Soyqırımı abidəsinin dastanı

 

Aprelin 2-də Cəfər Cabbarlı adına İrəvan Dram Teatrının yaradıcı heyəti Türkiyə səfirliyində Beyləqan rayonunda inşa edilmiş soyqırımı abidəsinin xatirəsinə yazılmış əsəri tamaşaya qoyub. Bu barədə Mərkəzə İrəvan Dram Teatrının direktoru İftixar Piriyev məlumat verdi. O bildirdi ki, türk yazıçısı Zehni Papaqçının qələmə aldığı Soyqırımı abidəsinin dastanı əsəri Beyləqan Rayon İcra Hakimiyyətinin başçısı İlşad Əliyevin ideya müəllifliyi ilə yazılıb. Tamaşanı Türkiyə səfirliyində səhnələşdirdik. Tamaşa Beyləqan rayonundakı soyqırımı abidəsinin xatirəsinə yazılsa da, Azərbaycanın müstəqilliyinin bərpa edilməsinin 20 illiyinə həsr edilib. Tamaşada, əsasən, ermənilərin başımıza gətirdiyi soyqırımı hadisələri, onların necə partiyalanmağı, insanları məscidlərə necə doldurub yandırmaları, adamların kürəyinə samovarı necə bağlayıb sonra aşırdıqları, necə döydükləri göstərilib. Həmçinin, Mübariz İbrahimovun obrazı da yaradılıb. Biz tamaşanın sonunda göstərmişik ki, başımıza gələn bu hadisələrə baxmayaraq döyüşkən ruhumuzu saxlamışıq, torpaqlarımızı işğaldan azad etməyə gücümüz var mübarizəyə hazırıq. Yəni, tamaşa bu ruhda sona çatır. Düşünürəm ki, tamaşada soyqırımılarla yanaşı, qəhrəmanlıq obrazları tamaşaçılarda ruh yüksəkliyi yarada bildi.

Əsərin müəllifi Zehni Papaqçı isə tamaşa barəsində bunları dedi: Ötən il mənim Çanaqqalaya can verənlər əsərim var idi. Çanaqqala savaşında 3 minə qədər azərbaycanlı qardaşımız şəhid olub. Bu əsəri onların xatirəsinə yazmışdım. Bu əsər İstanbulda Manisada səhnələşdirilərkən aktyorlardan bəziləri İravan Dövlət Dram Teatrının sənətçiləri idi. Bu zaman İravan Dövlət Dram Teatrının direktoru hörmətli İftixar Piriyev çox təsirlənmişdi. O, mənə dedi ki, bir soyqırımı abidəsi inşa etmişik. Abidənin açılışı üçün bir əsər yazarsanmı? Mən soyqırımı abidəsinin xaritəsinə əfsanə olaraq Soyqırımı abidəsinin dastanı yazdım. Bir neçə yerdə tamaşaya qoyulduqdan sonra bu gün Türkiyənin Azərbaycandakı səfirliyində səhnələşdirildi. İstər digər yerlərdə, istərsə Türkiyə səfirliyində böyük coşqu ilə qarşılandı. Bu Azərbaycanda Türk milli ruhunu oyandıran bir tamaşadır. Mən burdan İravan Dövlət Dram Teatrının direktoru İftixar Piriyevə çox-çox təşəkkürümü bildirirəm. Çünki o, erməni silahına qarşı bir sənətsal savaş apardı.

 

 

Məhərrəm AĞALAROĞLU

 

Mərkəz.- 2011.- 5 aprel.- S. 3.