Cavad xan anıldı

Gəncə xanı Cavad xanın işğalçı qüvvələrə qarşı qeyri-bərabər vuruşda şəhid olmasının 205-ci ildönümü münasibətilə onun məqbərəsi önündə “Sönməyən ulduzların işığı” meydan-tamaşası göstərilib. Tamaşanıın ssenari müəllifi Azərbaycan Yazıçılar Birliyi Gəncəbasar bölməsinin sədri Məmməd Alim, quruluşçu rejissoru isə əməkdar incəsənət xadimi Bəhram Osmanovdur. Gəncə Dövlət Dram Teatrı aktyorlarının ifasındakı tamaşada Cavad xanın öz ailə üzvləri ilə birgə böyük şücaət göstərərək həlak olmasından bəhs edilir.

Tamaşanın sonunda şəhər rəsmiləri ictimaiyyət nümayəndələri ilə birgə Cavad xanın məqbərəsini ziyarət edərək, milli mücahidlərimizə öz ehtiramlarını bildirdilər.

Gəncə Şəhər İcra Hakimiyyətinin başçısı Eldar Əzizov KİV nümayəndələri ilə söhbətində Cavad xanın bu şəkildə anılmasının ənənə halını aldığını və onun xatirəsinin gəncəlilərlə yanaşı, bütün azərbaycanlıların qəlbində daim yaşayacağını deyib.

Maraqlı tarixi hadisələr fonunda insan taleyi faktorunun önə çəkildiyi tamaşadan danışan rejissor B.Osmanov, anım gününün mərdlik, mübarizlik və insanlara vətənpərvərlik ruhunun aşılanmasına xidmət etdiyini vurğulayıb: ”Ənənəvi keçirilən bu mərasimlərdə müxtəlif formalarda qəhrəmanlıq nümunələrimizi əks olunmasına, yeni tarixi faktların meydana çıxarılmasına çalışırıq. İstərdim bütün Azərbaycan qəhrəmanlarının xatirəsi bu şəkildə anılsın”.

Mədəniyyət.-2009.-15 yanvar.-S.3.