Bu günün fidanı sabahın şəxsiyyətidir

Gənc nəslin böyük ideyalar ruhunda tərbiyəsi, yüksək mənəvi-etik davranışlar çərçivəsində böyüməsi Azərbaycan cəmiyyətinin və dövlətinin qarşısında duran prioritet vəzifələrdəndir. Eyni zamanda, hər bir valideynin ümdə arzusu övladını sağlam, savadlı və sabahkı günün gərəkli vətəndaşı görməkdir. Sözsüz ki, evdə, uşaq bağçasında və məktəbdə verilən tərbiyə, təhsil bir vaxt hansısa kollektivdə, ictimai yerdə özünü büruzə verəcəkdir. Bunun üçün sabahı düşünən hər bir ailə başçısı vaxtla, zamanla ayaqlaşmalıdır. Aydındır ki, yaxşı ailə başçısı bacarıqlı bağban kimidir. Bağban il boyu çalışıb saf və gözəl meyvə yetişdirirsə, uzaqgörən ailə başçısı da körpə fidanlara vaxtında qayğı göstərməli, təlim-tərbiyəsi ilə məşğul olmalıdır. Cəmiyyətimiz üçün layiqli vətəndaş böyütməlidir...

Ötən əsrin sonlarında «sarsılmaz sovetlər ittifaqı» öz-özündən dağıldı. Xalq öz milli müstəqilliyini yenidən bərpa etdi. Azərbaycan dövlətinin qarşısında gələcəyin qurucularını və yaradıcılarını yetişdirmək kimi çox mühüm işlər, vəzifələr dururdu.

Məlumdur ki, indi məktəblərdə oxuyan, idman meydançalarında yarışan, kompyuter kurslarına gedən uşaqlar sabahın mühəndisi, həkimi, hüquqşünası və ictimai-siyasi xadimləridir. Məhz buna görə də Azərbaycan dövləti də özünün ailə, qadın və uşaq siyasətində gənc nəslin gələcəyin qurucusu kimi yetişməsini ön plana çəkdi. Ölkənin maddi, elmi və mənəvi potensialını bu istiqamətə yönəltdi.

Prezident İlham Əliyevin sərəncamı ilə 2009-cu il «Uşaq ili» elan edildi. Bu sərəncamla bağlı tədbirlər planı hazırlandı. Ölkənin bir sıra qurumları qarşısında həlli vacib məsələlər qaldırıldı. Ailə, Qadın və Uşaq Problemləri üzrə Dövlət Komitəsi, Rabitə və İnformasiya Texnologiyaları, Səhiyyə, Gənclər və İdman, Mədəniyyət və Turizm, Əmək və Əhalinin Sosial Müdafiəsi nazirlikləri, Dini İşlər üzrə Dövlət Komitəsi, Dövlət Statistika Komitəsi və yerli icra hakimiyyəti orqanları il ərzində uşaqların təhsili, sağlamlığı, bədii yaradıcılığı və digər məsələlərlə bağlı çoxsaylı tədbirlər həyata keçirəcəklər...

Ailə, Qadın və Uşaq Problemləri üzrə Dövlət Komitəsi sədrinin müavini Sədaqət Qəhrəmanova 2009-cu ilin «Uşaq ili» elan edilməsini dövlətin yetişməkdə olan gənc nəslə göstərdiyi qayğının bariz nümunəsi kimi dəyərləndirir:

- Ümummilli lider Heydər Əliyev uşaqları çox sevirdi. Qaçqın və məcburi köçkün ailələrindən olan uşaqlara xüsusi məhəbbəti vardı. Onların yaşayışı, yaxşı təhsil alması, sağlam böyüməsi üçün nə lazım idisə edirdi. Hər il keçirilən uşaq günündə şəxsən iştirak edər, onların problemləri və qayğıları ilə ciddi maraqlanardı. Göründüyü kimi, Prezident İlham Əliyev bu kursu ardıcıl olaraq davam etdirir... Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın bu sahədəki xidmətləri təqdirəlayiqdir. Belə ki, o, bir ana, qadın məhəbbəti göstərərək valideyn himayəsindən məhrum olan uşaqların dərd-sərinə qalır, onların heç də yiyəsiz olmadığını hamıya, göstərir. Onun internatlara, uşaq evlərinə tez-tez baş çəkməsi və uşaq müəssisələrinin təmiri üçün lazımi tədbirlərin görülməsi üçün göstərdiyi səy göz qabağındadır.

«Uşaq ili» ilə bağlı tədbirlər planında bir çox zəruri məsələlərlə yanaşı, Azərbaycan uşaqları haqqında Məlumat Bankının yaradılması da nəzərdə tutulur. Bu məsələ diqqəti daha çox cəlb edir.Çünki bu addımın atılması sonradan görüləcək tədbirlərdə xüsusi rol oynayacaq. Öyrəndik ki, Məlumat Bankının yaradılmasında Ailə, Qadın və Uşaq Problemləri üzrə Dövlət Komitəsi ilə bərabər Dövlət Statistika Komitəsi, Rabitə və İnformasiya Texnologiya Nazirliyi və digər aidiyyəti qurumlar da iştirak edəcəklər.

«Uşaq ili» ilə bağlı interner saytının yaradılması və «Azərbaycan uşaqları» adlı portalın formalaşdırılması, «Azərbaycan ailəsi” xüsusi tədqiqat proqramının həyata keçəirilməsi və müasir ailə modelinə dair müvafiq tövsiyyələrin hazırlanması da nəzərdə tutulur...

Tədbirlər planında BMT-nin «Uşaq hüquqlarına dair» Konvensiyası ilə bağlı aşağıdakı məsələləri zəruri hesab edir: uşaq hüquqları, sağlam həyat tərzi, uşaq yaradıcılığının və idmanın inkişafına, uşaqların biliklərinin artırılmasına, onlarda vətənpərvərlik, milli-mənəvi dəyərlərin qorunması kimi tədbirlərin keçirilməsi nəzərdə tutulur.

Xaricdə yaşayan azərbaycanlı uşaqlar da nəzarətdə saxlanılır. Onlara ana dilinin öyrədilməsində, ölkəmizlə yaxından tanış olmaqda yardım olunacağı göstərilir.

Tədbirlər planında il ərzində rayonlarda aztəminatlı və məcburi köçkün ailələrindən olan uşaqların pulsuz müayinəsi, sağlam həyat tərzinin təbliğinin təşkil edilməsi diqqətdə saxlanılır...

Ölkəmizdə azyaşlı uşaqların təhsili, tərbiyəsi, bədən tərbiyəsi və idmana cəlb edilməsi ilə yanaşı, onların sosial təhlükələrlə üzləşməməsi, cinayətkarlığa yuvarlanmaması üçün ciddi tədbirlər görülməlidir. Əlbəttə, bu işdə hamı məsuliyyət daşıyır - valideyn də, müəllim də cəmiyyət də...

Hər bir xalqın xoşbəxt gələcəyi onun sağlam - yəni hərtərəfli yetişdirdiyi gənc nəsildən çox asılıdır. Çünki bu günün fidanları sabahın şəxsiyyətidir.

Savalan Fərəcov

Mədəniyyət.- 2009.- 1 may.- S. 9.