Bakıda Azərbaycan-İtaliya biznes forumu keçirilib

İtaliya Azərbaycan iqtisadiyyatının diversifikasiyasına yardım etmək niyyətindədir

Dünən Bakıda Azərbaycan İqtisadi İnkişaf Nazirliyi və Azərbaycanda İxracın və İnvestisiyaların Təşviqi Fondunun (Azpromo) təşkilatçılığı ilə Azərbaycan-İtaliya biznes forumu keçirilib.

Tədbirdə çıxış edən Azərbaycan iqtisadi inkişaf nazirinin müavini Niyazi Səfərov qeyd edib ki, 2009-cu ildə Azərbaycanda ÜDM-in artımı 9,3%, sənayenin inkişafı 12,8%, kənd təsərrüfatında 3,5% artım olub: “Bu ilin ilk rübündə isə ÜDM 5,4%, pərakəndə əmtəə dövriyyəsi 8,3%, əhalinin nominal gəlirləri isə 6,5% artıb. İndiyədək Azərbaycana 70 mlrd. ABŞ dolları həcmində investisiya yatırılıb ki, bunun da yarısından çoxunu xarici investisiyalar təşkil edir».

N. Səfərov bildirib ki, iki ölkə arasında ticarət dövriyyəsi 4 mlrd. ABŞ dolları olub: “Bunun 128 mln. dolları Azərbaycana idxal olunan malların, qalanı isə İtaliyaya ixrac olunan malların payına düşüb. Azərbaycanla İtaliyanın əsas məqsədi qeyri-neft sektorunun inkişaf etdirilməsidir ki, buna da böyük potensial var».

Tədbirdə çıxış edən İtaliyanın Azərbaycandakı səfiri Mario Baldini qeyd edib ki, İtaliya Azərbaycanın ilk tərəfdaşlarındandır.

APA-nın məlumatına görə, İtaliyanın iqtisadi inkişaf nazirinin müavini Adolfo Urso deyib ki, hazırda Azərbaycanda bir sıra İtaliya şirkətləri fəaliyyət göstərir ki, bunlar sənaye və tikinti sahələrinə aiddir: «Həmçinin, bir neçə İtaliya şirkəti Azərbaycanda hotellərin tikintisində iştirak edir. Daha bir neçə İtaliya şirkəti Azərbaycanla əməkdaşlıq etməyə maraq göstərir ki, bunlar da turizm, mebel və sənaye sahəsi ilə məşğul olan şirkətlərdir».

İtaliyanın Azərbaycan iqtisadiyyatının diversifikasiyasına yardım edəcəyini bildirən nazir müavini qeyd edib ki, İtaliya Azərbaycana kənd təsərrüfatı, yeyinti və turizm kimi sahələrdə yardım göstərə bilər: “Hazırda İtaliyada 4,3 mln. şirkət fəaliyyət göstərir ki, burada hər 11 nəfərə 1 şirkət düşür. Hər il İtaliyada 26 mlrd. avro dəyərində yeyinti məhsulu istehsal olunur”.

Xatırladaq ki, biznes-forumda 100-ə yaxın şirkət iştirak edir. Onlardan 40-ı İtaliya, qalanı isə Azərbaycan şirkətləridir. Tədbir çərçivəsində Azərbaycanla İtaliya arasında əməkdaşlığa dair sənəd də imzalanıb.

Mərkəz.- 2010.- 27 aprel.- S. 7.