«Kino həftəsi»nin niyyəti baş tutdu

Aprelin 6-dan paytaxtda start götürən Azərbaycan Kino Həftəsi davam edir. Müasir Azərbaycan kinosunu təbliğ və yeni çəkilmiş filmləri geniş tamaşaçı auditoriyasına təqdim etmək məqsədi daşıyan Kino həftəsi çərçivəsində dünən Şağan Uşaq Evində “Cəsur təyyarə” və “Xeyirxah kirpi” cizgi filmlərinə baxış keçirilib. Daha sonra tədbirlər müxtəlif mədəniyyət ocaqlarında davam etdirilib. Bu və digər filmlərin nümayişi, eləcə də həftəliklə bağlı təəssüratlarını bizimlə paylaşan Mədəniyyət və Turizm Nazirliyinin kinematoqrafiya şöbəsinin nümayəndəsi Almaz Sultanzadənin sözlərinə görə, nəticə gözləniləndən də yüksək olub: «Elə ilk açılış günündə insanların yeni filmlərə böyük marağının şahidi olduq. Sanki tamaşaçıda bir aclıq vardı. Heydər Əliyev adına Sarayda nümayiş olunan «Niyyət» bədii filmini ayaqüstə alqışladılar, belə anşlaq hələ görünməmişdi. Bu isə o deməkdir ki, tamaşaçı milli filmlərimizi böyük ekrandan görmək arzusundadır. Buna görə də qərara almışıq ki, kino həftəsi hər il ənənəvi olaraq keçirilsin». “cəsur təyyarə” və “Xeyirxah kirpi” cizgi filmlərinin də təqdimatı eyni anşlaqla müşayiət olunub. Təqdimatda Şağanda yerləşən Uşaq Evi və Saray qəsəbəsindəki İnternat Evinin sakinləri iştirak edib. Filmləri xüsusi maraqla izləyən əlil uşaqlar o qədər təsirləniblər ki, təqdimatdan sonra şeir söyləyib, mahnı oxuyub, əyləniblər. A.Sultanzadə filmlərin bölgələrdə də eyni maraqla qarşılandığını bildirdi. Öyrəndik ki, ölkənin 9 bölgəsində- Sabirabad, Dəvəçi, Şirvan, Hacıqabul, Xaçmaz, Xırdalan, Göyçay, Gəncə, Yevlaxda həftəlik çərçivəsində nümayiş olunan «Hökmdarın taleyi» (rejissor Ramiz Fətəliyev), «Qala» (rejissor Şamil Nəcəfzadə), «40-cı qapı» (rejissoru Elçin Musaoğlu), «Günaydın mələyim» (rejissor Oqtay Mirqasımov), “Məhkumlar” (rejissor Mehriban Ələkbərzadə) filminin baxışına da axın olub: «İşin yüksək səviyyədə təşkili də həftəliyin bölgələrdə uğurla davam etməsində böyük rol oynadı. Biz həftəlik öncəsi bölgə sakinlərinə nəfis tərtibatla hazırlanmış dəvətnamə və afişalar paylamışdıq ki, tamaşaçılar bu diqqətdən çox sevinmişdilər. Müşahidələrimiz göstərdi ki, bölgə tamaşaçıları milli filmlərimizin nümayişini çoxdan gözləyirmiş. Hətta insanlar filmləri izləməyə ailəvi şəkildə gəliblər». Mədəniyyət və Turizm Nazirliyinin «Bu meydan, bu ekran» layihəsi əsasında gənc rejissorların məhsulu olan qısametrajlı bədii filmlərdən bir neçəsi - Mədəniyyət və İncəsənət Universitetində «Ev», «Bir addım», «Qanadlara sığal çəkənlər», «Nəfəs», İki», «Qocalar» filmləri nümayiş etdirilib. Qeyd edək ki, həmin filmlər müxtəlif kinoşirkətlər-«Dərviş», «İmperQrup»da istehsal olunub. Eyni zamanda, film müəllifləri ilə görüşlər təşkil olunub. A.Sultanzadənin sözlərinə görə, filmlərin nümayişindən sonra baş tutan görüşdə kinosevərlərlə müəlliflər arasında fikir mübadiləsi aparılıb, tamaşaçıların sualları cavablandırılıb: «Görüş iştirakçılarının ürəyi dolu idi. Filmlər, çəkiliş məkanları barədə suallar verir, rejissorların gələcək fəaliyyətləri ilə maraqlanırdılar. Kino həftəliyi demək olar ki, kino bayramı kimi qeyd olundu. Arzu edərdik ki, bu filmlər yalnız həftəlik çərçivəsində göstərilməsin. Televiziyalarımız yeni istehsal olunmuş filmləri nümayiş etdirsinlər ki, geniş auditoriya baxa bilsin. Çünki bu filmlərə xalqın ehtiyacı var. Ümid edirik ki, belə də olacaq». «Salnamə” və “Yaddaş” sənədli filmlər studiyalarının işləri -“İçərişəhər”, “Əsrlərin daş yaddaşı”, “Azərbaycan xalçası”, “Azərbaycan motivləri” sənədli filmləri də elə dünən axşam tamaşaçıların ixtiyarına verilib. Kino Evində baş tutan mərasim «Sənədli filmlər axşamı» adı altında nümayiş olunub. Nümayişdə paytaxt sakinləri, eləcə də müxtəlif ali təhsil ocaqlarının tələbələri iştirak edib. Qeyd edək ki, Kino həftəliyi sabah yekunlaşacaq. Aprelin 10-da Müslüm Maqomayev adına Filarmoniyada «Ey həyat sən nə qəribəsən» sənədli filminin premyerası olacaq. Film məşhur «Qaya» kvartetinə həsr olunub.

Cəvahir SƏLİMQIZI

Mərkəz.- 2010.-9 aprel.- S. 11.