İslam Konfransı Gənclər Forumunun fəaliyyəti çoxşaxəlidir

Qurumun baş katibi Elşad İsgəndərov: «Azərbaycan gəncləri ölkəmizlə bağlı reallıqları dünya ictimaiyyətinə çatdıra bilirlər»

İslam Konfransı Təşkilatı (İKT) yanında üzv-qurum statusuna malik İslam Konfransı Gənclər Forumu 2004-cü ildə Azərbaycan gənclərinin təşəbbüsü ilə yaradılıb. Eyni zamanda təşkilat 35 İKT ölkəsindən olan gənclər təşkilatlarının iştirakı ilə təsis edilib. Təşkilatın baş katibi Elşad İsgəndərovla Azərbaycan gənclərinin beynəlxalq aləmdə göstərdiyi fəaliyyət, sivilizasiyalararası dialoqda oynadıqları rol, eləcə də gənclərimizin hökumətlərarası beynəlxalq təşkilatlarla əməkdaşlıq sahəsində əldə etdikləri nailiyyətlər barədə söhbət etdik.

- Elşad müəllim, İslam Konfransı Gənclər Forumunun baş katibi kimi Azərbaycan gənclərinin bugünkü fəaliyyəti, onların beynəlxalq təşkilatlarla əməkdaşlığı barədə fikirlərinizi bilmək maraqlı olardı...

- Əvvəlcə qeyd edim ki, bildiyiniz kimi, 2 fevral Gənclər Günü 1996-ci ildə ümummilli liderimiz Heydər Əliyev tərəfindən təsis olunub. Qeyd etmək istərdim ki, gənclər gününun təsis edilməsi təsadüfi xarakter daşımır. Məhz Azərbaycan gənclərinin ölkəmizin ictimai həyatında aktiv rol oynadığını görən və bunu qiymətləndirən ulu öndər belə bir günün təsis edilməsi ilə bağlı fərman verdi.

Bildiyiniz kimi, bu gün artıq Azərbaycanda onlarla gənclər təşkilatı var ki, onlar dünyanın müxtəlif ölkələrindən olan aparıcı gənclər, o cümlədən hökumətlərarası beynəlxalq təşkilatlarla birbaşa əməkdaşlıq edirlər. Bu hal ona görə təqdirəlayiqdir ki, Azərbaycan gəncləri ölkəmizlə bağlı reallıqları, xüsusilə Dağlıq Qarabağ probleminin əsl mahiyyətini dünya ictimaiyyətinə çatdıra bilirlər.

- İslam Konfransı Gənclər Forumu Azərbaycanda, eləcə də ölkəmizdən kənarda kifayət qədər tanınan təşkilatlardandır. Xüsusilə Xocalı soyqırımına hüquqi qiymət verilməsi ilə bağlı təşkilatın son illərdə göstərdiyi fəaliyyətin nəticələri göz qabağındadır. Forumun fəaliyyəti ilə bağlı daha nələri demək olar?

- Bildiyiniz kimi, Rusiya Azərbaycanlı Gənclər Təşkilatlarının sədri və İKGF mədəniyyətələrarası dialoq üzrə koordinatoru Leyla Əliyevanın təşəbbüsü ilə “Qarabağa Azadlıq - Xocalıya Ədalət” kampaniyasına start verilib. Məhz bu kampaniya çərçivəsində Azərbaycan hökumətinin İKGF ilə birgə apardığı fəaliyyət nəticəsində 2008-ci ildə Uqandanın paytaxtı Kampala şəhərində İKT XİN-lərinin 35-ci sessiyası, eyni ildə Seneqalın paytaxtı Dakarda İKT Dövlət Başçılarının Zirvə Görüşündə Xocalı faciəsi kütləvi qırğın kimi qiymətləndirilmiş, o cümlədən keçən il İKT Təhsil Nazirlərinin Bakıda keçirilən sessiyasında qəbul edilən qətnamədə bu faciə ilə bağlı həqiqətlərin İKT ölkələrində ali məktəb dərsliklərinə salınması məsələsi də öz əksini tapmışdır ki, bu İKGF-nin Azərbaycan diplomatiyasına verdiyi töhfə sayıla bilər. Bu kampaniya çərçivəsində yaxın dövrdə silsilə tədbirlərin həyata keçirilməsi planlaşdırılır ki, bu barədə KİV məlumatlandırılacaq.

- Adətən, ili başa vurduqda ötən ilə nəzər salınır, görülən işlər müzakirə olunur. Bu baxımdan, İKGF-nin 2008-ci ildəki fəaliyyətini necə qiymətləndirirsiniz?

- Mübaliğəsiz demək istərdim ki, 2004-cü ildə təsis olunmuş İKGF həmin dövrdən etibarən bu günə qədər bir çox işlər görüb. Təbii ki, bu barədə çox danışmaq olar. Qeyd etmək istərdim ki, bizim forumun əsas fəaliyyət istiqamətlərindən biri də son illər ərzində, xüsusilə Qərb ölkələrində yayılan islamafobiya hallarına qarşı mübarizə aparmaqdır. Keçən il İKGF Avropa Şurası, İSESKO, Azərbaycan Respublikası Gənclər və İdman Nazirliyi ilə birgə “İslamafobiyaya qarşı mübarizədə gənclərin fəaliyyəti” mövzusunda 4 günlük təlim və beynəlxalq konfrans keçirdi. Avropa və İKT ölkələrindən olan 100-ə yaxın gənc liderin iştirak etdiyi bu cür tədbirin Bakıda keçirilməsi də uğur sayıla bilər. Ümumiyyətlə, biz davamlı əsaslarda islamafobiyaya qarşı mübarizədə istər İKT, İSESKO, istərsə də Avropa məkanında yerləşən aparıcı beynəlxalq təşkilatlarla sıx əməkdaşlıq edirik.

- Məlum olduğu kimi, İKGF BMT-nin irəli sürdüyü “Sivilizasiyaların İttifaqı” prosesinin mühüm iştirakçılarındandır. Bu sahədə forumun fəaliyyəti haqqında nə deyərdiniz?

- 2007-ci ilin payızında Bakı şəhərində İKGF-nin Heydər Əliyev Fondu, İSESKO, AŞ və Avropa Gənclər Forumu ilə birgə keçirilən beynəlxalq konfransda “Gənclər Sivilizasiyaların İttifaqı Uğrunda” hərəkatını təsis etdikdən sonra bizim təşkilat faktiki olaraq gənclərin bu prosesin institutlaşması istiqamətində mühüm addım atmış oldu. Həmin dövrdən etibarən, biz BMT Sivilizasiyaların İttifaqı Uğrunda illik forumlarında iştirak edirik. Hazırda biz bu ilin aprel ayında İstanbulda keçiriləcək növbəti forumun işində yuxarıda adıçəkilən hərəkatın fəaliyyəti və gələcək planları ilə bağlı məruzə ilə çıxış etməyə və bu prosesin daha da effektiv olması ilə bağlı təkliflərlə çıxış etməyə hazırlaşırıq.

- Bu il hansı tədbirləri keçirməyi planlaşdırırsınız?

- Yuxarıda qeyd etdiyim kimi, forum bu ildən etibarən “Qarabağa Azadlıq - Xocalıya Ədalət” beynəlxalq kampaniyasını həyata keçirmək niyyətindədir. Bu istiqamətdə biz hazırda ölkəmizin bir sıra xarici ölkələrdə akkreditə olunmuş səfirlikləri ilə əməkdaşlıq etməkdəyik. Qısaca olaraq onu deyim ki, kampaniya çərçivəsində dünyanın müxtəlif ölkələrində Xocalı faciəsi ilə bağlı həqiqətlərin gənclər vasitəsi ilə dünya ictimaiyyətinə çatdırılması, son nəticə olaraq bu faciəyə aparıcı beynəlxalq təşkilatlar tərəfindən müvafiq siyasi qiymət verilməsi nəzərdə tutulur. Biz təbii ki, Azərbaycan gənclərini də unutmuruq. Fevral ayından başlayaraq, Azərbaycanın savadlı gəncləri üçün 6 aylıq effektiv liderlik kurslarının keçirilməsi planlaşdırılır. Məlumat üçün bildirim ki, bu kursun əsas məqsədi azərbaycanlı gənclərin ümumi nəzəri biliklərini artırmaq, onları dünyanın müasir ideoloji-siyasi nəzəriyyələri ilə tanış etmək, ölkənin milli maraqlarına zidd olan missionerliyə və sektaçılığa qarşı mübarizə üsullarına öyrətmək, İslam dini ilə bağlı önəmli və müasir aktual problemlərin açıqlanması, o cümlədən gənclərdə praktik keyfiyyətlərin (Media-PR işi, təşkilatçılıq, nitq qabiliyyəti və s.) aşılanmasıdır. Artıq forum tərəfindən müsabiqə yolu ilə bu kursda iştirak etmək üçün Azərbaycanın müxtəlif universitetlərində təhsil alan savadlı gənclər seçiliblər. Öncə qeyd etdiyim kimi, biz bu il “Gənclər Sivilizasiyaların İttifaqı Uğrunda” prosesini də davam etdirmək niyyətindəyik. Həmçinin, bildiyiniz kimi, 2009-cu il Bakı İslam Mədəniyyəti Paytaxtı elan edilib. Bu istiqamətdə də İKGF istər Azərbaycan hökuməti, istərsə də beynəlxalq təşkilatlarla birgə tədbirlər həyata keçirmək niyyətindədir. Qeyd etmək istərdim ki, respublikamızın prezidenti İlham Əliyev 2006-cı ildə forumun İstanbuldakı qərargahının açılışında Türkiyə Cümhuriyyətinin baş naziri Rəcəb Tayyib Ərdoğanla bərabər iştirak edib və hər zaman fəaliyyətlərimizə dəstək olub, diqqətini əsirgəməyib. Gənclərə qayğının bir təzahürü olaraq bizə daim diqqət göstərdiyi üçün fürsətdən istifadə edib dövlətimizin başçısına forum adından təşəkkürümü bildiririk.

ZÜMRÜD

Mədəniyyət.- 2009.- 7 fevral.- S.4.