Əbülfəs Qarayev Kubada səfərdədir

Azərbaycan Respublikasının mədəniyyət və turizm naziri Əbülfəs Qarayev Kuba Respublikasının mədəniyyət və turizm nazirlərinin dəvətinə əsasən 2009-cu il fevralın 24-dən Kuba Respublikasında səfərdədir. Nazirliyin mətbuat xidmətindən verilən məlumata görə, səfər müddətində iki ölkə arasında mədəniyyət və turizm sahələrində əməkdaşlığın inkişafı, eləcə də müxtəlif istiqamətlərdə əlaqələrin genişləndirilməsi məsələləri müzakirə ediləcək. Mart ayının 3-dək planlaşdırılan səfər müddətində turizm sahəsində əməkdaşlığa dair saziş imzalanması nəzərdə da tutulur. Bu barədə razılıq 2007-ci il noyabrın 30-da Havana şəhərində keçirilən Azərbaycanla Kuba arasında Hökumətlərarası Komissiyanın I iclasında əldə edilib. Nazirin səfər proqramına Hökumətlərarası Komissiyanın Kuba tərəfindən həmsədri ilə görüş və komissiyanın ikinci iclasının konkret tarixinin müəyyənləşdirilməsi də daxildir.

Xatırladaq ki, nazir Ə. Qarayev Azərbaycan Respublikası Prezidentinin 16 yanvar 2009-cu il tarixli sərəncamına əsasən Azərbaycan Respublikası və Kuba Respublikası arasında əməkdaşlıq üzrə Hökumətlərarası Komissiyanın Azərbaycan Respublikası tərəfindən həmsədri təyin olunub.

Mədəniyyət.- 2009.- 25 fevral.- S.1.