Bir çələng hörəcəyəm,

Sənə toy hədiyyəsi...

Yeganə CANSAİL,

ADMİU-nun tələbəsi

Bəxş etdiyin kədərdən

bir paltar tikdirib

gələcəyəm toyuna...

Yadigar qalan

Qurumuş çiçəklərdənsə

Dolaşıq bəxtim kimi

Bir çələng hörəcəyəm

Sənə toy hədiyyəsi...

Bir içki də gətirəcəm,

Göz yaşlarımdan

Dünyanın heç bir yerində

Görmədiyin, içmədiyin

Acı içki.

Skripkanı da gətirəcəm,

İkimizin “felitsa”sını ifa edib,

Zamanı geri aparmaq üçün...

Gözlərin dolacaq,

Xatirələr aman verməyəcək

-dayan, deyəcəksən

Dönüb gedəcəm.

Sənsizliyimə qayıtmaq üçün...

* * *

Yağış...

Axşam...

9-un yarısı

Kafe.

Həmin künc,

Pəncərə önündəki masa

Onu gözləyir.

Əvvəlkilərdən fərqli

Bir az kədər

Bir az həyəcan,

Yarıya qədər içilmiş şampan.

Pəncərədə cığır açan damlalar

Və içəri axan qadın silueti...

-Bağışla, bir az gecikdim,

-Yox, vaxtında gəlmisən...

Tərəddüd,

Sükut.

-Ayrılmalıyıq.

Kəlmələrlə donan vaxt

Cığır açan damlalar...

Pəncərədən küçəyə axıb,

İtən kişi silueti...

* * *

İtlər hürür...

Görəsən, gecənin hansı vaxtıdır?

Yoldan ötən avtomobil səsləri.

Yəqin, çox gec deyil...

Kimsə evinə tələsir,

Ailəsinin, qadınının yanına.

Saatın çıqqıltısı

Ay aman, gecə yarıdır ki...

Sükut...

Kağız

Cızma-qara səsləri...

Masanın üstündə təqvim.

Çox soyuqdur...

Avqustun 28-i

Hamı yatıb.

Sükutu pozan qadın xorultusu

Gözümü çəkə bilmədiyim təqvim.

Avqustun 28-i

Bürkü, isti.

Bəs niyə mənə soyuqdu?

Qəzetin şappıltısı

Divarda iz qoyan ağcaqanad...

Həmin sükut,

Həmin soyuq.

Qapı tıqqıltısı

Qonağım tənhalıq...

* * *

Kədərimin sahilində

Dəlmə-deşik

Dərd qayalarında

Göz yaşlarıma sallayıb ayaqlarımı

Seyr edirdim səni,

Atılmış,

Kimsəsiz

...Balıqçı toru

Qatili olduğun dəniz

Son ümidin

Son pənahın.

Cırılmış sinəndən qopan ahlar

Mənim də ahım...

Tanış mənzərə,

İndi səni qurban edir

Sabah onu.

Sahibin insan-

əzəldən belə...

* * *

Qəribə gündür...

Elə bil

Sənin gözlərini səpələyiblər,

Küçələrə,

Adamların simasına,

Ağaclara,

Metrolara.

Hər tərəfdən yaşıl gözlər zillənib

Gözlərimə...

Uşaq səmimiyyəti,

Məmnunluq,

Bir az da yorğunluq

Süzülən gözlər...

Bəlkə də,

Sənsizliyimdi,

Gözlərinə bürünüb

İndi də belə izləyir

Qarabaqara məni...

Bəlkə də, xatirələrindi

Salamlaşmaqçün çıxıblar yollarıma,

Bəlkə də, etdiyin

ən sonuncu pisliyindir

bilmirəm... bəlkə də...

* * *

Dalğalar

Qabarıb çəkildikcə

Tənhalığın uzun akkordlarını

Vururlar sanki...

Bəzən prelüdiya,

Bəzən kaprizlər...

Bəzən də bir qızın

Kədərinə

Sızıldayan skripka...

* * *

Əllər görüşürdü

Gözlər öpüşürdü

əllər toxunurdu

o görüşlərdə...

əllər deyirdi

son sözü

əllər isidirdi

əllərimi

Ayrılığın hərarətini ötürən əllər,

əlvidanı edən əllər...

bu qədər doğma əllər

bu qədər qəddar əllər...

İndi

Başqa bir əl vermir

O hərarəti...

Başqa bir göz

Demir o sözləri...

Başqa bir ürək yaşatmır

O məhəbbəti...

* * *

Sus...

Nə olar sus, danışma.

Çox bezmişəm...

Yalan kəlmələrdən,

Yalan eşqdən,

Yalan görüşlərdən

Gecələr xəyalına bürünməkdən!..

Çox istərəm...

Xəyalını tikələyib,

Küçələrə səpələmək...

Sonra...

“Bu sənsənmi?!” - deyib,

Acizliyinə ürəkdən gülmək,

Qəhqəhə çəkmək.

Sonra da, bir küncə yıxılmaq

Dizlərimi qucaqlayıb,

Fəryad qoparmaq.

“Bu sənsənmi?!”

Qəhərlənmək...

Göz yaşları içərisində boğulmaq...

Gözlərimdə ilişib qalmış

O baxışları da itirərəm deyə

əllərimlə gözlərimi bağlamaq.

O baxışlar, qaçıb getməsin deyə

əbədi kor olmaq,

zülmət dünyamı

daha bir qaranlığa bürümək

səni gözlərimdə gizlədib

Səni görməmək...

Məhəbbətsiz həyat dənizində

Tənhalıq dalğalarına qərq olub

əlvida etmək,

əbədi köçmək...

* * *

Bir cığır var...

əvvəli gözlərimdən başlayan

yanağımdan sürüşüb

çiynimdə bitən,

Xəyalının gəzdiyi,

Bəzən də

Dizlərimə atılıb,

İntihar etdiyi,

Xatirələrinin cığırı...

Mədəniyyət.- 2009.- 6 may.- S. 13.