Olqa Lyubimova müzakirə olunan mövzunun
aktuallığından söz açıb.
Liviyanın mədəniyyət naziri Mabruka Osman deyib
ki, Forumda müzakirəyə çıxarılan mövzular
bəşəriyyətin ciddi ehtiyac duyduğu sülh və əmin-amanlığa
öz töhfəsini verə bilər. Bəşəriyyət
rasional şəkildə fəaliyyət göstərməlidir
ki, bu əsrin çağırışına cavab versin.
İranın mədəniyyət və islami irşad
naziri Məhəmməd Mehdi İsmaili Forumun mədəniyyətlərarası
dialoqun gücləndirilməsinə xidmət etdiyini bildirib:
“Dünya xalqları olaraq sülh şəraitində
yaşamağımız çox vacibdir. Beynəlxalq təşkilatların
əsas rollarından biri də sülh və əmin-amanlığın
qorunmasıdır”.
Daha sonra ölkəmizdə akkreditə olunan səfirlərin
və digər rəsmi şəxslərin mövzu üzrə
məruzələri dinlənilib.