Soyqırım rəsmlərdə

Martın 30-da Mədəniyyət və Turizm Nazirliyinin təşkilatçılığı ilə Bədii Sərgi Salonunda rəssam Vaqif Ucatayın (Hüseynovun) ermənilərin azərbaycanlılara qarşı törətdiyi soyqırım faktlarını əks etdirən qrafika əsərlərindən ibarət sərgisi açıldı.

Açılışda çıxış edən mədəniyyət və turizm naziri Əbülfəs Qarayev sərginin keçirilməsini yüksək qiymətləndirdi. «Ermənilər “soyqırım” sözünü əllərində bayraq edərək, dünyaya haray salırlar. Ancaq əsl soyqırım törədən onların özləridir. Ancaq onlar bu faciələri Xocalıda törəndən sonra biz real olaraq başa düşdük ki, əsl genosid, soyqırım anlayışı nə deməkdir və onun müəllifi kimlərdir.

Ermənilərin törətdiyi bu soyqırım bəşəriyyətin ən dəhşətli faciələrindən biridir. Bu gün həm mədəniyyətimiz, həm musiqimiz, həm mətbəximiz erməni təcavüzünə məruz qalır. Sərgidəki rəsmlər Azərbaycanın hüdudlarından kənarda keçirilən tədbirlərdə nümayiş etdirilməlidir. Həmvətənlərimizin başına gətirilən bu soyqırımları unutmaq, bu günləri yad etməmək günah olar. Dövlət başçısı İlham Əliyev hər zaman deyir ki, əgər sülh danışıqları nəticə verməsə, məqsədinə yetməyə qadir olan Azərbaycan ordusu və Azərbaycan xalqı mütləq ərazi bütövlüyünü təmin edəcək. Güman edirəm ki, bu cür faciələr təkrar olunmayacaq. 1918-ci ildə törədilmiş bu faciənin uzun müddət yad edilməməsi Azərbaycanın tam müstəqil olmaması ilə bağlı olub. Bu soyqırım ona görə qeyd olunmurdu ki, bunu bizə unutdurmaq istəyirdilər. Müstəqillik dövründə Xocalı kimi bir faciə yaşayan xalqın ikinci belə bir müsibətin yaşanmasına izn verməsi qeyri-mümkündür”.

Tədbirdə çıxış edən sərgi-müəllifi rəssam Vaqif Ucatay burada nümayiş olunan əsərlərin məhz bu soyqırıma həsr olunduğunu bildirdi: “Vətənimizin bu gündə olması hamımızı narahat edir. Hanı bizim ləyaqətimiz, qeyrətimiz? Bunları yaradan ziyalı olmalıdır.

Bu soyqırım ilə bağlı daha ağır əsərlərin bugünkü sərgidə nümayişi mümkün olmadı. Əslində mən çox istərdim ki, gənc nəsil bu rəsmlərə baxaraq həmin vaxt törədilən soyqırımı gözlərinin önündə canlandırsınlar. Çünki bu tarixi unutmaq özünü unutmaq deməkdir. Azərbaycan xalqı bu boyda faciələri unutmamalıdır”.

Sərgi aprelin 4-dək davam edəcək.

Mədəniyyət. - 2009.- 1 aprel.- S. 2.