Yenidən doğuldun sən

Ölməz şairimiz B.Vahabzadənin xatirəsinə

«Hara gedir bu dünya?» - deyə haray çəkərdin,

Öz dilini danana sən qənim kəsilərdin.

Qanlı Yanvar gecəsi ah-nalə çəkən səndin,

«Bizi susdurmaq asan olmayacaq» - söylərdin.

Deyərdin, vətənimin qoy beli bükülməsin,

Düşmənin qarşısında millətim əyilməsin.

Vətən üçün canından keçən o igidlərin,

Şəhidlərin adları tarixdən silinməsin.

Sındırdın özümüzü kəsən o qılıncları,

Qələminlə susdurdun sən ağılsız başları.

Alnının qırışını, çatılan o qaşları,

Əməyin - zəhmətinlə qazandın ağ saçları.

O tayda qəm içində böyük ulu Şəhriyar,

Bu tayda dərd çəkirdi bizim dahi Bəxtiyar.

Arzu-diləkləriydi, - milləti birləşərək

Qoy, azad bir vətəndə yaşasınlar bəxtiyar.

Xalqının düşməninə dünyanı etdilər dar,

Oğuz türkləri üçün onlar idi havadar.

Bir şam kimi yandılar; - Şəhriyarla Bəxtiyar

Ölümləri ilə onlar yenidən doğuldular.

Sevda Kərimova,

15 saylı Uşaq Musiqi

Məktəbinin müəllimi

Mədəniyyət.- 2009.- 20 fevral.- S. 13.