Əlibaba Məmmədovdan sərt xəbərdarlıq…

İki aydır start götürən Muğam Televiziya müsabiqəsi gərgin mübarizə şəraitində davam edir. Beynəlxalq Muğam Mərkəzində baş tutan müsabiqə hər həftə ustad sənətkarlardan birinin xatirəsinə ithaf olunur. Növbəti həftə görkəmli tarzən Bəhram Mənsurovun xatirəsinə həsr olunan yarışmada iştirakçılar Seyid Əbdülqasim Nəbati yaradıcılığına müraciət etdilər.

Müsabiqənin gedişatı ilə bağlı daha ətraflı münsiflər heyətinin üzvü, xalq artisti xanəndə Əlibaba Məmmədovdan məlumat almışıq.

Ustad sənətkar yarışmanın obyektiv şəraitdə davam etdiyini söylədi. Dediyinə görə, hər bir iştirakçı münsiflər heyəti tərəfindən layiqli və obyektiv qiymətini alır. Və bu qiymətin nəticəsi olaraq da hər dəfə bir iştirakçı yarışmanı tərk edir. Münsif üzvu yarışmanın hər həftəsinin bir sənətkara həsr olunmasının da böyük əhəmiyyət daşıdığını dilə gətirdi. Onun sözlərinə görə, həm sənətkarlar yad olunur, həm də iştirakçılar mükəmməl repertuara müraciət edirlər.

Münsif üzvü iştirakçılara tənqidi yanaşmanın da səbəblərini izah etdi: «Biz əgər bu gün iştirakçıların səhvini üzlərinə deməsək, sabah onlar yenidən eyni səhvi təkrarlayacaqlar. Buna görə də biz onların qüsurunu, nöqsanlarını üzlərinə deməliyik. Elə iştirakçılar var ki, tamaşaçı alqışından, təriflərdən başı gicəllənir, bu da ifalara öz təsirini göstərir. Məsələn, Kamilə çox istedadlı qızdır, amma son bir neçə çıxışı məni qane etmir. Düzdür, səsini, səhnə mədəniyyətini, potensialını və istedadını nəzərə alıb ona yüksək bal verdim. Amma özünə xəbərdarlıq etdim ki, əgər növbəti dəfə də belə zəif ifa nümayiş etdirsən, aşağı bal yazacağam».

Xalq artisti favoritinin kim olduğunu söyləmədi və bunu iştirakçılar arasında fərq qoymaması ilə izah etdi. Amma bununla belə, yarışmada çox istedadlı və layiqli ifaçıların olduğunu gizlətmədi.

Xanəndə müsabiqənin SMS-lə deyil, münsiflər heyətinin seçimi ilə müəyyənləşməsini də yüksək qiymətləndirdi. Belə olan halda, seçimin obyektiv şəraitdə keçəcəyini vurğuladı: «İştirakçılar arasında gözəl səs və fərqli ifa tərzinə malik, qəzəliyyatı mükəmməl bilən, musiqi duyumu yüksək olan uşaqlar çoxdur. Xalq da bunun şahidi olacaq. Ən layiqli iştirakçı qalib adını qazanacaq».

Ustad sənətkar, xalq artisti Əlibaba Məmmədov söhbətin sonunda qəzetimiz vasitəsilə belə bir möhtəşəm layihəni təşkil etdiyinə görə Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevaya öz dərin minnətdarlığını bildirdi: «Azərbaycanda muğam sənətinin YUNESKO səviyyəsində tanınması birbaşa Heydər Əliyev Fondunun prezidenti, birinci xanım Mehriban Əliyevanın xidmətidir. Onun sayəsində bu gün muğamımızın səsi Avropanın ali konsert salonlarından gəlir.

Azərbaycanda üçüncü dəfədir ki, belə bir müsabiqənin keçirilməsi layihəsi muğamın inkişafına xidmət edir. Biz istər bölgə, istərsə də paytaxtda «papaq altda» yatan istedadlı gənclərimizi üzə çıxarırırq. Məqsəd birdir, layiqliləri üzə çıxaraq ki, onlar da gələcəkdə Azərbayca muğam sənətini beynəlxalq miqyasda təmsil və təbliğ etsinlər».

Cəvahir SƏLİMQIZI

Mərkəz.-2011.- 16 aprel.- S.11.