Dünya teatr xadimləri Bakıda…

Fuad Poladov: «Beynəlxalq Teatr Konfransının respublikanın birinci teatrında reallaşması yaradıcı insanların qarşısında böyük vəzifələr qoyur»

Xəbər verdiyimiz kimi, noyabrın 7-dən (7-12 noyabr tarixlərində) Bakıda Beynəlxalq Teatr Konfransına start verilib. Konfrans Prezident İlham Əliyevin 18 may 2009-cu il tarixli Sərəncamı ilə “Azərbaycan teatrı 2009-2019-cu illərdə” Dövlət Proqramı çərçivəsində reallaşıb. Qeyd edək ki, sözügedən proqramda Mədəniyyət və Turizm Nazirliyi, Milli Elmlər Akademiyası və Azərbaycan Teatr Xadimləri İttifaqına müasir dövrün teatr problemlərinə həsr olunmuş beynəlxalq elmi-praktik konfransın keçirilməsi həvalə olunub. Konfransda Avropa, Asiya və Amerika qitələrinin tanınmış teatr mütəxəssisləri, rejissor və dramaturqlar, kulturoloqlar iştirak edir.

Azərbaycanda ilk dəfə keçirilən Beynəlxalq elmi-praktik konfransın dəvətliləri sırasında ABŞ, Kanada, Türkiyə, İngiltərə, Fransa, Almaniya, Gürcüstan, Rusiya, Belorus, Estoniya, Özbəkistan, Tacikistan, Qazaxıstan, Qırğızıstan, Ukrayna, Moldova, Avstriya, Yunanıstan, Koreya, Tunis, Oman, Çernoqoriya, Çin, Səudiyyə Ərəbistanı, İran, Sinqapur, Küveyt kimi ölkələrdən tanınmış teatr simaları var. Belə ki, YUNESKO yanında Beynəlxalq Teatr İnstitutunun İngiltərə nümayəndəliyinin rəhbəri Mevil Şurman, Çin Xalq Respublikasının Teatr Elmi Tədqiqatları Akademiyasının rəhbəri Lin Çin, Kanada Beynəlxalq Teatr Tənqidçiləri Assosiasiyasının katibi Mişel Vayis, “Azerbaijan international” jurnalının baş redaktoru Betti Bleyer, Peterburq Teatr Akademiyasının professoru, “Beş axşam” Beynəlxalq Teatr Festivalının rəhbəri Mariya Dmitrevskaya, Beynəlxalq Teatr İnstitutunun ərəb ölkələri koordinatoru İbrahim Assiri və institutun Amerika üzrə katibi Piter Qoltfrat Bakıya konfransda iştirak etmək üçün təşrif buyurub. Onu da xatırladaq ki, Dövlət Proqramında belə elmi-praktik konfransların mütəmadi, daha dəqiq desək, 2 ildən bir keçirilməsi nəzərdə tutulub. Elmi-praktik konfrans çərçivəsində tanınmış teatr xadimlərinin ustad dərslərinin və treninqlərin keçirilməsi planlaşdırılır.

«Sistemli şəkildə beynəlxalq miqyaslı mədəniyyət tədbirlərinin keçirilməsi dövlət başçısı İlham Əliyev və onun xanımı Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevanın qayğısının nəticəsidir. Elə bu konfrans da Prezident İlham Əliyevin 18 may 2009-cu il tarixli Sərəncamı ilə “Azərbaycan teatrı 2009-2019-cu illərdə” Dövlət Proqramı çərçivəsində reallaşıb. Sözügedən proqramda Mədəniyyət və Turizm Nazirliyi, Milli Elmlər Akademiyası və Azərbaycan Teatr Xadimləri İttifaqına müasir dövrün teatr problemlərinə həsr olunmuş beynəlxalq elimi-praktik konfransın keçirilməsi həvalə olunub. Buna görə, ilk növbədə, hər iki mədəniyyət hamisinə minnətdarlıq düşür. Mən deyərdim ki, növbəti beynəlxalq teatr konfransı da ölkə başçısının sayəsində reallaşan çox böyük hadisədir», - deyə fikirlərini qəzetimizlə paylaşan Milli Məclisin Mədəniyyət Komitəsinin sədri, millət vəkili Nizami Cəfərov Azərbacanda keçirilən Beynəlxalq Teatr Konfransını yüksək qiymətləndirdi. N. Cəfərovun sözlərinə görə, belə bir nüfuzlu tədbirin baş tutması Azərbaycanın beynəlxalq arenada tanınmasına xidmət edir: «Biz dünya mədəniyyətinə inteqrasiya edirik. Odur ki, mədəniyyət tədbirlərinin mütəmadi olaraq keçirilməsi həm də dövlət siyasətinin tərkib hissəsidir. Hesab edirəm ki, ölkəmizdə ilk dəfədir ki, keçirilən Beynəlxalq Teatr Konfransı teatrımızı ölkə xaricində təmsil və təbliğinə xidmət edir. Eyni zamanda, mədəniyyətlərarası təmas yaranır, bunu sözün əsl mənasında hadisə adlandırmaq olar».

Azərbaycanda ilk dəfə belə bir mötəbər teatr konfransının keçirilməsini alqışlamaq olar, olduqca yüksək səviyyəli bir beynəlxalq tədbirdir», - deyən xalq artisti Fuad Poladov konfransın əlamətdarlığını bir hadisə ilə də əlaqələndirdi: «Konfrans təmirdən yenicə çıxmış, hələ tamaşaçı üzü görməmiş Akademik Milli Dram Teatrında öz işinə başlayıb ki, beynəlxalq tədbiri həm də buna görə əlamətdar hadisə kimi qiymətləndirmək olar. Beynəlxalq Teatr Konfransının respublikanın birinci teatrında reallaşması yaradıcı insanların qarşısında böyük vəzifələr qoyur».

Cəvahir Səlimqızı

Mərkəz.- 2010.- 11 noyabr.- S. 9.