Mərhəmət işığında Haqqın yolu

Heydər Əliyev Fondunun qayğısı Haqq kimi uşaqların parlaq gələcəyinə təminat verdi

Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın rəhbərlik etdiyi fondun təşəbbüsü ilə Nərimanov rayonundakı kor və zəif görən uşaqlar üçün Respublika internat məktəbi əsaslı təmir olunaraq istifadəyə verilib.

“Uşaq evləri və internat məktəblərinin inkişafı proqramı” çərçivəsində 2005-ci ilin sonunda məktəbin əsaslı təmiri və yenidən qurulmasına başlandı. Təmir işi qısa vaxtda keyfiyyətlə başa çatdırıldı, daimi istilik sistemi quraşdırıldı, yeməkxana, idman kompleksi də tikildi. İndi burada uşaqların bədii-estetik zövqlərinin formalaşması, asudə vaxtlarının təşkili üçün nümunəvi şərait var.

Onların sayı 40 mindir

Ölkəmizdə 40 min kor və ya görmə qabiliyyəti zəif olan insan var. Fond onların informasiya toplamaq və məşğulluğunu artırmaq üçün əlavə imkanlar yaratmaq mexanizmi kimi, İKT-dən istifadənin təşkilini zəruri sayaraq, BMT-nin İnkişaf Proqramı ilə birgə Milli Strategiya hazırlayıb. Belə bir layihəyə BMT-nin İnkişaf Proqramının da dəstək verməsi həm ölkəmizdə gedən uğurlu islahatlara inamın, həm də Fondun indiyədək qarşıya qoyduğu məqsədlərə çatmaq üçün iradə nümayiş etdirməsinin nəticəsidir. Mehriban xanım bu istiqamətdə kor və ya görmə qabiliyyəti zəif olan uşaqlara böyük imkanlar yaradıb. Həmin məktəb müasir kompyuter texnologiyası ilə təmin olunub. Ən sevindirici hal isə belə uşaqların kompyuter proqramından sərbəst istifadə etməsidir. Məktəbin geniş zalı elektron kitabxana üçün uyğunlaşdırılmış, Almaniya istehsalı olan 2 kompyuter dəsti alınıb quraşdırılmışdır. Bu kompyuterlər xüsusi olaraq kor və görmə qabiliyyəti zəif uşaqlar üçün hazırlanmış ən son model texnologiyadır.

Uşaqlar üçün Model İKT sinifləri yaradılıb, proqram təminatı lokallaşdırılıb, İnternetə çıxışın təmin olunması və tədris-təlim proqramlarının hazırlanması, audiostudiya və kitabxananın fəaliyyəti təmin edilib. Brayl əlifbası ilə Azərbaycan, rus və ingilis dillərində olan istənilən kitabı kompyuterin yaddaşına köçürüb oxumaq, səsləndirib dinləmək mümkündür. Belə bir qayğı və dəstək kor və zəif görən uşaqlar üçün ən böyük müjdədir. Onlar da öz növbəsində yaradılan şəraitdən ruhlanaraq ölkəmizdə və onun hüdudlarından kənarda müstəqil Azərbaycanın bayrağını zirvələrə qaldırırlar.

Niyyətin hara, mənzilin ora...

Belə uşaqlardan biri sözügedən məktəbin 6-cı sinif şagirdi Haqq Rüstəmovdur. Əlil uşaqların beynəlxalq şahmat yarışmasından Azərbaycana ilk qızıl medal gətirən bu oğlanla söhbətimizdə bir daha aydın oldu ki, Haqq Heydər Əliyev Fondunun xüsusi diqqət və qayğısı ilə yaşayan uşaqlar kimi, artıq parlaq gələcəyə gedən yolunu müəyyənləşdirib.

Kor və zəif görən uşaqlar üçün Respublika internat məktəbinin nəzdində musiqi məktəbi də fəaliyyət göstərir. Bu məktəbdə musiqiyə marağı olan uşaqlar öz seçimlərini edirlər. Haqq da burada 3 il tar üzrə musiqi təhsili alıb. Bu, onun valideynlərinin seçimi idi. Bu illər ərzində tarda çalmağı öyrənsə də, şahmatla məşğul olmaq arzusunu valideynlərinə bildirəndə, onlar Haqqın bu fikrini müsbət qarşılayıblar. O, artıq 3 ildir şahmatla peşəkar səviyyədə çalışır. 2007-ci ildə Makabi Azərbaycan Mədəni İdman Birliyində keçirilən I Beynəlxalq Şahmat Turnirində iştirak edən Haqq diploma layiq görülüb. 2008-ci ilin noyabr ayında eyni adlı beynəlxalq turnirdə iştirak edərək II yeri tutub.

Qalibiyyət zirvəsinə doğru addım atan bu balaca oğlan növbəti yarışların birində qızıl medala iddialı olub. “Niyyətin hara, mənzilin ora”-deyib atalar. O, bu qərarı hələ iki il bundan əvvəl verib. Anası Cəmilə xanım bizimlə söhbətində qeyd etdi ki, Haqq, alacağı mükafatlar arasında qızıl medalların sayca çox olacağına söz verib. Çünki qalib şahmatçının mənsub olduğu dövlətin bayrağı yarışmada yüksəlməklə bərabər, həm də himni səslənir. Haqq yarışmalarda bu məqamı səbirsizliklə gözləyir. O, bizimlə müsahibəsində də daha böyük nailiyyətlər qazanmaq arzusunda olduğunu qeyd etdi: “2007-ci ildə Rusiya Federasiyası Krasnodar vilayətinin Adler şəhərində uşaqlar arasında keçirilən beynəlxalq şahmat yarışmasında ölkəmizi təmsil edərkən II yerə layiq görüldüm. Bu yarışda erməni rəqibimə qalib gələrək, Azərbaycan bayrağını yüksəklərə qaldırdım. Bu mənim həyatımda ən unudulmaz gün idi. Torpaqlarımızı işğal edənlərə hələlik ağılla güc gəlmək gərəkdir. Bundan sonra, bu il (2009) uşaqlar arasında keçirilən “XXI əsrin Bütün Rusiyanın Qartal Gülü” adlı yarışda I yer tutaraq qızıl medal qazandım. Respublikamızda əlil uşaqların da qazandığı bütün uğurlar dövlətimizin, xüsusən də Heydər Əliyev Fondunun prezidenti Mehriban xanım Əliyevanın qayğısının nəticəsidir”.

Həmsöhbətimiz iyun ayında Gürcüstanda şahmat turnirinə, iyul ayının 19-da isə İsveçdə şahmatçılar arasında dünya birinciliyinə hazırlaşır. Şahmat onun ən sevimli məşğuliyyətidir. Bununla paralel, Haqq şeir oxumaq, maraqlı əl işləri hazırlamaq bacarığı ilə də başqalarından fərqlənir. Haqqın bir arzusu da var. O, hüquqşünas olmaq istəyir. Haqq yolunda inamla addımlayan Haqq, dövlətimizin qanunlarının keşiyində durub, millətinin hüquqlarını qorumaq arzusundadır.

ŞƏMSİYYƏ

Mədəniyyət.- 2009.- 9 may.- S. 20-21.