Kürdəmirdə saz-söz gecəsi

Abduləziz Xanəhmədoğlu saz-söz sənəti ilə məşğul olan bir ailədə dünyaya gəlmişdir. Atasının sazından çıxan şirin musiqini dinləyə-dinləyə və bəzən də atasının arabir yazdığı kiçik şeirləri eşidə-eşidə böyüyən Abduləzizin qəlbi - ürəyi bu gözəl sazın bir də şeriyyətin üzərində köklənir. “Sənsiz günlərim”, “Ömrün nəğmə payı”, “Söz ürəyə toxunanda”, “Müəllim ömrü”, “Bir günəş parladı, “Gecikmiş etiraf”, “Ömürdə qalan izlər” və sair kitabları ilə Abduləziz Xanəhmədoğlu yaradıcılığı rəngarəngliyi, öz çoxşaxəliliyi, öz dəyəri ilə böyük oxucu auditoriyası qazanmışdır. Onun şeirlərində sevgi var, duyğu var, sabaha böyük inam, ümid var, insana, vətənə torpağa bağlılıq, qəhrəmanlıq var. Ümumiyyətlə onun yaradıcılığı insanı ruhlandırır, ümidli sabaha çağırır.

Abduləziz Xanəhmədoğlu nəğməkar şairdir. Bir çox bəstəkarlarımız onun yaradıcılığına müraciət etmiş, sözlərinə mahnılar yazmışlar.

10 kitab müəllifi Abduləziz Xanəhmədoğlu Kürdəmir rayon Carlı kəndində müəllim işləyir. Öz işinə böyük ürəklə bağlı olan müəllim “Müəllim ömrü” kitabında rayonumuzun tanınmış müəllimlərinin həyat və fəaliyyəti haqqında ətraflı məlumatlar vermişdir.

2009 - cu il Abduləziz müəllim üçün xüsusilə əlamətdar olmuşdur. Belə ki, o “Bir günəş parladı” kitabına görə “Qızıl qələm” mükafatına layiq görülüb.

Bu münasibətlə Kürdəmir Rayon Mərkəzləşdirilmiş Kitabxana Sistemi binasında Abduləziz Xanəhmədoğlu ilə görüş keçirilib. Tədbirdə Kürdəmir Rayon İcra Hakimiyyəti əməkdaşları və rayon ictimaiyyətinin nümayəndələri iştirak ediblər.

Əliyeva Məryəm.

Mədəniyyət.- 2009.- 11 fevral.- S. 13.