"Azərbaycan - dünyam mənim"

Səbail rayonunda orta ümumtəhsil məktəblərində təhsil alan istedadlı şagirdlərin müəyyənləşdirilərək onların hərtərəfli qayğı ilə əhatə olunmasını təmin etmək məqsədilə Bakı şəhəri üzrə Təhsil İdarəsi və Azərbaycan Təhsil İşçiləri Azad Həmkarlar İttifaqı Respublika Komitəsinin birgə qərarı ilə keçirilən "Azərbaycan - dünyam mənim" yaradıcılıq müsabiqəsinə yekun vurulmuşdur. 3 layihə üzrə (ədəbi-bədii, elmi-tədqiqat və kompyuter layihələri) keçirilən "Azərbaycan - dünyam mənim" yaradıcılıq müsabiqəsinə rayondakı bütün orta ümumtəhsil məktəblərində təhsil alan və həmçinin Səbail rayon Uşaq Yaradıcılıq Mərkəzində məşğul olan şagirdlər cəlb olunmuş, 7, 91, 132, 160, 189, 190, 236 və 239 saylı orta məktəblərin və 20 saylı Uşaq Yaradıcılıq Mərkəzinin kollektivləri müsabiqədə daha fəal iştirak etmişlər. Məktəblilərin müsabiqəyə təqdim olunmuş işlərini qiymətləndirən Təşkilat Komitəsi hər bir işi diqqətlə nəzərdən keçirərək rayon mərhələsinin qaliblərini müəyyən etmişdir.

"Azərbaycan - dünyam mənim" yaradıcılıq müsabiqəsinin Səbail rayon mərhələsinin yekunlarına həsr olunmuş tədbir qonaqların və iştirakçıların rayon İcra Hakimiyyətinin iclas zalında mükafata layiq görülmüş işlərdən ibarət sərgi ilə tanışlıqdan başlanmışdır.

Daha sonra tədbiri giriş sözü ilə açan Səbail Rayon İcra Hakimiyyətinin başçısı Sahib Ələkbərov müsabiqənin qaliblərini təbrik edərək ölkəmizdə uşaqlara, onların hərtərəfli inkişafına göstərilən dövlət qayğısı barədə ətraflı məlumat vermişdir. Müsabiqənin rayon mərhələsinin yekunları barədə Təşkilat Komitəsinin məlumatı dinlənilmiş, 9 nominasiya üzrə 116 nəfərin iştirak etdiyi müsabiqənin qalibləri elan olunmuş və müsabiqədə mükafata layiq görülmüş, İnternet saytları və çarxların təqdimatı keçirilmişdir. İnşa yazıları nominasiyası üzrə 239 saylı orta məktəbin şagirdi Badam İslamova, mini elmi-tədqiqat işləri nominasiyası üzrə 132 saylı orta məktəbin şagirdi Elnur Məlikbəyli, müəllif şeirləri nominasiyası üzrə 132 saylı orta məktəbin şagirdi Mehdi Təhmasib, rəsm nominasiyası üzrə 160 saylı Klassik gimnaziyanın şagirdi Heydər Əlibəyli, musiqi nominasiyası üzrə 160 saylı Klassik Gimnaziyanın şagirdi Kamran Sultanlı, dekorativ-tətbiqi sənət nominasiyası üzrə 20 saylı Uşaq Yaradıcılıq Mərkəzinin şagirdi Ümüd Cümşüdov, kompyuter layihələri nominasiyası üzrə 7 saylı orta məktəbin şagirdi Kərəm Quliyev, Veb-saytlar nominasiyası üzrə 189 saylı orta məktəbin şagirdi Emil Mütəllimov və öyrədici layihələr nominasiyası üzrə 7 saylı orta məktəbin şagirdi Könül Əkbərli qalib elan olunmuşlar.

Bakı şəhəri üzrə Təhsil İdarəsi rəisinin müavini Hüseyn Əsgərov paytaxtımızın bütün rayonlarında keçirilən bu müsabiqəyə Səbail rayonunda xüsusi önəm verildiyini vurğulayaraq müsabiqənin gedişindən razı qaldığını bildirmişdir.

Tədbirin sonunda müsabiqə qaliblərinə Səbail Rayon İcra Hakimiyyətinin, Bakı şəhəri üzrə Baş Təhsil İdarəsinin və Təhsil işçiləri Azad Həmkarlar Komitəsinin Fəxri fərmanları, Diplomları və qiymətli hədiyyələr təqdim edilmişdir.

Mədəniyyət.- 2009.- 8 aprel.- S. 3.