Supermahnı, superklip…

Mübariz Tağıyev: «Yaxşı olardı ki, mahnıda estrada ladı hiss olunsun, milli ruhun hiss olunması çox vacibdir»

Eldar Quliyev: «Əla, çox gözəl mahnı və gözəl də klipdir»

Azərbaycanı "Eurovision-2010" mahnı müsabiqəsində təmsil edəcək Səfurə Əlizadənin ifa etdiyi "Drip drop" mahnısına çəkilən klipin təqdimatı keçirilib.

Klip ilk dəfə olaraq İctimai Televiziyada (İTV) göstərilib. Klip artıq İTV-nin rəsmi internet saytında da yerləşdirilib. Ukraynada çəkilişləri aparılan bu klipdə dünyanın ən tanınmış mütəxəssisləri iştirak edib. "Drip drop" mahnısının müəllifləri isveçli Anders Bagge, Stefan Örn və Sandra Bjurmandır. Tanınmış prodüser Niklas Flikt isə bu mahnını aranjeman edib və mahnının prodüseridir. Klipin rejissoru Rubert Ueynaryt, Səfurə Əlizadənin xoreoqrafı JaGuel Nayt, stilisti və obrazı üzərində işləyən isə Tanya cilldir. Hər üç peşəkar S.Əlizadənin klip çəkilişi və hazırlığı üçün İTV, "Euromedia" və "Luxen Group of companies" tərəfindən dəvət olunublar. Klipin çəkilişi ümumilikdə 37 saat davam edib. Klip mahnının adından da məlum olduğu kimi su damcısının göstərişi ilə başlayır. Klipin süjeti qarşılıqsız sevgi üzərində qurulub. Bütün xoreoqrafiya nömrəsində də bu amil əsas götürülüb. Burada həm modern, həm də urban üslubda rəqslərə üstünlük verilib. Klipdə Səfurə Əlizadəni ukraynalı rəqqaslar müşayiət edib. Təmsilçimiz iki geyimdən istifadə edib. Təqdim olunan klipi mütəxəssislər də yüksək qiymətləndirib, onun beynəlxalq standartlara uyğun çəkildiyini qeyd ediblər. Klipin yaxın müddətdə bir sıra ölkələrin telekanallarında da nümayişi nəzərdə tutulur. Qeyd edək ki, Azərbaycanın təmsilçisi Səfurə Əlizadə "Eurovision-2010" mahnı müsabiqəsinin mayın 27-də keçiriləcək II yarımfinalında çıxış edəcək. Xeyirli-uğurlu olsun, amma gəlin görək mahnı və klip peşəkarlarımızın zövqünü oxşayıbmı?

Yaxşı olardı ki…

Xalq artisti Mübariz Tağıyev klipi izləməsə də, mahnını eşitdiyini söylədi. Müğənni mahnıda estrada ladlarının olmamasından təəssüfləndi, amma: «Yaxşı olardı ki, mahnıda estrada ladı hiss olunsun, çünki mötəbər bir yarışmada milli ruhun hiss olunması çox vacibdir. Onsuz da avropalıları Avropa musiqisi ilə təəccübləndirmək mümkünsüzdür. Ancaq mahnıda bu ladları görmədik, çox heyif. Axı heç bizimkilər, şəxsən mənim özüm o mahnı seçimində olmadığımdan bu barədə danışmağımız da yersizdir. İş-işdən keçib, amma bizə qalır Səfurəni dəstəkləmək».

Xalq artisti bir şeyə də təəssüfləndiyini söylədi. Dediyinə görə, Səfurədə milli boğazların olmasından da istifadə edilməyib. Buna görə də bəzi məqamlarda heç o qızı da qınamağa dəyməz; nə veriblər, onu da oxuyur. Amma bütün bunlara rəğmən, Mübariz Tağıyev mahnının beynəlxalq müsabiqədə uğur qazanacağına ümid edir: «Vallah, indi zəmanə dəyişib, cavanlar yaşlı müğənnilərin oxuduqlarını bəyənmir, adımızı «köhnəlmişlər» qoyublar. Buna görə də Avropa mahnılarını dinləyib, qiymətləndirirlər. Səfurəyə gəlincə də öz yetirməmizdir, mən ondan yalnız uğurlar gözləyirəm. O, öz performansı ilə müsabiqədə qələbəni təmin edəcək, Azərbaycanın adını ucaldacaq, bizə də elə bu lazımdır».

Mükəmməl…

Mübariz Tağıyevdən fərqli olaraq bəstəkar Vüqar camalzadə mahnını da bəyəndiyini deyir, klipi də. Onun fikrincə, dünya arenasına çıxmaq üçün heç də milli estrada ladlarından istifadə etməyə ehtiyac yoxdur: «Eurovision» Avropa musiqi yarışmasıdır, burda da Səfurənin oxuduğu mahnı yüksək uğur qazana bilər. Çünki avropalıların zövqünə, tələbinə cavab verə biləcək mahnıdır. Klipə də baxdım, super. Avropa dinləyicilərinin qəbul edəcəyi bir klipdir. Sağ olsunlar, mükəmməl səviyyədə çəkiblər. İnanıram ki, Səfurənin ifası, səsi və ümumilikdə xarici görünüşü bizə qələbəni qazandıracaq».

Vüqar camalzadə onu da əlavə etdi ki, növbəti iştirakımızda «Eurovision» mütləq Azərbaycana gətiriləcək.

Gözəl səs, gözəl qız

Bəstəkar, xalq artisti Eldar Mansurov da mahnı və kliplə bağlı yalnız xoş sözlər söylədi. Əvvəlki açıqlamalarında milli ladların vacib olduğunu önə çəkən bəstəkar nədənsə, bu mövzunu təzələmədi. Səfurənin ifasında eşitdiyi mahnının və çəkilən klipin Azərbaycana uğur gətirəcəyini proqnozlaşdırdı: «Əla, çox gözəl mahnı və gözəl də klipdir. Durub bu mahnıda milli ruh axtarmağa dəyməz. Avropaya elə avropasayağı mahnıyla getməliyik əslində. Ona görə ki, onların zövqünü oxşaya bilək. Səfurə də maşallah, gözəl müğənni olduğu kimi gözəl, cazibədar qızdır, bu da təbii ki, tamaşaçı simpatiyası baxımından ona uğur qazandıracaq. Səsi də ürəyə toxunandır. Gəlin, hamılıqla ona dəstək olaq, çünki Azərbaycan adına xidmət edir». E.Mansurov Səfurənin ifası nəticəsində Azərbaycanın öncül sıralardan birini tutacağına da əmindir.

Mərkəz.- 2010.- 1 may.- S. 11.