Antarktidanın ən yüksək zirvəsinə Azərbaycanın bayrağı sancılıb

Azərbaycanın Antarktidaya yollanmış ilk ekspedisiya qrupunun üzvləri qitənin ən yüksək zirvəsini - Vinson dağını (5140 metr) fəth ediblər. Ekspedisiya qrupu yanvarın 12-də Çili vaxtı ilə saat 19.00-da (Bakı vaxtı ilə 11.00-da) zirvəyə yürüşü başa çatdıraraq, orada Azərbaycan bayrağını sancıb, habelə bir üzündə ulu ondər Heydər Əliyevin şəkli olan və "Mən fəxr edirəm ki, azərbaycanlıyam" sözləri, o biri üzündə isə Azərbaycan Prezidenti İlham Əliyevin şəkli və "Azərbaycan, İlhamla irəli!" sözləri yazılmış bürünc lövhə bərkidiblər.

Ekspedisiya qrupu bu barədə Azərbaycan Prezidenti İlham Əliyevə peyk rabitəsi vasitəsilə məlumat verib. Dövlətimizin başçısı bu tarixi hadisə ilə əlaqədar onları təbrik edib, gələcək tədqiqat işlərinin davam etdirilməsində uğurlar arzulayıb.

Xatırladaq ki, Hava və Ekstremal İdman Növləri Federasiyasının prezidenti Hüseynqulu Bağırovun başçılığı ilə 2008-ci il dekabrın 24-də Bakıdan yola düşən Azərbaycan-Antarktida ekspedisiya qrupu dekabrın 30-da Çilinin Punta Arenas şəhərindən bu ölkənin Antarktidadakı Patriot-Hills stansiyasına yollanıb. Ekspedisiya üzvləri təyinat yerinə çatanadək elmi tədqiqat işləri, 300-dən çox meteoroloji müşahidə aparıb, 2 kiloqramadək müxtəlif qiymətli geoloji nümunələr toplayıblar.

Hazırda ekspedisiya qrupu Cənub qütbünə doğru irəliləyir və elmi tədqiqat işlərini davam etdirir.

Mədəniyyət.-2009.-15 yanvar.-S.1.