Yeriyərkən dediyim şeirlər

Kişilər

Dünyada gör necə kişilər vardı

Dünyadan gör kimlər köç etdi, qardaş?

Bu dünya nədi ki, dünənin ardı,

Kişidən kişiyə keçiddi, qardaş!

Ayrılıq

Görürəm, məni eşitmirsən,

Məni görmürsən, görürəm...

Harda durmusan, qardaş, -

görüşdüyümüz

o gözəl yerdə.

Hara cəhənnəm olub

getmişəm ee... qardaş, -

dünyanın bu başıdı,

mənəm bir də!

Necə eşidəsən məni, qardaş,

necə eşidəsən?

Necə görəsən məni, qardaş,

necə görəsən?

Sən görüşdüyümüz

o gözəl yerdə,

mən dünyanın bu başında,

cəhənnəmin dibində!

Tüstü və isti

Bir az tüstü,

dalınca isti...

Bir az tüstü,

dalınca isti...

Bir qullab tüstü,

dalınca isti;

Qutuda siqaretlər

Balalayır elə bil,

Araq şüşəsinin dibindən -

Çeşmə çağlayır elə bil.

Nə tüstü tükənir,

nə də ki, isti!

Bir az tüstü;

bir az isti...

Canı qoymağa

ən sərin yer

torpağın altıdı, qardaş, -

orda nə tüstü var,

nə də ki, isti...

Təvəqqe

Sizə göndərirəm təzə şeirimi,

"A"dan, "Ze"yə kimi məzə şeirimi.

Sevişin onunla, oynaşın, gülün,

Amma gətirməyin gözə şeirmi.

Halal olsun

Üstümə sığmayan dərd - qaynar ütü

Baxmır ki, fəqirəm, gəlmişəm kənddən.

Mənə halal olsun anamın südü,

Çünki sağ çıxıram hər fəlakətdən.

Anama doğru

Hər an bir an

Gedirəm anama doğru ,

Hər saat bir saat

gedirəm anama doğru,

Hər ay bir ay

gedirəm anama doğru,

Hər il bir il

gedirəm anama doğru...

Elə bil gəlir yuxum,

elə bil gəlir yuxum

Vaxt ötür oğrun-oğrun..

gedirəm anama doğru!

Kitab

Demə ki, varağımdan

Niyə boylanır qüssə...

Çünki köhnə kitabam -

tirajsız,

bircə nüsxə.

Qız və söz

Qız var, yerişi gözəldi,

qız var, gülüşü gözəldi,

Qız var, hər işi gözəldi...

Söz var, könül açır,

Söz var, qüdrət saçır,

Söz var, gəlişi gözəldi...

Bu da belə bir sözdü,

ucun tutduq, düzəldi!

Uzaq ətraf

Bir də gördün ki, Ay

toxundu mənə,

ya

qanım qaynadı Gün işığından...

Uzaqlar...

nə qədər yaxındı mənə,

Nə qədər uzağam öz ətrafımdan?..

Keşkə

Ana haqqında

ana südü kimi

pak və halal

bir şeirim olaydı

keşkə -

mənim kimi

atasız, anasız

yetimin

anası haqqında,

planetimin

anası haqqında...

Əsl yanmaq

Nə var e.. səril quma

Canın bişsin ət kimi.

Tər axsın dama-dama,

Qan bərkisin mət kimi.

Göz qırpımında nədən

Alışmaq istəyirsən?

Üstünə benzin tökən

Gəlin deyilsən ki, sən!

Od alıb qəfil yanmaq

Bir az harın yanmaqdı.

Dərdə müvafiq yanmaq

Korun-korun yanmaqdı...

Gecə qadın

Üzüb əldən salır qayğı canımı,

Adam gözün örtüb necə yeriyir?

Bürünüb qaraya ərəb xanımı

Elə bil üstümə gecə yeriyir...

Getmək

Yerinə getmək nədi ki? -

dibə getməkdi!

Dərinə getmək nədi ki? -

çöpə getməkdi.

Yeməyə getmək nədi ki? -

axura getməkdi.

Diləyə getmək nədi ki? -

başqa bir adı yox;

xain getməkdi.

Cənnətə getmək nədi ki? -

yerin üstündən

yerin altına

arxayın getməkdi...

Xoşbəxtlik anı

Bilirsənmi, qardaş,

mən xoşbəxt oluram

nə zaman,

hansı anda? -

Nəfəsim

axıra qədər gedib

qayıdanda...

Bu,

xoşbəxtliyə verilən

əsl qiymət, deyil fəqət!

Nəfəsim oldu, olmadı; var o -

O xoşbəxtlik,

mənə qismət deyil fəqət!

Vedrə

Kasam dolsun deyə gəzmədim çeşmə,

Su alıb gedirəm,

vədə vaxtıdı,

Axıtdım gözümdə nə qədər yaş var -

Dolub-daşdı vedrəm,

vida vaxtıdı!

Fəlsəfi qafiyə

Nədir dinin

Dövlətdən ayrı olmağı? -

Siyasət!

İnsanın

Allahdan

ayrı olmağı nədir bəs? -

Fəlakət!

Yarımçıq

Zəhləm gedir

yarımçıq işdən.

Yarımçıq işlərin

mənası yoxdu -

məsələn,

mənə görə ölmək

susuzluqdan yanarkən

su içmək kimi xoşdu...

Ölmək istəmirəm di gəl,

Çünki əlimdə

yarımçıq işlərim çoxdu.

Sözə baxmayan

Baxmaram heç kəsin sözünə

Deyilən sözdən çıxaram.

Söz baxsa mənim sözümə

Mən sözün sözünə baxaram.

Qızıl orta

Sən mələk deyildin,

amma necə xoşbəxt idin,

xoşbəxt...

Yuxarıda Allah vardı,

aşağıda xalq -

Allah aparmaq,

xalq boğmaq

istəyirdi səni...

Amma ki, eyninə deyildi

nə göydəki qızıl baxt,

nə yerdəki qızıl taxt...

Qızıl orta deyirlər buna,

Qızıl ortada yaşayan

Yenilmir heç vaxt...

Yastıq

Saçımı yolmuram keçəl başımdan

Nağara çəkməyə, dəf eləməyə.

Gəlir gözləmirəm heç bir işimdən,

Mən iş görmürəm ki, nəf eləməyə...

Kiməmsə işim də adıma layiq

Yastıq düzəldirəm,

əlimdə qıyıq;

Öləndə başımın altına qoyub

Axirət taxtında kef eləməyə.

Yoxluq

Qara daşa çırpılan

ucu yanıq ox idim.

Nə idim ki, nə qalam,

yalan sözdü çox idim.

Qupquru şaxşax idim -

Puçluq içində yaxam.

Min il əvvəl yox idim,

Elə indi də yoxam!

İstəyirəm, istəmirəm

Niyə beləyəm axı,

Halım dəmbədəm gedir?

Bir damarım süd arxı,

O birindən qəm gedir.

Haçan ki tünlük olur -

açılmayan xəmirəm,

hamı mənə yük olur,

hamıdan zəhləm gedir;

üzlərinə demirəm.

Elə ki, vaxtı yorub,

Elə ki, qalıram tək

Az qalıram ki, durub

divarları gəmirəm.

Bir mənəmmi dəmbədəm? -

Heç kimi pisləmirəm.

Tək olmaq istəyirəm,

həm də ki, istəmirəm...

Bəhmənli Vaqif

Mədəniyyət.-2009.-24 yanvar.-S.12.