Ədəbiyyatımız zəifdir, yoxsa “Ədəbiyyat qəzeti”miz?

Cavabını gənclərdən soruşaq

Son vaxtlar “Ədəbiyyat qəzeti”nin zəif nəşr olunması müxtəlif mətbuat orqanlarında, İnternet saytlarında gündəmə gətirildi. Rəşad Məcidin ilk dəfə bəyan etdiyi açıqlama ədəbi mühitdə maraqlı diskussiyaların yaranmasına səbəb oldu. Çoxları qəzetin yaxşı nəşr olunmasını baş redaktorun dəyişilməsində görür. İnternet saytlarında yazılan şərhlərdən aydın olur ki, oxucuların əksəriyyəti düşünürlər ki, gənc yazarlardan birinin baş redaktor olması problemi asanlıqla həll edər. “Ədəbiyyat qəzeti” ilə bağlı gənc yazarların fikrini bilmək üçün Bakı Slavyan Universitetinin yaradıcılıq fakültəsinin tələbələrinə və Gənc Ədiblər Məktəbi nin üzvülərinə iki sualla müraciət etdik.

1. Bəzi oxucu və yazarlar deyirlər ki, “Ədəbiyyat qəzeti” zəif nəşr olunur. Problemin həllini isə, baş redaktorun dəyişilməsində görürlər, sizcə, bu əvəzləmə qəzetin səviyyəsinin yüksəlməsinə səbəb ola bilərmi?

2. “Ədəbiyyat qəzeti”nin zəif nəşr edilməsini çağdaş ədəbiyyatın zəif olması ilə bağlayanlar da var. Bu tendensiyaların tərəfdarları ilə həmfikirsinizmi?

Ferhat Mete - Gənc Ədiblər Məktəbinin üzvü:

- “Ədəbiyyat qəzeti”ni oxuyan yoxdu. Şəxsən mən yaşıdlarımın arasında kiminsə bu qəzeti oxuduğunu görmürəm. Səbəbsə “Ədəbiyyat qəzeti”ndə maraqlı mətnlərin olmamasıdır.

- Çağdaş ədəbiyyatın zəif olması “Ədəbiyyat qəzeti”nin zəif çıxması üçün tutarlı səbəb deyil. Çünki “525-ci qəzet” və “Mədəniyyət” qəzetlərinin ədəbiyyat səhifələri, “Proloq” qəzeti çox maraqlı nəşr olunur. Çağdaş ədəbiyyat zəifdirsə, bəs digər ədəbi qəzetlər niyə maraqlı alınır? Yaxud İnternet saytlarında maraqlı gənc yazarların maraqlı, oxunaqlı əsərləri var. Sadəcə olaraq “Ədəbiyyat qəzeti”nin çap etdiyi mətnlər maraqsızdı.

Cavad Quliyev - BSU-nun yaradıcılıq fakültəsinin I kurs tələbəsi:

- “Ədəbiyyat qəzeti”ni çoxdandır ki, oxumuram. Çünki “Ədəbiyyat qəzeti”ndə marağıma səbəb olacaq yazılar tapa bilmirəm. Düşünürəm gənclərdən kimsə Ayaz Vəfalının əvəzləsə, çox yaxşı olar.

- Müasir ədəbiyyatımızın durumu ilə “Ədəbiyyat qəzeti”nin yaxşı nəşr edilməməsi arasında yaxından-uzaqdan belə heç bir əlaqə yoxdur. “Ədəbiyyat qəzeti” sadəcə olaraq normal mətnlər cap etmir. Nə vaxt baxırsansa yaşlı nəslin nümatəndələrinin bir səhifəlik yazılarını görürsən.

Əsəd Nəsirli - BSU-nin yaradıcılıq fakültəsinin II kurs tələbəsi:

- Ədəbiyyatımızda çox istedadlı gənclər var. Amma onların çoxunu YB-nin mətbuat orqanları çap etmirlər. Ədəbiyyatımızın vəziyyəti qənaətbəxşdir, ədəbiyyat orqanlarımızınsa yox. “Cəhənnəmə gedən yoldaş axtarar”. “Ədəbiyyat qəzeti”nin zəif nəşr olunmasını ədəbiyyatla bağlamaq istəyirlər.

Ziyad Quluzadə - Gənc Ədiblər Məktəbinin üzvü:

- “Ədəbiyyat qəzeti” həddindən artıq zəif nəşr olunur. Sanki qəzet orta məktəb şagirdlərinin ədəbi orqanıdır. Səbəbsə, baş redaktorun, qəzetin əməkdaşlarının modern ədəbiyyatı qəbul edə bilməməsidir. Nə vaxt qəzetə nəzər salırsansa, tədbirlərdən informasiyalar, təbrik, vəfat edənlərərin yaxınlarına başsağlığı, kitablar haqqında böyük yazılar nəşr olunur. Qəzet çox bezdirici təsir bağışlayır. Abunəçilərdən başqa sıravi oxucu bu qəzeti, demək olar ki, oxumur. Düşünürəm ki, gənc yazarlardan kimsə baş redaktor olsa, qəzetdə canlanma olar, ədəbiyyata yeni qədəm qoyan nasir və şairlərin də mətnlərini çap edərlər. Səlim Babullaoğlu baş redaktor olsa, məncə, qəzet daha yaxşı olar. Eyni zamanda maraqlı tərcümə əsərləri də, çap olunar.

- “Alfa-e.com”, www.oxucu.biz, “Kultaz.az” saytlarına nəzər salsaq, görərik ki, kifayət qədər istedadlı gənc yazarlar var. “Ədəbiyyat qəzeti” sadəcə olaraq zəifdir, ədəbiyyat yox.

Anar Amin - Gənc Ədiblər Məktəbinin üzvü:

- İnternet saytlarında, mətbuatda “Ədəbiyyat qəzeti” ilə bağlı qalmaqallar ədəbiyyatın ziyanınadır. Kimisə vəzifədə başqa birisi ilə əvəzləmək də çözüm deyil. Müəyyənləşdirmək lazımdır ki, qəzet niyə zəif nəşr olunur. Və hansı mətnlərə oxucunun marağı daha çoxdur? Məhz bundan sonra gənc istedadları da cap etməklə oxucu marağını qazanmaq olar. “Ədəbiyyat qəzeti”nin formatını dəyişdirməklə də, oxucunun diqqətini cəlb etmək olar.

- Bu fikirlə razı deyiləm. Ədəbiyyatımızın hazırkı vəziyyəti çox yaxşıdır. “Ulduz” jurnalının aprel nömrəsində gənc yazarlar çap olunacaq. Məhz onda görəcəksiniz ki, ədəbiyyata necə istedadlı yazarlar gəlib. Çox təəssüf ki, belə maraqlı yazıları olan gəncləri “Ədəbiyyat qəzeti” yaxın buraxmır.

Tapdıq Türksoy - Gənc Ədiblər Məktəbinin üzvü:

- İnternetdən, mətbuatdan bu ədəbi qalmaqalla tanışam. Amma qalmaqal hələ çözüm deyil. YB özü qərar çıxarmalıdır ki, qəzetin formatı dəyişilsin, gənclərin əsərləri çap olunsun, bir sözlə, qəzet rəngarəngləşsin. Bu qərar verilməyənə qədər qəzet indiki kimi oxucusuz, maraqsız qalacaq.

- Ədəbiyyat zəifdirsə, başqa ədəbi qəzetlər də zəif olar. Amma maraqlı ədəbi qəzetlər, ədəbi saytlar var. Buna görə də “Ədəbiyyat qəzeti”nin zəif nəşr olunması ilə ədəbi materialların yaxşı-pisliyi arasında əlaqə yoxdur.

Təranə Musayeva - BSU-nun yaradıcılıq fakültəsinin II kurs tələbəsi:

- Məncə, “Ədəbiyyat qəzeti”nin zəif nəşr olunmasının səbəbləri müəyyənləşdirilməli və aradan qaldırılmalıdır. Kadr dəyişikliyi o qədər də əhəmiyyətli deyil. Məsələn, “Ədəbiyyat qəzeti”nin işçisi Azər Turandan savadlı kim gələcək? Məncə, problemlər araşdırılmalıdır.

- “Ədəbiyyat qəzeti” zəif nəşr olunursa, bu, o demək deyil ki, ədəbiyyat zəifdir. Mən gənclərlə daim ünsiyyətdəyəm. Ədəbi mühiti, saytları, mətbuatı izləyirəm. Yazılarını çox bəyəndiyim istər orta yaşlı, istərsə də gənc yazarlar var. Əgər onların əsərlərini çap etsələr, “Ədəbiyyat qəzeti”nin zəif çap olunmasının səbəbi aydınlaşar.

Sorğunu apardı: Fərid

Mədəniyyət.- 2009.- 22 aprel.- S. 12