100 cildlik “Türk ədəbiyyatının inciləri”

Özbəkistandan gətirilən kitabların təqdimatı

Ölkəmizdə keçirilən Özbəkistanın elm və mədəniyyət günləri (23-26 yanvar) çərçivəsində Beynəlxalq Muğam Mərkəzində 100 cildlik “Türk ədəbiyyatının inciləri” seriyasından kitabların təqdimatı olub.

Özbəkistan Prezidenti Şavkat Mirziyoyevin 2019-cu ildə imzaladığı sərəncam əsasında nəşr olunmuş 100 cildliyin 16 cildi Azərbaycan ədəbiyyatını əhatə edir.

Özbəkistan Yazıçılar Birliyinin sədr müavini Qeyrət Məcidin aparıcılığı ilə keçən tədbirdə ilk olaraq bu ölkənin Azərbaycandakı səfiri Bahrom Aşrafxanov çıxış edib. O, Özbəkistanla Azərbaycan arasındakı dostluq münasibətlərindən söz açıb. Qeyd edib ki, son iki il ərzində dövlət rəhbərlərimiz tərəfindən yeddi dəfə qarşılıqlı səfərin gerçəkləşməsi bu münasibətlərin yüksək səviyyəsini göstərir. Bu müddətdə ölkələrimiz arasında mədəni-humanitar sahədə 100-dən çox tədbir, o cümlədən ötən il Azərbaycanda Özbəkistan mədəniyyəti günləri keçirilib. Özbəkistanın elm və mədəniyyət günləri də mühüm layihələrin əsasının qoyulmasına töhfə verəcək.

Özbəkistan Ali Məclisinin Qanunvericilik Palatası sədrinin birinci müavini Akmal Saidov iki qardaş ölkə arasında siyasi və mədəni əlaqələrin inkişafından, gənc nəsil arasında təhsil və mədəni tanıtım baxımından birgə layihələrin əhəmiyyətindən danışıb.

Özbəkistanlı deputatlar İqbal Mirzə, Oydin Abdullayeva, Özbəkistanın Xalq yazıçısı Erkin Azam, Xalq şairi Mahmud Tahir, “Kitab dünyası” qəzetinin baş redaktoru, şair-publisist Xasiyyət Rüstəm, şair Gülbahar Səid, Azərbaycan Yazıçılar Birliyinin sədri Xalq yazıçısı Anar iki ölkə arasında ədəbi əlaqələrdən söz açıblar.

Azərbaycanla Özbəkistan arasında mədəniyyət, ədəbiyyat və təhsil sahəsində əlaqələrin ən yüksək səviyyədə olduğu, bu istiqamətdə hər il çoxsaylı tədbirlər və layihələrin həyata keçirilməsi təqdirəlayiq hal kimi dəyərləndirilib. Diqqətə çatdırılıb ki, 100 cildlik “Türk ədəbiyyatının inciləri” seriyasında XI-XXI əsrlərdə yaşayıb-yaratmış Özbəkistan, Azərbaycan, Türkiyə, Qazaxıstan, Qırğızıstan, Türkmənistan və Macarıstanı əhatə edən 629 şair, yazıçı və mütəfəkkirin (o cümlədən 183 azərbaycanlı müəllifin) əsərləri yer alıb. 100 cildlik toplunun hazırlanmasında 200-dən çox tərcüməçi iştirak edib. Çıxışçılar layihənin bütövlükdə türk respublikalarının ədəbiyyatsevərləri və tədqiqatçıları üçün mühüm hadisə olduğunu vurğulayaraq nəşrin soykökü, dili, dini, mədəniyyəti yaxın olan xalqlarımızı bir-birinə daha da yaxınlaşdıracağını bildiriblər.

Qeyd olunub ki, 100 cildlik Azərbaycan Milli Kitabxanasına hədiyyə ediləcək.

Lalə Azəri

Mədəniyyət .- 2024.- 31 yanvar (№8).- S.3.