Yazarlarımız mükafatlandırıldı

Noyabrın 14-də Azərbaycan Yazıçılar Birliyində Mahmud Kaşğarinin 1000 illiyi münasibətilə keçirilən beynəlxalq hekayə müsabiqəsinin Azərbaycan üzrə qaliblərinin mükafatlandırma mərasimi reallaşdı.

Tədbirdə çıxış edən "Ulduz" jurnalının baş redaktoru Elçin Hüseynbəyli, AYB -nin sədri, xalq yazıçısı Anar və başqaları belə müsabiqələrin əhəmiyyətindən söz açdılar.

Bildirdilər ki, müsabiqəyə 36 yazar müraciət edib. Onların 3-ü yarışma şərtlərini pozduğuna görə müsabiqəyə buraxılmayıb.

İntiqam Qasımzadə, Bəsti Əlibəyli, Rəşad Məcid, Qulu Ağsəs və Elçin Hüseynbəylinin təmsil olunduğu münsiflər heyəti 33 yazarın 43 hekayəsini 10 ballıq cədvəl üzrə qiymətləndirib.

Daha sonra birinci (Zakir Sadatlı "Salam baça"), ikinci (Fəxri Uğurlu "Dirilmə"), üçüncü (Eyvaz Zeynalov "Mənim tanımadığım Moskva") və xüsusi yer (Vəsilə Usubova "Poloneza") tutanlara diplom və pul mükafatları təqdim olundu.

Qeyd edək ki, müsabiqənin yerli mərhələsi bu il aprelin 1-dən 30-na kimi keçirildi və qaliblərin adı avqustun 7-də Azərbaycanda Atatürk Mərkəzində keçirilmiş mətbuat konfransında açıqlandı.

Beynəlxalq hekayə müsabiqəsinin mükafat fondu təxminən 50 min avrodur və 24 türkdilli subyektin yazarları arasında keçirilir. Azərbaycan tərəfındən təşkilatçı "Ulduz" jurnalıdır.

Müsabiqənin ikinci mərhələsi İstanbulda keçiriləcək və subyektlərdə birinci yeri qazanmış 24 yazar öz aralarında yarışacaq. Qaliblər aşağıdakı məbləğdə pul mükafatı qazanacaq. Birinci yer - 6000 avro, ikinci yer - 4000 avro, üçüncü yer -2000 avro. Üç həvəsləndirici mükafatın hərəsi - 1000 avrodur.

Qaliblərin adı bu il dekabrın sonunda Ankarada açıqlanacaq. Azərbaycan tərəfdən İstanbul mərhələsində münsiflər heyətinin üzvü AYB-nin sədri, xalq yazıçısı Anardır.

Turan

Mədəniyyət.-2008.-15 noyabr.-S.2.