Yerlərdə mədəni həyat

Quba-Xaçmaz Regional Mədəniyyət İdarəsinin (RMİ) təşkilatçılığı ilə Quba rayon MKS-nin Mərkəzi Kitabxanası tərəfindən Əməkdar incəsənət xadimi, yazıçı, jurnalist Əfqanın (Əfqan Əsgərov; 1929–2022) 95 illik yubileyi ilə əlaqədar “Şərəfli yazıçı ömrü” adlı tədbir keçirilib. Çıxışlarda müəllifin yaradıcılığından söz açılıb, “Gülyanaq”, “Katib”, “Həsrətdə bir vüsaldır”, “Qartal əfsanəsi”, “Dədə Bəhmən”, “Məhəbbət ətirli qərənfilim”, “Dünya gözəlliyindir”, “O, daş deyildir” və başqa əsərlərinin oxucular tərəfindən maraqla qarşılandığı vurğulanıb.

***

Quba Tarix-Diyarşünaslıq Muzeyində Birinci Qarabağ müharibəsi şəhidi Bəxtiyar Kərimova həsr olunmuş tədbir təşkil edilib. Çıxış edənlər şəhidin döyüş yolundan danışıb, bu cür tədbirlərin gənc nəslin hərbi vətənpərvərlik ruhunda tərbiyəsində əhəmiyyətini diqqətə çatdırıblar. Bəxtiyar Kərimov haqqında videoçarx nümayiş etdirilib, şəhidə həsr edilmiş sərgiyə baxış olub.

***

Biləsuvar rayonunda “Təmiz Bolqarçay” aksiyası həyata keçirilib. Biləsuvar rayon Heydər Əliyev Mərkəzi və Gənclərin İnkişaf və Karyera Mərkəzinin regional nümayəndəliyinin təşkilatçılığı ilə reallaşan aksiya zamanı Bolqarçay və ətraf ərazilər məişət tullantılarından təmizlənib.

***

Şirvan şəhər Mərkəzi Kitabxanasında yerli yazarlarla görüş olub. Yerli müəlliflərin şəhər sakinlərinə tanıdılması, oxucuların asudə vaxtının səmərəli təşkili məqsədilə keçirilən görüşdə şairlər yaradıcılığı və yeni kitabları haqqında məlumat veriblər. Oxucuların sualları cavablandırılıb.

***

Ağcabədi rayon MKS-nin Mərkəzi Kitabxanasının əməkdaşları “Sülh aylığı” çərçivəsində Ağcabədi şəhər 2 saylı körpələr evi-uşaq bağçasında “Sülhün carçıları – gələcəyimiz olan uşaqlardır” başlıqlı sərgi-tədbir təşkil ediblər. Sonda kitabxana əməkdaşları uşaqlarla birlikdə rəqs ediblər.

***

Masallı rayon Mərkəzi Kitabxanasında 15 sentyabr – Bilik Günü münasibətilə tədbir keçirilib. Çıxışlarda Ulu öndər Heydər Əliyev tərəfindən əsası qoyulan təhsil siyasəti, bu sahəyə diqqət və qayğı, o cümlədən Heydər Əliyev Fondunun həyata keçirdiyi layihələrdən danışılıb.

***

Şabran rayon Heydər Əliyev Mərkəzində Quba-Xaçmaz Regional Gənclər və İdman İdarəsinin Şabran rayonu üzrə gənclər və idman sektoru ilə birgə gənclər arasında “Nə? Harada? Nə zaman?” adlı intellektual oyunu keçirilib. 5 komandanın qatıldığı yarışın sonunda “Termidor” komandası I, “Maqnat” komandası II, “USM-1” komandası isə III yeri qazanıb. Qalib komandalar təltif edilib.

***

Mirzə Fətəli Axundzadə adına Şəki şəhər Mədəniyyət Mərkəzinin tabeliyində fəaliyyət göstərən Narınqala Folklor evi, Vaqif İbrahim adına Folklor evi və Məmməd Sadıq Əliyev adına Diyarşünaslıq klubunun birgə təşkilatçılığı ilə “Tanrının möcüzəsi – ana təbiət” mövzusunda tədbir keçirilib. Tədbirdə ekoloji tarazlığın pozulması, qlobal istiləşmə və yaşıl dünya mövzusunda çıxışlar olub, 2024-cü ilin Azərbaycanda “Yaşıl dünya naminə həmrəylik ili” elan edilməsinin əhəmiyyəti diqqətə çatdırılıb.

***

Şirvan şəhərində “Sülh naminə həmrəy olaq” adlı sərgi təşkil edilib. Şirvan şəhər Heydər Əliyev Mərkəzi və Şirvan Dövlət Rəsm Qalereyasının birgə təşkilatçılığı ilə “Yaşıl dünya naminə həmrəylik ili” və 21 avqust – 21 sentyabr “Sülh aylığı” çərçivəsində keçirilən tədbirdə qalereyanın dərnək üzvlərinin əl işləri nümayiş olunub. Rəsm əsərlərində sülh mədəniyyətinin, sülh və ədalət prinsiplərinin təbliğinə geniş yer ayrılıb.

N.Məmmədli

Mədəniyyət .- 2024.- 18 sentyabr (№69).- S.4.