Süleyman Ələsgərovun
100 illiyi münasibətilə konsert
Bakı Şəhər Mədəniyyət Baş
İdarəsinin 1 nömrəli Uşaq incəsənət məktəbində
(16 may) bu təhsil ocağının adını
daşıdığı görkəmli bəstəkar,
dirijor, Xalq artisti Süleyman Ələsgərovun (1924–2000) 100
illiyinə həsr olunmuş sinif konserti keçirilib.
Fortepiano şöbəsinin rəhbəri Mehriban
Əsgərovanın təşkil etdiyi tədbirdə məktəbin
müəllim və şagird heyəti, valideynlər və
musiqiçi qonaqlar iştirak ediblər.
M.Əsgərova Süleyman Ələsgərovun həyat
və yaradıcılığından danışaraq müəllimi
haqqında xatirələrini bölüşüb:
“Süleyman Ələsgərov mənim xatirimdə gözəl
pedaqoq, qayğıkeş müəllim, səmimi insan kimi
qalıb. Onunla vaxtilə bir kafedrada
çalışdığım üçün
özümü xoşbəxt sanıram”.
Daha sonra konsert proqramı təqdim olunub. Şagirdlər
Altay Qədirli, Aysel Zamanova,
Bahar Qasımzadə, Adil Muradov və digərləri
S.Ələsgərovun əsərlərini, eləcə də
başqa bəstəkarların musiqi nümunələrini ifa
ediblər.
Xatırladaq ki, 1 nömrəli Uşaq incəsənət
məktəbi 1979-cu ildə 29 nömrəli Uşaq musiqi məktəbi
kimi fəaliyyətə başlayıb və Azərbaycan SSR Mədəniyyət
Nazirliyinin 1980-ci il tarixli əmrinə əsasən, 1 nömrəli
Uşaq incəsənət məktəbi kimi
formalaşdırılıb. Mədəniyyət Nazirliyinin
müvafiq əmri ilə 2004-cü ildə məktəbə
S.Ələsgərovun adı verilib.