Qələmə söz verəydim…

Repressiya illərinin günahsız qurbanı Mikayıl Müşfiqin qətlindən 72 il ötür.

Ölməz söz sərrafı 1937-ci ilin 5 iyununda - öz doğum günündə həbs edilib. Olmazın işgəncələr, günahsız dindirmələr nəticəsində məhvinə qərar verilib.

Nakam taleli şair Mikayıl Müşfiq 6 yanvar 1938-ci ildə sübh tezdən qətlə yetirilib. Amma həyatda poeziyasından başqa heç bir nişanəsi qalmayan şairi xalqın qəlbindən qoparmaq mümkun olmayıb.

Bu il Müşfiqsevərlər ədibin xatirəsini bir daha anmaq üçün Bakıdakı heykəlinin qarşısına toplaşdılar. Şairin ruhu yad edildi, dualar oxundu. Anım mərasimi Xızıda “Müşfiq ocağı”nda davam etdirildi. Tədbiri xalq yazıçısı Gülhüseyn Hüseynoğlu açaraq Müşfiq nisgilindən göz yaşları içində danışdı. Şairin ədəbiyyatımıza bəxş etdiyi bənzərsiz incilərdən söz açdı. Qətl günündə əməkdar müəllim, “Şöhrət” ordenli Ofelya Babayeva, şairlərdən Mahcamal, Oqtay, Rza, Günəş Hüseynli qiraət ustası Rüfət Əhmədov, rəssam Minayə Feyzullayeva, rayon məktəbliləri çıxış edərək xalqımızın Müşfiqə olan sevgisini vurğuladılar, şeirlər oxudular. Sənətşünaslıq namizədi Abasqulu Nəcəfzadə yeni çapdan çıxmış “Müşfiqin duyğu yarpaqları” kitabını və Cəfər Cabbarlının 110 illik yubileyinə hazırladığı “Nəğmələr” məcmuəsini Müşfiq muzeyinə hədiyyə etdi. Xızı rayon mədəniyyət və turizm şöbəsinin müdiri Sənan Talıbov şairin pərəstişkarlarına minnətdarlığını bildirdi. Sonda ehsan süfrəsi açıldı.

Mərkəz.- 2010.- 14 yanvar.- S. 15.