Vətənpərvər ifaçı

Şəmistan Əlizamanlı 20 ildən çoxdur ki, öz vətənpərvər mahnıları ilə milyonların sevimlisinə çevrilib. Vətənə, millətə sevgisini mahnılarında əks etdirən sənətçi özü də vaxtilə Qarabağ müharibəsinin iştirakçısı olub.

Bugünlərdə Şəmistan Əlizamanlının 50 illik yubileyini qeyd etmək üçün onun sənətinin vurğunları, dostları və yaxınları bir oraya toplanıblar. Tədbiri giriş sözü ilə açan professor Nizaməddin Şəmsizadə ifaçının yaradıcılığı haqqında məlumat verib. Bu dəfə də müğənni pərəstişkarlarının qarşısına yeni disklə - «Yol ver türkün bayrağına» mahnısının klipi ilə çıxıb.

Müəllif deyib ki, ilk dəfə bu mahnını orijinalda olduğu kimi - Əhməd Cavad necə yazıbsa, Üzeyir bəy necə bəstələyibsə, o cür də təqdim etdik, yəni mahnıya heç nə əlavə edilməyib.

Sonra vətənpərvər ifaçını mahnılarının sədaları altında balaca uşaqlar rəqs etdilər.

Anadolu liseyində Türkiyə səfirliyinin və Azərbaycan diasporunun birgə səyi ilə ərsəyə gələn yubiley mərasiminə toplaşanlar, xalq şairləri Söhrab Tahir, Musa Yaqub, millət vəkili Gülər Əhmədova, Prezident Aparatının bölmə müdiri Qafar Əliyev və başqaları Ş.Əlizamanlı haqqında öz ürək sözlərini söyləyiblər. Tədbirin sonunda yubilyar qonaqlara öz təşəkkürünü bildirib və bundan sonra da öz vətənpərvər mahnıları ilə vətənin keşiyini çəkən əsgərlər qarşısında çıxış edəcəyinə və onlarda yüksək əhval-ruhiyyə yaratmaqla öz borcunu yerinə yetirəcəyinə söz verib.  

Fərahim Şükürov

Mədəniyyət.- 2009.- 13 fevral.- S. 3.