Azərbaycan kitabları Koreya kitabxanalarında

Azərbaycan Respublikasının Cənubi Koreya Respublikasındakı səfirliyinin təşəbbüsü ilə qarşılıqlı razılaşma əsasında Asiya ölkələri arasında reytinq cədvəlinə görə dördüncü, Cənubi Koreya Respublikasında birinci yerdə olan Seul Milli Universitetinin kitabxanasında Azərbaycanın xarici və daxili siyasətini, iqtisadiyyatını, mədəniyyətini, turizm imkanlarını və digər sahələri əks etdirən materiallardan ibarət “Azərbaycan-Land of Fire” adlı bölmə açılıb.

Hazırda universitet kitabxanasında Azərbaycan bölməsi ilə yanaşı, yalnız ABŞ səfirliyi tərəfindən yaradılmış “Windows on America” adlı bölmə fəaliyyət göstərir. Azərbaycan guşəsi səfirlik tərəfindən himayəyə götürülərək, mütəmadi yeni materiallarla təmin olunur. Bu baxımdan, səfirlik yaradılmış guşənin kitab fondunun zənginləşdirilməsi vasitəsi ilə daimiliyinin qorunub saxlanılmasında və genişləndirilməsində Heydər Əliyev Fondu, Xarici İşlər Nazirliyi, Mədəniyyət və Turizm Nazirliyi və digər əlaqədar qurumların dəstəyindən istifadə edir.

Heydər Əliyevin siyasi həyat yolunu əks etdirən kitablar, ingilis və Azərbaycan dillərində Ermənistan - Azərbaycan- Dağlıq Qarabağ problemi, 20 Yanvar və Xocalı faciələri, Azərbaycanın tarixi, mədəniyyəti, incəsənəti və ədəbiyyatına dair kitab, jurnal, qəzet və təbliğat xarakterli digər materiallar Cənubi Koreya Respublikasının Parlament Kitabxanası, Xarici İşlər və Ticarət Nazirliyi, Xarici İşlər və Milli Təhlükəsizlik İnstitutu, Koreya Sülh İnstitutu və İpək Yolu Fondu da daxil olmaqla, ölkənin iyirmidən çox əsas universitet və tədqiqat institutlarının kitabxanalarında yerləşdirilib.

Mədəniyyət.- 2009.- 2 sentyabr.- S. 2.