Qocalmamışam ki?

«Deputat olsalar da, Milli Məclisdə özlərini yaxşı aparmalıdırlar»

Artıq 26-cı dəfədir ki, parlamentarilərimizin «Hesabat»ını diqqətinizə çatdırırıq. Bu dəfə isə 32 saylı Suraxanı üçüncü seçki dairəsindən millət vəkili seçilmiş Ağacan Abıyevin beşillik deputatlıq fəaliyyətiylə bağlı sizə məlum olan və olmayan məqamlarını açmağa çalışacağıq.

- Ağacan müəllim, geridə qalan beşillik deputatlıq fəaliyyətinizi necə dəyərləndirirsiniz?

- Mən geridə qalan beş ildə parlamentin iki orqanında - İntizam Komissiyasında və Elm və Təhsil Komitəsində işləmişəm. İlk illərdə rəhbərlik etdiyim İntizam Komissiyası ilə bağlı bir hadisə baş vermişdi. Daha doğrusu, Hüseyn Abdullayevlə Fəzail Ağamalı arasında baş verən insidentə komissiyada vaxtında lazımi qiymət verildi. Bundan sonra analoji hal təkrarlanmadı. Deputatlar başa düşdü ki, deputat olsalar da, Milli Məclisdə özlərini yaxşı aparmalıdırlar.

Elm və Təhsil Komitəsindəki fəaliyyətimə gəlincə, üç-dörd il idi ki, Təhsil Qanunu müzakirə olunsa da, qəbul olunmurdu və nəhayət, ötən il bu baş verdi. Həmin qanunun hazırlanmasında və qəbul olunmasında mənim də əməyim olub. Sözsüz ki, qanunun qəbul olunmasında əsas yük komitə sədri Şəmsəddin Hacıyevin üzərinə düşmüşdü.

Bundan başqa, bu müddət ərzində seçildiyim 32 saylı Suraxanı üçüncü seçki dairəsində bir sıra görüşlərimiz olub. Edilən müraciətlərin bir çoxunu şəxsən, qalanlarını isə dövlət qurumlarının vasitəsiylə həll etmişəm. Etiraf edim ki, olunan müraciətlərin hamısını həll edə bilməmişəm və bu mümkün də deyil.

- Məsələn, hansı müraciətlər?

- Gəlib deyirlər ki, evim yoxdur. Axı mən ona necə ev verim? İşi olmayana iş tapmaq olur. Yaxud da kimisə işdən qovublar. Məsələn, bir də görürsən ki, 65 yaşlı insan gəlib iş axtarır. 30 yaşlı cavan oğlan iş tapa bilmirsə, 65 yaşlı təqaüdçüyə mən işi haradan tapım? Amma bir-iki dəfə yaşlı insanları rektoru olduğum akademiyaya qarovulçu kimi işə düzəltmişəm. Məhkəmələrlə bağlı da müraciətlər olur ki, bizim onların işinə qarışmağa səlahiyyətimiz çatmır.

- Seçicilərinizlə tez-tez görüşürsünüz?

- Ayda bir dəfə, yaxud iki aydan bir görüşürük. İcra başçısının görüşlərində, rayon tədbirlərində də iştirak edirik.

- İndiyə kimi ən yaddaqalan müraciət hansı olub?

- Məsələn, bir nəfər seçicim mənə qəzet gətirib, şəkil göstərir ki, filan yerlərdə müharibədə olmuşam. Bu adam 90-cı illərdə gedən müharibədə əlil olub. Deyir ki, təqaüdüm azdır. Ona bildirdim ki, müraciət etmisənsə, özüm sənə maddi kömək edərəm, amma qanun var, ondan qırağa çıxa bilmərik.

- Sorğu göndərdiyiniz hansı dövlət qurumu sizə cavab verməyib?

- Məndə dörd nömrəli hökumət telefonu var. Ona görə də lazım olanda birbaşa nazirin telefonunu yığıram. Həmin nömrəni nazirdən başqa heç kimin götürməyə ixtiyarı yoxdur. Bir nəfər gəldi ki, dövlət qulluğunda işləmişəm və işdən çıxmışam, yenidən düzəlmək istəyirəm. Əmək və əhalinin sosial müdaifəsi naziri Füzuli Ələkbərova və nəqliyyat naziri Ziya Məmmədova zəng elədim.

- Özü cavab verdi?

- Əlbəttə. Ziya Məmmədovla Milli Olimpiya Komitəsində də bir yerdəyik. Yenə də deyirəm ki, bu telefon birbaşa prezidentlə əlaqəli olduğundan özləri tez cavab verirlər. Çünki zəng edən ölkə başçısı da ola bilər.

- Bu telefon səyyardırmı?

- Xeyr. Ancaq iş otağında olur. Onu demək istəyirəm ki, indi bir çox sahələrdə, o cümlədən dövlət qulluğunda imtahan olduğundan tapşırıqla işə girmək mümkün deyil.

- Hansısa seçicinizə pul şəklində maddi yardım göstərmisiniz?

- Çox. Mən ad çəksəm onlar üçün xoş olmaz. Gəlirlər ki, anam xəstədir, oğlumun toyudur və s. Belələrinə əl tuturam. Bundan başqa, hansı seçicim toyuna dəvət edirsə, gedirəm. Gedə bilməyəndə də həyat yoldaşım gedib pul yazdırır.

- Seçicilərinizin toyuna nə qədər pul yazdırırsınız?

- Orta hesabla 4-5 yüz manat yazdırıram.

- Sürücünüz var?

- Var. Amma əvvəl özüm sürmüşəm. Toylara gedəndə özüm sürürəm. Çünki orada böyümüşəm və seçicilərin yarısıyla dostam.

- Mətbuatı izləyirsinizimi?

- Rəsmi qəzetləri oxuyuram. Digər qəzetlərə də baxıram. Bir gün bir jurnalist gəlib ki, bizə sizin haqqınızda tənqidi məktub gəlib, çap edək? Dedim ki, məktub gəlibsə, çap elə də. Deyirəm bu Üzeyir Hacıbəyov nə qədər uzaqgörən adam imiş. Çünki millət heç dəyişməyib. Allah Sabirə rəhmət eləsin! Onun da dedikləri bu günümüzün reallığıdır.

- Bəzi deputatlar məvaciblərinin azlığından gileylənirlər, 5-8 min manat olmasını istəyirlər. Sizin bu barədə fikriniz necədir?

- Axı gərək, o, 8 minlik iş görsün də. Hesab edirəm ki, deputat adına görə böyük məvacib vermək doğru deyil. 2 min manat lap yaxşı məvacibdir. Əgər camaat 80-90 manat pensiya alırsa, deputat 5 min alanda nə deyərlər? Bu düz deyil axı. Özlərini Amerika, Almaniya ilə müqayisə edirlərsə, bu ölkələrdə adi təqaüdçü 2 min avro alır. Onlarda işsizlik müavinəti min manatdır. Avropada deputat 10 min alanda, fəhlə də heç olmasa, 3-4 min alır.

- Parlamentdə ən yaxın dostunuz kimdir?

- Əhməd Vəliyevlə bir partada otururuq. Həmçinin Aqil Abbas, Ziyad Səmədzadə, Əli Əhmədovla dostuq.

- Dediklərinizin əksəriyyəti nisbətən yaşlı deputatlardır…

- cavanlarla da da aram yaxşıdır. Fuad Muradov, Adil Əliyev, Eyvaz Qurbanov, Rauf Əliyevlə deputatlıqdan əlavə də tanışlığım var. Mənim onlara, onlarınsa bir ağsaqqal kimi mənə böyük hörmətləri var.

- İntizam Komissiyasının sədri kimi necə hesab edirsiniz, deputatlarımız intizamlıdırlarmı?

- Bir-iki nəfəri çıxmaq şərtiylə intizamlıdırlar. Onlar isə müxalifət deputatlarıdır. Daha doğrusu, Pənah Hüseyndir. Pənah onların lideridir və hamısının adından danışır. O, hiss eləmir ki, parlamentin binasındadır. İclaslarda hərdən qonaqlar da iştirak edir. Sədrlə bəzən elə mübahisə edir ki, sanki özünə imic yaradır. Ona görə də bir-iki iclasda səsini kəsiblər.

- Bəs idmançı kimi necə, fiziki baxımdan, qüvvə mənasında hansı həmkarlarınız daha üstündür?

- İdman insan bədənində nizam-intizam yaradır. Mən bir dəfə dedim ki, arzu edirəm alimlərimiz hərdənbir idmanla, idmançılarımız isə elmlə məşğul olsunlar. İdman komplekslərimiz var və deputatlar orada idmanla məşğul ola bilərlər. Hətta bəzilərinin şəxsi idman kompleksləri var. Ümumən deyə bilərəm ki, deputatlarımız çox sağlamdırlar. Məsələn, Ziyad Səmədzadə gözəl futbolçudur. Asim Mollazadə vaxtilə yaxşı futbolçu olub. Adil Əliyev güclü idmançıdır. İqbal Ağazadə də sağlam adamdır. İqbal haqda bir şeyi də deyim ki, intizamlıdır, danışığını bilir.

- Bəzi həmkarlarınız parlamentə velosipedlə gedə biləcəklərini bildiriblər. Bəs siz necə?

- Bu bizim mentalitetə uyğun deyil. Alınmaz. Ümumiyyətlə, bizdə belə şeylərə pis baxırlar. 50-ci illərdə qardaşımla idmanla məşğul olurduq, kross qaçırdıq. Qonşular baxıb deyirdi ki, Qulamın (atasının adıdır-İ.V) dəliləri yenə qaçır.

- Bəzi deputatlar, o cümlədən də siz eyni vaxtda bir neçə vəzifədə çalışırsınız…

- Çətindir. Elə vaxt olur ki, evə 11-in yarısında gedirəm.

- Bu işin keyfiyyətinə təsir göstərmir ki?

- Xeyr. Mən gözümü açandan heç vaxt bir işdə işləməmişəm. O vaxt İdman İnstitutunun tələbəsiydim, boks yığmasının üzvüydüm və eyni zamanda, Suraxanıda uşaq və gənclər məktəbində məşqçiydim. Həmin vaxt 20 yaşım var idi. 1961-ci ildə Politexnik İnstitutuna girdim və eyni zamanda, idmançı və məşqçi kimi fəaliyyətimi davam etdirirdim. Yığmanın kapitanıydım, yaxşı nəticələr göstərirdim. Politexnik İnstitutunda 10 min tələbə var idi və yalnız mən «Lenin» təqaüdçüsü olmuşam. Bunun üçün əlaçı olmaq lazım idi. Mən məşqçi olanda tanınmış boksçumuz Ağalarov idmançılara deyirdi ki, bir balaca boyu var, amma onun tələbələri sizi döyür. Yəni demək istəyirəm ki, indiyə kimi eyni vaxtda bir neçə yerdə çalışmışam və bu gördüyüm işin keyfiyyətinə mane olmayıb.

- Günorta yeməyini parlamentdə yeyirsiniz?

- Yox. Evdən gətirirlər, burada yeyirəm. Elə də olur ki, bir nəfər gəlir, yeyə-yeyə oturub söhbətimizi də edirik.

- Yenidən namizəd olacaqsınızmı?

- Partiya «hə» desə, namizədliyimi verəcəyəm.

- Bəs özünüz?

- Əlbəttə, fikrim var. Qocalmamışam ki?!

- Yaş buna imkan verəcəkmi?

- Mən vaxtında elə çətinliklərdən, elə yüklərin altından keçmişəm ki, bugünkü işim onun heç on faizi deyil.

İntiqam VALEHOĞLU

Mərkəz.- 2010.- 1 sentyabr.- S. 4.