Yusif Səmədoğlunun doğum günü qeyd olundu

Dekabrın 25-də Səməd Vurğunun ev-muzeyində xalq yazıçısı Yusif Səmədoğlunun doğum günü qeyd edildi. Tədbirin dəvətnaməsində qeyd olunduğu kimi bu, mərhum yazıçının onsuz keçirilən 11-ci doğum günü idi. S.Vurğunun ev-muzeyinin direktoru Aybəniz Vəkilova qonaqları salamladıqdan sonra bildirdi ki, tədbir əslində bir ailə tədbiridir. Ona görə bura yığışan insanlar Yusifin, bizim ailənin ən doğma, ən yaxın adamlarıdır.

Tədbirdə Bəstəkarlar İttifaqının sədri Firəngiz Əlizadə, millət vəkili Elmira Axundova, “Azərbaycan” jurnalının baş redaktoru İntiqam Qasımzadə və başqa tanınmışlarla yanaşı, Y.Səmədoğlunun həyat yoldaşı, qızları, nəvəsi, yaxın qohumları, dostları, eyni zamanda media nümayəndələri iştirak edirdilər.

Tədbiri olduqca maraqlı təşkil edən Aybəniz xanım qısa çıxışları nəzərə almasaq doğum gününü Y.Səmədoğlunun sevdiyi musiqilər və heç zaman unutmadığı xatirələr üzərində qurmuşdu. Xatirələrdə kimlər yox idi; Səməd Vurğun, Süleyman Rüstəm, Qara Qarayev, Səid Rüstəmov, Niyazi, daha kimlər, kimlər...

Tədbir Y.Səmədoğluna həsr olunmuş “Kainatn astanasında” sənədli filminin nümayişi ilə başladı. “Qətl günü” romanından parçalar oxunan filmdə Y.Səmədoğlunun müxtəlif vaxtlarda öz yaradıcılığı, ata ocağı barədə söylədiklərini əks etdirən videomateriallar əks olunmuşdu. Eyni zamanda Anar, Vaqif Səmədoğlu, Yusif müəllimin qızı Mehriban xanım və başqalarının Y.Səmədoğlu barədə xatirələri yer almışdı.

İlk musiqili çıxışı skripkaçı Ceyhun etdi. Çıxışa kiçik bir giriş verən Aybəniz xanım bildirdi ki, Yusif Səmədoğlu 9 il skripka sinfinə gedib. Ən çox sevdiyi mahnılar isə “Sarı gəlin” və “Tut ağacı boyunca” olub. Ceyhun bəy də elə həmin mahnıları xüsusi bir həzinliklə ifa etdi.

İfaların ardınca muzeydə qorunub saxlanan daha bir maraqlı videoyazı təqdim edildi. Bu 90-cı illərin əvvəlində televiziyada populyar olan “Aktual ekran” verilişi idi. Hansı ki, bu verilişdə Yusif Səmədoğlu çıxış edərək o zamankı milli azadlıq hərəkatı barədə maraqlı fikirlər söyləmişdi.

İkinci musiqili qonaq Opera və Balet Teatrının solisti Həsən Ənami idi. O, əvvəlcə Ü.Hacıbəyovun “Sənsiz”ini, ardınca isə Aybəniz xanımın arzusu ilə “Toska” operasından Kavaradassinin ariyasını ifa etdi.

A.Vəkilovanın tədbir iştirakçılarına sürprizlərindən biri də Yusif müəllimin 25 yaşında - 1960-cı ildə dahi bəstəkar Qara Qarayev barədə yazdığı oçerk oldu. Oçerkin bir-neçə maraqlı abzasını tədbir iştirakçılarının diqqətinə çatdırdıqdan sonra bildirdi ki, oçerk bütövlükdə “Ədəbiyyat qəzeti”ndə çap ediləcəkdir.

Tədbir boyu çıxış edən yalnız iki nəfər oldu - Y.Səmədoğlunun yaradıcılığından dissertasiya işi yazan Lətifə Əliyeva və Mədəniyyət İşçiləri Müstəqil Həmkarlar İttifaqının Respublika Komitəsinin sədri Cəmilə Səttarova...

Lətifə xanım Yusif Səmədoğlunu təkcə bir yazıçı deyil, həm də böyük bir ictimai-siyasi xadim kimi dəyərləndirdi və tədqiqat işində ona yaxından yardımçı olanlara təşəkkürünü bildirdi.

C.Səttarova isə qısa çıxışının ardınca təmsil etdiyi qurum adından Y.Səmədoğlunun bir neçə maraqlı fotoşəklini muzeyə hədiyyə etdi.

Tədbir 1995-ci ildə “Gülüstan” sarayında keçirilən Y.Səmədoğlunun 60 illik yubiley tədbirinin videoyazısı ilə başa çatdı. Daha doğrusu, ümummilli lider Heydər Əliyevin də iştirak etdiyi tədbirin ən maraqlı epizodları nümayiş etdirildi.

Əvvəlcə Yusif müəllimin “Şöhrət” ordeni ilə təltif edilməsi ilə bağlı sərəncam oxundu. Sonra ustad aşıq Ədalət Nəsibov “Yanıq Kərəm” havasını ifa etdi.

Ümummilli lider Heydər Əliyevin S.Vurğun, onun ocağı, nəvə-nəticələri, Yusif Səmədoğlunun yaradıcılığı, şəxsiyyəti, eyni zamanda 90-cı illərin ortalarındakı siyasi vəziyyət barədə geniş çıxışı isə həm 60 illik yubileyin videoyazısına, həm də Y.Səmədoğlunun doğum günü mərasiminə yaddaqalan bir yekun oldu.

Şərif.

Mədəniyyət.-2008.-27 dekabr.-S.2.