“Gəlsənə, dünyadan bir yerdə köçək”

Şəhid qardaşların şeirinin yer aldığı kitab təqdim olunub

Mingəçevir Turizm Kollecində Vətən müharibəsi şəhidləri Tural və Musa Həsənov qardaşlarının “Gəlsənə, dünyadan bir yerdə köçək” adlı şeir kitabının təqdimatı keçirilib.

Kollecin direktoru Kamal Əhmədov təhsil ocağının məzunları olmuş şəhid qardaşların həyat yolunun gənc nəsillərə bir örnək olduğunu söyləyib.

Mingəçevir Şəhər İcra Hakimiyyətinin nümayəndəsi Seymur Hidayətov Azərbaycanın tarixi Zəfərinin Həsənov qardaşları kimi Vətən oğullarının qəhrəmanlığı sayəsində əldə olunduğunu vurğulayıb. Şəhid qardaşların anası Nəhayət Həsənova vaxtilə övladlarının təhsil aldığı kollecin tələbələrinə xitab edərək onları daima vətənpərvər olmağa səsləyib.

Tədbirdə tələbələrin hazırladığı videoçarx və şəhid qardaşlarına həsr olunmuş qısa film nümayiş etdirilib. Şəhid Musa Həsənovun qızına həsr etdiyi “Rüqəyyam” şeiri kollecin tələbəsi tərəfindən səsləndirilib.

Mədəniyyət .- 2024.- 27 noyabr(№88).- S.4.