«XX əsrdə tarix iki böyük şəxsiyyət yetişdirdi - ikisi də türk idi»

«Ankaraya gəlib «Anıt qəbri» ziyarət etməmək fikrimcə, özünü türk sayan hər kəs üçün ayıb sayılmalıdır». Bu sözləri «Anıt qəbir»də söhbətləşdiyim bir turist söyləsə də, şəxsən mən də bunu belə qəbul edirəm. Xəbər verdiyimiz kimi, dekabrın 21-22-də türkdilli ölkələrdən olan media nümayəndələrinin Ankarada forumu keçirildi. Toplantı Türkiyə Nazirlər Kabinetinin mətbuat xidmətinin təşəbbüsü ilə keçirilirdi. İki gün davam edən tədbir barədə «Mərkəz»in oxucuların tərəfimizdən məlumatlandırılıb. Xatırladım kı, biz sözügedən toplantıya Türkiyənin Azərbaycandakı səfirliyinin dəvəti və qəzetimizin maliyyə dəstəyi ilə qatılırdıq. Çünki tədbir barədə bizə son anda məlumat verilmişdi. Azərbaycandan dəvət olunan digər 23 media nümayəndəsinin isə bütün xərclərini Türkiyə Nazirlər Kabinetinin mətbuat xidməti öz üzərinə götürmüşdü. Nə isə… Bu şeylərin üzərində çox dayanmadan keçək əsas məsələyə.

Türkiyəyə səfərimiz digər həmkarlarımızın səfərindən iki gün öncə başladı. Odur kı, Türkiyənin müxtəlif şəhərlərində olub çox önəmli görüşlərə qatıldıq. Bütün bunlar barədə növbəti saylarımızda ətraflı məlumat verəcəyik. Bu gün müasir Türkiyənin qurucusu, türklərin dediyi kimi «yoxdan nəhəng bir dövlət quran», Avropanın və dünyanın bir çox tanınmış insanlarının özünə örnək saydığ Mustafa Kamal Atatürkün «Anıt qəbrini» ziyarət etdik.

«Anıt qəbir»ə bizi MHP-dən olan Balıkesir millət vəkili Ahmet Duran Buludun yardımçısı Mustafa cumbul deputatın şəxsi maşını ilə apardı. Onu da qeyd edim ki, gələn saylarımızda Ahmet Duran Buluddan aldığım maraqlı müsahibəni və TBMM binasında olarkən gördüyüm maraqlı hadisələri nəql edəcəm.

«Anıt qəbir»ə bir az qalmış bizi mühafizəçilər saxladılar. Maşını xeyli aralıda saxlamağımızı istədilər. Mustafa bəy onlara bizim Azərbaycandan gəldiyimizi, mətbuat nümayəndəsi olduğumuzu söylədi. Bundan sonra maşın əraziyə buraxıldı. Onu da söyləyim ki, bizimlə bərabər ziyarətə Türkiyənin ünlü köşə yazarlarından biri Ahmet Börek də getmişdi.

Ziyarətə gələnlərin çoxunun turistlər olduğu ilk andaca hiss olunurdu. Hər kəs böyük şəxsiyyətin məzarı qarşısında şəkil çəkdirir, Atatürkü xatırladan, əşyaları saxlanılan muzeyi maraqla gəzirdilər. Onu da qeyd edək ki, Atatürkün şəxsi əşyaları saxlanılan müzeydə şəkil çəkdirmək qadağandır. Amma həmkarımız Ahmet Börek sayəsində biz şəkil çəkdirə bildik. Bundan sonra yaxınlıqda Atatürkü xatırladan hədiyyələr satılan dükana girdik. Oradan qəzetimiz və özümüz üçün tarixi hədiyyələr aldıq. Çıxarkən bəzi ziyarətçilərlə söhbətləşdik. Yaponiyadan gəlmiş bir xanım bizə Atatürkün həyatı ilə bağlı maraqlı bir yazı oxuduğunu, məhz bundan sonra Türkiyəyə gəldiyini söylədi. Belə bir şəxsiyyətin doğulub-böyüdüyü yerləri gəlib görməyi özümə borc bildim dedi. İtaliyadan gələn turistlər də bu böyük şəxsiyyətlə bağlı maraqlı fikirlər söylədilər. Burada daha bir həmkarımızla da qarşılaşdıq. Nərgiz Həkimoğlu da 6 yaşlı qızı Nəsrinlə Atanı ziyarətə gəlmişdi. Bizə bildirdi ki, mütəmadi olaraq buraya gəlir və övladını da özü ilə gətirir. Bəzi gənclərlə də söhbətləşib xoş söylər eşitdik. Əslində əvvəlki zamanlar olsaydı buna təəssüflənməzdik, amma son zamanlar Türkiyədə bəzi təriqətlərin güclənməsi, bəzi gənclərin Atatürkə baxışında müəyyən dəyişikliklər edib. Bunu Türkiyədə görüşdüyümüz və söhbətləşdiyimiz əksər tanınmış insanlar da təsdiqlədilər. Amma sevindirici haldır ki, sağlam düşüncəli gənclik kimin nə etməsindən asılı olmayaraq, öz liderinə və onun ideyalarına sadiq qalır. Burada olarkən bir şeyi də öyrəndim. Sən demə, Mustafa Kamal Atatürk bizlərin hər zaman ziyarət etdiyimiz yerdə deyil, bir az aralıda dövlət və hökumət başçılarının ziyarət etdiyi yerdə dəfn olunubmuş. Və bütün Türkiyə xalqı da bunu bilir. Amma hər şeyə rəğmən bu böyük insanın anıt qəbrini ziyarət etməyi özünə borc bilir. Bu isə o deməkdir ki, heç bir şey ona olan sevgini insanların qəlbindən çıxara bilməz.

Biz də qəlbimizdə Atatürk sevgisi o müqəddəs yeri tərk etdik. Geri dönərkən Ahmet Börekin bir sözü məni daha da qürurlandırdı. Dəyərli həmkarımız söylədi ki, ötən əsrdə tarix iki böyük şəxsiyyət yetişdirdi: «Atatürk və Heydər Əliyev. Çox xoşbəxtik ki, onların ikisi də türk xalqının oğlu idi. Və ikisi də yoxdan möhtəşəm bir dövlət qurdular. İkisi də elə bir dönəmdə xalqın dadına çatdı ki, o zaman həm xarici, həm də içəridəki xain qüvvələr dövləti parçalamaq istəyirdi. Bizlər belə şəxsiyyətlərimizlə hər zaman qürur duymalı və övladlarımıza da bunu aşılamalıyıq. Bizim yerimizdə olmaq istəyən çox millətlər var ki, hələ də tarixlərində bu cür dahi, şərəfli insanlarının olmasını arzulayırlar».

Nigar Almanqızı, Ankara

Mərkəz.- 2010.- 24 dekabr.- S. 10.