Bakıda “Sərhədyanı turizmin inkişaf perspektivləri” mövzusunda beynəlxalq konfrans keçirilib

Şirvan Milli Parkı və Mahmudçala gölünə tur keçirilib

Mədəniyyət və Turizm Nazirliyi tərəfindən, Bakıda ilk dəfə olaraq “Sərhədyanı Turizmin İnkişaf Perspektivləri” mövzusunda beynəlxalq praktiki konfrans keçirilib.

Konfransda Azərbaycan ilə həmsərhəd 3 ölkənin (Gürcüstan, Rusiya və İran) nümayəndələri təmsil olunmuşdur. Konfransda iştirak edən dövlətlərin nümayəndə heyətində 1 nəfər turizm məsələləri üzrə dövlət təşkilatı, 1 nəfər turizm şirkəti və 1 nəfər də turizm təhsil müəssisəsini təmsil edib.

Sərhədyanı ölkələrdə turizm sahəsində əməkdaşlığın vacibliyini, mövcud təcrübələri və turist səfərlərinin artımını və bu sahədə gələcək perspektivləri nəzərə alaraq, konfransın əsas toxunduğu mövzular aşağıdakı məsələlər üzrə 3 hissəyə bölünüb:

Sərhədyanı turizm sahəsində dövlətlərarası əməkdaşlıq: mövcud vəziyyət və gələcək perspektivlər

Mədəniyyətlərarası əlaqələr və alternativ turizm növlərinin inkişafı: mövcud vəziyyət və gələcək perspektivlər

Ali təhsil məktəblərinin sərhədyanı turizm sahəsində əməkdaşlığı.

Mövcud vəziyyət və perspektivlər hər bir mövzu tətbiqi maraq kəsb edən çıxış və təqdimatlarla təmsil olunub. Bu sırada Türkiyənin Atatürk Universitetinin prezidenti, professor Hikmet Kocakın, Azərbaycan Turizm İnstitutunda baş müşavir, almaniyalı xanım Gila Altmanın, Gürcüstan Milli Turizm Agentliyinin İnkişaf İdarəsinin rəhbəri – xanım Rusudan Mamatsaşvilinin, Azərbaycan Marketinq Cəmiyyətinin İdarə Heyətinin sədri – cənab Rəhim Hüseynovun və digər iştirakçıların çox şaxəli çıxışlarını qeyd etmək lazımdır.

Bu əsas çıxışçılardan əlavə, konfransda Azərbaycanın bir sıra dövlət qurumları – Dövlət Sərhəd Xidməti, Dövlət Gömrük Komitəsi, AMEA, Mədəniyyət və İncəsənət İnstitutu, turizm şirkətləri və qeyri-hökumət təşkilatları təmsil olunub.

Konfransın sonunda, iştirakçılar bəyannamə qəbul edib, özlərinin və qurumlarının sərhədyanı turizmin inkişafına verdiyi önəmi və dəstəyi təsdiq etdilər. Eyni zamanda, turizmin müxtəlif növlərinin vacibliyini qeyd edərək, regional turizmin inkişafı mövzusunda konfransların ildə 1 dəfədən az olmamaq şərti ilə keçirilməsinə qərar veriblər.

Yeri gəlmişkən, “Azərbaycan Respublikasında 2011-ci ilin “Turizm ili” elan edilməsi ilə bağlı Tədbirlər Planı”nın 29-cu bəndində “Ölkəmizin milli parklarında və ona yaxın ərazilərdə “Bird Watching” turizm növü üzrə turların təşkili məqsədilə nazirliyin nümayəndəsinin, Azərbaycan Ornitoloji Cəmiyyətinin əməkdaşlarının, turizm şirkətlərinin və kütləvi informasiya vasitələri nümayəndələrinin iştirakı ilə Şirvan Milli Parkı və Mahmudçala gölü ərazilərində quşları müşahidə etmə (Bird Watching) marşrutu keçirilib. Ekskursiya Azərbaycan Ornitoloji Cəmiyyətinin sədri E.Sultanov tərəfindən aparıldı və turizm şirkətlərinin nümayəndələrinin böyük marağına səbəb olmuşdur. İnfoturun keçirilməsində əsas məqsəd yerli turizm şirkətlərinin ölkəmizdə bu turizm növünün potensialı haqqında geniş məlumat əldə etməsidir. Eyni zamanda, layihənin həyata keçirilməsi nəticəsində iştirakçılar Şirvan Milli Parkı və Mahmudçala gölü ərazilərində quşları müşahidə etmə (Bird Watching) potensialı haqqında ətraflı məlumatlar və belə turların təqdimatı üzrə lazımi vərdişlər əldə etdilər.

İnfotur layihəsi çərçivəsində 2 müxtəlif (Bird Watching) quşları müşahidə üzrə marşrutun texniki pasportu hazırlanaraq turizm şirkətlərinə təqdim ediləcək. Bu da turizm şirkətlərinə yeni növ turizm məhsulunu beynəlxalq və yerli bazara çıxarmaq imkanı yaradacaq.

Cəvahir Səlimqızı

Mərkəz.- 2011.- 15 dekabr.- S. 11.