Hacı Zeynalabdin Tağıyevin qızının xatirəsi anıldı

AMEA-nın Milli Tarix Muzeyində məşhur mesenat, sahibkar Hacı Zeynalabdin Tağıyevin qızı Sara xanım Tağıyevanın vəfatının 20-ci ildönümü ilə əlaqədar anım mərasimi keçirilib.

Tədbirdən əvvəl ziyalılar, muzey işçiləri Mərdəkandakı Pirhəsən ziyarətgahında Hacı Zeynalabdin Tağıyevin və Sara Tağıyevanın məzarlarını ziyarət ediblər.

Anım tədbiri S.Tağıyevaya həsr olunmuş filmin nümayişi ilə başlayıb. Tədbirdə muzeyin direktoru Nailə Vəlixanlı, mərhum ziyalı Vəli Məmmədovun xanımı Xalidə xanım, şair Teyyub Qurban çıxış edərək xatirələrini bölüşüblər. Tarix üzrə fəlsəfə doktoru Firdovsiyə Əhmədova Sara Tağıyevanın keçdiyi şərəfli ömür yoluna nəzər salıb: “Sara xanımın sovet dövründə apardığı təkbaşına, yalqız, əzablı bir mübarizənin nəticəsi ondan ibarət oldu ki, dünyanın 1/6-ni əhatə etmiş sovet dövlətinin süqutunu görüb, atasının adının bəraət qazandığına əmin olduqdan sonra bu dünyadan köç etdi. Sara xanımın hələ sovet dövründə atası haqqında yazdığı “Hacı Zeynalabdin Tağıyevin xeyriyyəçilik fəaliyyəti”, “Azərbaycan mənəvi mədəniyyətinin inkişafında Hacı Zeynalabdin Tağıyevin rolu” mövzularında tədqiqat işləri artıq həm SSRİ miqyasında, həm də AMEA-da akademiklər, elmi işçilər tərəfindən rəğbətlə qarşılanıb”.

Tədbirdə Teyyub Qurbanın “Sara xanım” poemasından hissələr də səslənib.

Cəvahir Səlimqızı

Mərkəz.- 2011.- 16 dekabr.- S. 11.