Türkiyə Mədəniyyət
Yolu Festivalında üç dayanacaq qaldı
2025-ci ildə festival 20 şəhəri əhatə
edəcək
Altı aydır davam edən Türkiyə Mədəniyyət
Yolu Festivalının 13-cü dayanacağı İstanbul
şəhəridir. Festivalın bu mərhələsi 28
sentyabr – 6 oktyabr tarixlərini əhatə edir.
Atatürk Mədəniyyət Mərkəzində
(AKM) sənət və siyasət dünyasından bir çox
ünlünün iştirakı ilə keçirilən
açılış mərasimində Türkiyənin mədəniyyət
və turizm naziri Mehmet Nuri Ersoy çıxış edib.
Mədəniyyət Yolu Festivalını “mədəniyyət
və sənətlə inteqrasiya olunmuş turizm” vizyonu ilə
həyata keçirdiklərini ifadə edən Ersoy bu çərçivədə
hər sahədə sənətə və sənətçiyə
də dəstək olduqlarını deyib. “Festivalımız mədəniyyət
və tariximizin, sivilizasiya irsimizin və gələcəyə
miras qoymaq üçün istehsal və inşa etdiyimiz
müasir əsərlərin milli və beynəlxalq səviyyədə
nümayiş olunduğu bir səhnədir. Bu səhnədə
Göbeklitəpə (12 min illik tarixi olan arxeoloji abidə –
red.) də var, Atatürk Mədəniyyət Mərkəzi də...
Musiqimiz, qastronomiyamız və rəqəmsal incəsənətimiz
də bu gün festivalımızda öz yerini tapır”, – deyə
nazir vurğulayıb.
İstanbul Mədəniyyət Yolu Festivalı çərçivəsində
9 gün ərzində 110-dan çox məkanda konsertlərdən
sərgilərə, sənət atelyelərində
görüşlərdən seminarlara və zəngin mətbəx
nümunələrinin təqdimatına qədər 500-dən
çox tədbirin keçiriləcəyini deyən Ersoy gələn
il festival arenasının daha geniş olacağını da
diqqətə çatdırıb: “2025-ci ildə Mədəniyyət
Yolu Festivalının marşrutlarına Malatya, Manisa, Mardin və
Kayseri də daxil edilərək 20 şəhərdə
festival həyəcanımız yaşanacaq”.
Xatırladaq ki, Mədəniyyət Yolu
Festivalının bundan öncəki iki dayanacağı Ankara
və Konya olub. Hər iki şəhərdə eyni vaxtda (21–29
sentyabr) keçirilən festivallar konsertlər, teatr
tamaşaları, film nümayişləri, sərgi və sənət
söhbətləri ilə müşayiət olunub.
Ankarada Anadolu Sivilizasiyaları Muzeyində media sənətçisi
Refik Anadolun “Yerin xəyalları: Anadolu” adlı layihəsi ilə
başlayan festival proqramı şəhərin müxtəlif
yerlərində 100-dən çox məkanda gerçəkləşib.
Festivalın Konya mərhələsi isə bu dəfə
də ənənəvi Beynəlxalq Konya Mistik Musiqi
Festivalı ilə üst-üstə düşüb. 21-ci dəfə
keçirilən musiqi festivalına müxtəlif ölkələrdən
sənətçilər qatılıb. Son gün səhnəyə
çıxan bosniyalı sənətçi Damir
İmamoviç tamaşaçılara unudulmaz musiqi ziyafəti
təqdim edib.
Qeyd edək ki, Türkiyənin Mədəniyyət və
Turizm Nazirliyi tərəfindən dördüncü dəfə
təşkil edilən festival bu il 16 şəhəri əhatə
edir. Aprel ayında Adanada start götürən festivalın hər
mərhələsi doqquz gün sürür.
“Mədəniyyət Yolu”nun 2024-cü il proqramında
son üç marşrut qalıb. 12–20 oktyabrda Diyarbəkir, 26
oktyabr – 3 noyabrda İzmir, 2–10 noyabrda isə Antalya festivala ev
sahibliyi edəcək.