Süleyman Ələsgərovun 85 illiyi qeyd olundu

Fevralın 21-də G.Şaroyev adına 35 saylı Musiqi Məktəbində xalq artisti, bəstəkar Süleyman Ələsgərovun 85 illik yubileyi ilə bağlı tədbir keçirildi.

Tədbiri giriş sözü ilə açan məktəbin müəllimi Alla Fyodorova görkəmli bəstəkarın həyat və yaradıcılığı barədə qısa məlumat verdi.

Musiqi məktəbinin müəllimi Samirə Qocayeva (konsertmeyster) və şagirdləri Müsəvi İbadov (tar), Şakir Süleymanov (tar), Pərvin Baxışlı (tar), Sədəf Abdullayev (kanon) və başqaları görkəmli bəstəkarın fortepiano və xalq çalğı alətləri üçün yazdığı musiqi əsərlərini və vokal nümunələrini ifa etdilər.

Mərasimdə 35 saylı Musiqi Məktəbinin şagirdi Çinarə Quliyevanın S. Ələsgərova həsr etdiyi “Elegiya”sı da səsləndi.

Tədbirin sonunda çıxış edən məktəbin direktoru, əməkdar müəllim Yusif Vəliyev bəstəkarla bağlı xatirələrindən bəhs etdi: “Mən müəllimim S.Ələsgərov barədə həmişə fəxarət hissi ilə danışıram. S.Ələsgərovu dahi Ü.Hacıbəyovun ən layiqli davamçılarından hesab edirəm. O, həm bəstəkarlıqda, həm insanlıqda, xeyirxahlıqda Ü.Hacıbəyov çox yüksək keyfiyyətlərə malik kimi idi. Hamı onu Vətəninə, torpağına, elinə bağlı bir insan kimi tanıyırdı. Onda azərbaycançılıq hissi güclü idi. Bəstəkarın Şuşaya həsr etdiyi “Gözlə məni” romansını dinləyərkən bu hisslər apaydın duyulur.

S.Ələsgərov Azərbaycan bəstəkarlıq məktəbinin ünlü nümayəndəsi olmaqla yanaşı, həm də gözəl pedaqoq idi. O, istedadlı tələbəni xəzinə hesab edirdi.

Mərhum sənətkar hazırda musiqi sahəsində fəaliyyət göstərən yüzlərlə ifaçı və bəstəkarın yetişməsində əhəmiyyətli işlər görüb. Bu gün onun yetirmələri Azərbaycan musiqisini dünyada tanıdırlar.”

S.Ələsgərov 22 fevral 1924-cü ildə Şuşada anadan olub. 1949-65-cı illərdə A.Zeynallı adına Bakı Musiqi Məktəbinin direktoru, Mədəniyyət Nazirliyində İncəsənət şöbəsinin müdiri, Dövlət Radio və Televiziya Xalq Çağlı Alətləri Orkestrinin dirijoru, Musiqili Komediya Teatrının direktoru, baş dirijoru işləyib. Yaradıcılığında operetta janrı əsas yer tutur. “Ulduz” (1948), “Özümüz bilərik” (1962), “Olmadı elə, oldu belə” (1964), “Milyonçunun dilənçi oğlu” (1966), “Hardasan, ay subaylıq” (1968), “Sevindik qız axtarır” (1970), “Həmişəxanım” (1971) operettalarının bir çoxu Musiqili Komediya Teatrının səhnəsində bu gün də oynanılır. Bundan başqa, onun “Bahadır və Sona”, “Solğun çiçəklər” operaları, bir neçə kantata, simfoniya, “Bayatı-Şiraz” simfonik muğamı, simfonik poema və süitaları Azərbaycan musiqisinin incilərindəndir. Xalq artisti, Üzeyir Hacıbəyov adına respublika mükafatı laureatı Süleyman Ələsgərov 21 yanvar 1999-cu ildə dünyasını dəyişib. 

Turan

Mədəniyyət.- 2009.- 25 fevral.- S. 8.