Tarixi Zəfərə sənət töhfəsi – “Qarabağnamə” simfonik balladası

Sözləri Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynova, musiqisi Xalq artisti Faiq Sücəddinova məxsus “Qarabağnamə” adlı simfonik ballada ərsəyə gəlib.

Simfonik ballada haqqında məlumat verən akademik Rafael Hüseynov bildirib ki, solist, xor və simfonik orkestrin ifası üçün nəzərdə tutulmuş bu əsər Zəfərimizin növbəti ildönümünə hədiyyə olacaq. Əsər Xalq artisti Yalçın Adıgözəlovun rəhbərlik etdiyi simfonik orkestrin ifasında təqdim olunacaq, solo hissəsini Əməkdar artist Ramil Qasımov ifa edəcək.

Gözəl Qarabağımızın tarixi, başından keçənlər, bu füsunkar məkanın məşhur insanlarının hekayətləri “Qarabağnamə” adı verilmiş silsilə kitablarda əbədiləşib. Mirzə Adıgözəl bəyin, Mirzə Camal Cavanşirin, Mir Mehdi Xəzaninin, Mirzə Yusif Qarabağinin, Rzaqulu bəy Mirzə Camal oğlunun, Mirzə Rəhim Fənanın, Həsən İxfa Əlizadənin, Həsənəli Qaradağinin “Qarabağnamə”ləri bu gün bizə yaxın əsrlər içərisindəki Qarabağımızın yox olmuşlarını aydın görməyə imkan verir. Söz yox ki, yeni Qarabağ, xüsusən də Zəfər yolunu keçmiş Qarabağın tarixi barədə hələ bundan sonra da cild-cild kitablar yazılacaq. “Qarabağnamə” sərlövhəli tarixi əsərlərimiz vardı, indi musiqimizin də öz “Qarabağnamə”si olacaq. Niyyətimiz və istəyimiz “Qarabağnamə” simfonik balladasının Zəfər Günü astanasında səslənməsidir”, – deyə Rafael Hüseynov qeyd edib.

Mədəniyyət .- 2024.- 23 oktyabr(№78).- S.5.