Kulinariya günü qeyd edildi

20 oktyabr Azərbaycanda Beynəlxalq Kulinariya Günü kimi tanınır. Artıq üçüncü dəfədir ki, ölkəmizdə bu gün təntənəli şəkildə qeyd olunur. Beynəlxalq Kulinariya günü münasibətilə, 12 saylı Bakı Peşə Liseyində tədbir keçirildi. Tədbiri açıq elan edən liseyin direktoru Şərif Hacıyev qonaqları salamlayaraq ilk sözü Milli Kulinariya Mərkəzinin icraçı direktoru Nailə Muradovaya verdi. Nailə xanım son 3 ildə görülən işlərdən, qazanılmış uğurlardan söhbət açdı. Daha sonra qonaqlara söz verdi.

Tədbir haqqında Mədəniyyət və Turizm Nazirliyinin şöbə müdiri Fikrət Babayevin fikirlərini öyrəndik. O, bildirdi ki, belə tədbirlərin keçirilməsi vacibdir: “Gənc nəsil milli kulinariyamızın sirlərinə bələd olur, gələcəkdə ölkəmizin hüdudlarından kənarda xalqımızı layiqincə təmsil etmək imkanı qazanır. Mədəniyyət və Turizm Nazirliyi olaraq bundan sonra da belə tədbirlərin keçirilməsi üçün əlimizdən gələni edəcəyik”.

Tədbirdə Təhsil Nazirliyinin texniki peşə təhsili şöbəsinin müdiri Namiq Məmmədov da iştirak edirdi. Onun sözlərinə görə, bu gün kulinariya sahəsində çalışan insanların əlamətdar günüdür. Həmçinin də təhsil sektoru üçün məxsusi gündür. Çünki bu tədbirdə şagird və müəllimlər öz hazırladıqları məhsulları nümayiş etdirir, digərlərindən nə isə öyrənmək imkanı qazanırlar. Bu peşə təhsilinin yüksəlməsinə xidmət edən və bu sahəyə marağın artmasına səbəb olan bir aksiyadır.

Ülkər RƏHMANQIZI

Mədəniyyət. - 2009.- 21 oktyabr.- S. 3.