Mədəniyyətimizə bir günlük səyahət

Fransa Respublikasının Mədəniyyət və Kommunikasiyalar Nazirliyinin təşəbbüsü ilə bu il də “Muzeyler gecəsi” adı altında aksiya keçirildi.

Azərbaycan Respublikası Mədəniyyət və Turizm Nazirliyinin 05. 03. 2009-cu il tarixli 60 saylı əmrinə əsasən, “Muzeylər gecəsi” bu il Azərbaycanda geniş qeyd olundu. 16 may, saat 15:00-da başlayan tədbir 22:00-dək davam etdi. Onu da qeyd edim ki, “Muzey və Turizm” devizi altında Beynəlxalq Muzeylər Şurası (İCOM), Azərbaycan Milli Komitəsi, Cəfər Cabbarlı adına Azərbaycan Dövlət Teatr Muzeyi, Azərbaycan Xalçası və Xalq Tədbiqi Sənəti Dövlət Muzeyi və başqa muzeylərdə turlar keçirildi. Tədbirdə iştirak etmək üçün Bilgəh qəsəbəsi Müharibə və Əmək Əlilləri Pansionatından 30 nəfər, Nizami rayonu 1 saylı və Xətai rayonu 3 saylı Uşaq evlərindən 40 nəfər dəvət olunmuşdu.

Tədbir saat 18:00-da Muzey Mərkəzinin qarşısında, muzey əməkdaşlarının və 96 saylı məktəbin şagirdlərinin “Halay vuraq, yallı gedək” rəqsinin sədaları altında açıldı. Daha sonra Cəfər Cabbarlı adına Azərbaycan Dövlət Teatr Muzeyi də “Tariximizə və mədəniyyətimizə səyahət” adı altında tədbiri başladı. Mərasimdə çıxış edən Teatr Muzeyinin elmi katibi Rəna Salahova 1 və 3 saylı Uşaq evlərindən gələn uşaqları “Teatr xalqımızın böyük sərvətidir”, “Qobustan pirləri” adlı fotosərgilərlə tanış edərək, Azərbaycan xalqının teatrında əvəzolunmaz xidmətləri olmuş böyük dramaturqlarından bəhs etdi. Gecədə iştirak edən Respublika Uşaq Təşkilatının “Səma” rəqs qrupu öz rəngarəng ifalarıyla tədbirə xoş rəng qatdılar. Tədbirin sonunda uşaqların muzey və tədbir barədə təəssüratları ilə tanış olmaq üçün onlara yaxınlaşdım. Sevindim ki, uşaqları bu mədəniyyət ocaqlarımızla aparıb, onları yaxından tanış edirlər. Həmin gün Bilgəh qəsəbəsi Müharibə və Əmək Əlilləri Pansionatından gələn qocaların iştirakıyla Azərbaycan Xalçası və Xalq Tətbiqi Sənəti Dövlət Muzeyində də maraqlı tədbir keçirilirdi. Tədbiri muzeyin direktoru Röya Tağıyeva açaraq milli mədəniyyətimizdən, onun tərkib hissəsi olan xalçalarımızdan söhbət açdı. Daha sonra isə muğamlarımız, «Qarabağ şikəstəsi» ifa olundu. Musiqili tədbir, deyəsən, nənə və babalarımızın çox xoşuna gəlmişdi. Əsrarəngiz musiqinin sədaları və rəngarəng xalçalarla bəzənmiş ekspozisiya zallarını doluşan qocalar belə bir aksiyanın təşkilinə görə Mədəniyyət və Turizm Nazirliyinə təşəkkürlərini bildirdilər. Onlara rəngarəng, maraqlı təəssürat bəxş edən bu kimi aksiyaların davamlı olması arzularını dilə gətirdilər...

Yeganə CANSAİL

Mədəniyyət.- 2009.- 20 may.- S. 3.