Xocalı faciəsi insanlığa qarşı törədilmiş cinayət kimi tanındı

Tacikistanın paytaxtı Düşənbədə keçirilən İslam Konfransı Təşkilatı Xarici İşlər Nazirləri Şurasının (İKT XİNŞ) 37-ci sessiyasının dünən keçirilən yekun iclasında Dialoq və Əməkdaşlıq uğrunda İslam Konfransı Gənclər Forumunun (İKGF) fəaliyyəti haqqında qətnamə qəbul edilib. Bu barədə «Mərkəz»ə İKT Gənclər Forumunun mətbuat xidmətindən məlumat verilib. Sözügedən qətnamə xüsusi bəndlə İKT-yə üzv dövlətləri və həmçinin İKT-yə bağlı beynəlxalq institutları «Xocalıya ədalət» kampaniyasının fəaliyyətində aktiv iştiraka və Xocalı faciəsinin həm beynəlxalq, həm də milli səviyyədə «insanlığa qarşı törədilmiş cinayət» kimi tanınmasına çağırıb. Düşənbədə İKT XİNŞ sessiyasında iştirak edən forumun nümayəndə heyətinə başçılıq edən İKGF baş katibi, səfir Elşad İsgəndərov bildirib ki, sənəddə forumun fəaliyyətinə və xüsusilə ISEScO ilə bərabər aparılan «İKT ölkələrində XX əsrdə törədilmiş humanitar faciələr» proqramının həyata keçirilməsinə yüksək qiymət verilib. Qətnamə həmçinin üzv dövlətləri İKGF-nin mədəniyyətlərarası dialoq üzrə baş koordinatoru Leyla Əliyevanın təşəbbüsü ilə irəli sürülən və Xocalı faciəsi haqqında dünya ictimaiyyətinin düzgün və obyektiv məlumatlandırılması məqsədi daşıyan «Xocalıya ədalət» beynəlxalq məlumat və təşviqat kampaniyasına dəstək verməyə çağırır.

E.İsgəndərov sözügedən sənədi şərh edərkən bildirib ki, bu, BMT-dən sonra ikinci böyük beynəlxalq təşkilat olan İKT-yə üzv olan 57 dövlətin xarici siyasət rəhbərlərinin hadisənin miqyasının təyin edilməsi baxımından «insanlığa qarşı törədilmiş cinayət» ifadəsini istifadə edərək, Xocalı faciəsinin xarakteri haqqında birmənalı olaraq mövqe bildirdikləri ilk qətnamədir: «Qeyd olunan ifadə həm siyasi, həm də beynəlxalq-hüquqi tərkibə malikdir və beynəlxalq humanitar hüququn bir çox ciddi pozuntularını, o cümlədən genosid cinayətini əhatə edir». E.İsgəndərov həmçinin qeyd edib ki, sənədin konsensusla qəbul edilməsi və həmçinin buna qədər üzv ölkələrin XİN ekspertləri tərəfindən təsdiq edilməsi İKT-nin Xocalı faciəsinin həqiqi xarakteri haqqında əminliyinin güclənməsinin göstəricisidir: «Bu sənəd Xocalı faciəsinə cari ilin yanvar ayında İKT Parlamentlər İttifaqı tərəfindən verilən qiyməti təkrarlayır və ümumilikdə Xocalıdakı qətliamının İKT-yə üzv dövlətlərin parlamentləri tərəfindən insanlığa qarşı törədilmiş cinayət kimi tanınması və eləcə də tanınma haqda məsələnin beynəlxalq səviyyəyə qaldırılması üçün ciddi siyasi-hüquqi zəmin hazırlayır. 57 üzv dövlətin belə mövqeyinin formalaşmasında «Xocalıya ədalət» kampaniyası böyük rol oynayıb. Qətnamədə kampaniyanın fəaliyyətinə yüksək qiymət verilmiş və üzv dövlətlər onun həyata keçirilməsində aktiv iştirak etməyə çağırılıblar».

Xatırladırıq ki, «Xocalıya ədalət» kampaniyasına 2009-cu ildə beynəlxalq səviyyədə start verilib və hal-hazırda kampaniyanın fəaliyyəti 35-dən artıq İKT və həmçinin Avropa və Latın Amerika ölkəsini əhatə edir.

Səxavət HƏMİD

Mərkəz.- 2010.- 21 may.- S. 4.