«İnanıram ki, ədalətli seçim olacaq»

İlhamə Qasımova: «Şou ilə Avropa tamaşaçısının diqqətini cəlb etmək mümkün deyil»

Bu ilin may ayında Almaniyada keçiriləcək nüfuzlu «Eurovision» mahnı müsabiqəsində ölkəmizi təmsil edəcək müğənninin seçimi ilə bağlı son turun vaxtının uzadılması namizədləri intizarda qoyub. Beşliyə düşən namizədlər bu mərhələyə qədər gəlib çatmalarını uğur hesab etsələr də, hər biri beynəlxalq müsabiqədə ölkəmizi təmsil etmək iddiasındadır. Münsiflərin qərarı açıqlanmayana qədər bu şanslı namizədin kim olacağı sirr qalsa da, hər kəsin öz favoriti var. Bu beynəlxalq müsabiqəyə milli seçim turlarını həvəslə izləyənlərin əskəriyyəti İlhamə Qasımovanı şanslı sayırlar. Görək çoxlarının fovoriti olan İlhamə Qasımova nə düşünür, qalib olacağına əmindirmi?

- Solo çıxışından sonra bu müsabiqədə ölkəmizi sənin təmsil edəcəyinlə bağlı açıqlamalar verilir. Sən necə, digər iştirakçılardan daha şanslı olduğunu düşünürsənmi?

- Bunu ancaq münsiflər söyləyə bilər. Özümü tərif edə bilmərəm. Mən öz imkanlarımı göstərdim. İndi qərar münsiflərindir. Kimi layiq bilirlərsə, yəqin ki, həmin namizədi də göndərəcəklər.O ki qaldı digər namizədlərə onların da hərəsinin özünəməxsus oxu tərzi, səs imkanları var. Əgər onlar beşliyə qədər gəlib çatıblarsa, deməli, onların hər biri istedadlıdır.

- Tanınmış sənət adamları da sənin namizədliyini dəstəkləyirlər. İlhaməyə olan inamın kökündə nə dayanır?

- Öncə mənim ifam barədə yüksək fikir söyləyən hər kəsə minnətdarlığımı bildirirəm. Düşünürəm ki, peşəkarlar rəyi ancaq və ancaq ifaya görə verirlər. Yəqin ki, burada mənim təcrübəm də rol oynayır.

- İlhamə birdən-birə parladı. Qısa zaman kəsiyində tamaşaçılar tərəfindən sevildi. Səncə, bu uğurda İlhamənin rolu çox idi, yoxsa onu səhnəyə hazırlayanların?

- Mənim istedadım vardı. Bu istedadı üzə çıxartdılar. Əlbəttə, üzərimdə böyük əmək sərf olundu. Zəhməti olanların əməyini heç vaxt unutmaram.

- Səhnə fəaliyyətində «Yeni Ulduzu» tramplin sayırsan?

- Sözsüz. Mən «Yeni Ulduz»da yetişmişəm. Düzdür, ondan əvvəl də müsabiqələrə qatılmışam. «Bakı Payızı» müsabiqəsində iştirak etmişəm. Amma «Yeni Ulduz» mənim sənətdə uğur qazanmağım üçün sıçrayış oldu.

- Özünü kimin yetirməsi hesab edirsən?

- Əlbəttə ki, Mübariz Tağıyevin. Onun mənim üzərimdə zəhməti böyük olub. Fəxr edirəm ki, Mübariz Tağıyevin yetirməsiyəm.

- Hərdən səni Selin Diona bənzədirlər. Olmaya şou-biznesdəki müğənnilər kimi sən də özünə ad qoymusan?

- Yox, qətiyyən. Adıma Selin Dion əlavə edəndə çox əsəbiləşirəm. Ona görə yox ki, mən bu müğənnini bəyənmirəm. Sadəcə olaraq mənim o müğənnin səviyyəsinə gəlib çatmağıma çox var. Səhnədə özüm olmaq istəyirəm.

- «Eurovision» müsabiqəsinə qatılan iştirakçının ingilis dili bilməsi vacibdir. Sən necə, dili bilirsənmi?

- İngilis dilini özümə lazım olan qədər, yəni danışıq dili səviyyəsində bilirəm. Xarici ölkələrə gedəndə ingilis dilində danışmaq üçün yanımda dilmanc aparmıram.

- Finala vəsiqə qazandın. Münsiflərin ədalətli qərar çıxaracağına əminsənmi?

- Əminəm. Kim layiqdirsə, onu da göndərəcəklər. Çünki söhbət bu möhtəşəm müsabiqədə kimin yox, Azərbaycanın təmsil olunmağından gedir.

- Mətbuatda gedən məlumatlara görə, artıq «Eurovisiona» gedəcək namizədin adı bəllidir. Bu məlumatlar səni ruhdan salmır ki?

- Yox, qətiyyən. Mən inamla münsiflərin qərarını gözləyirəm.

İnanıram ki, ədalətli seçim olacaq.

- Səncə, bu beynəlxalq müsabiqədə avropalıları necə təəccübləndirmək olar? Yəni, burada səs əsasdır, performans yoxsa xarici görkəm?

- Avropada texnika o qədər sürətlə inkişaf edib ki, orda hansısa tryukla tamaşaçını ələ almaq çətin məsələdir. Sadəcə, gözəl bir şou ilə Avropa tamaşaçısının diqqətini cəlb etmək mümkün deyil. Düşünürəm ki, biz avropalıların ürəyinə gözəl ifa ilə yol tapa bilərik. Gözəl görüntü də olsa, bu vəhdət tamamlanar. Ötən il Almaniyanın bu müsabiqədə uğur qazanmasının bir əsas səbəbi də Lenanın oxuduğu mahnının qəlbəyatımlılığında idi. Həmçinin, o, Dima Bilanla promoturlarda iştirak etdi. Bu da onun gələcək qələbəsində mühüm rol oynadı. Demək olar ki, Lena «Eurovision» səhnəsinə çıxanda hamı onu tanıyırdı. Bu da mühüm amildir. O ki qaldı xarici görünüşə, mənim fikrimcə, biz bir şeyi yaddan çıxarmamalıyıq. Azərbaycan mahnı yarışmasına gedir, hansısa gözəllik yarışmasına yox.

- Müsabiqənin milli seçim turundan uğurla çıxdın. Bu qədər namizəd arasından finala vəsiqə qazanmaq çətin olmadı ki?

- Xeyli əmək sərf etdim. Mən öz üzərimdə işləməkdən zövq alıram. Hər bir sənətçi belə olmalıdır. Əgər qarşıma məqsəd qoymuşamsa ki, Azərbaycanı «Eurovision»da təmsil edim, bu amal uğrunda əzmlə çalışmalıyam.

- Beşliyə düşən namizədlərdən kimi özünə rəqib görürsən?

- Onların hər biri çox istedadlı namizdlərdir. Kİmisə zəif iştirakçı saymıram. Hərəsinin ifasının özünəməxsusluğu var və təbii ki, hər biri belə bir möhtəşəm yarışmaya qatılmağı arzulayır. Amma içərimizdən hansımız daha layiqli və şanslıyıqsa, yəqin ki o da gedəcək.

- Azərbaycanı «Eurovision»da təmsil edən iki iştirakçı «Yeni Ulduz» müsabiqəsinin yetirmələridir. Səndə Səfurə və Ayseldən fərqli olaraq bu müsabiqənin qalibisən. Bəs niyə əvvəlki illərdə «Eurovision» beynəlxalq mahnı müsabiqəsinə qatılmaq fikrinə düşməmişdin?

- Əslində, mən bu müsabiqəyə bir dəfə qatılmışam. Amma həmin ərəfədə xeyli müğənni sənəd vermişdi. Açığı həmin vaxt özümü tam hazır saymırdım. Bəlkə də, bunun üçün zaman lazım idi və indi bu zaman artıq yetişib. Özümü yarışmaya tam hazır sayıram.

Mənim bir məqsədim var; müsabiqəyə qatılıb, birincilik əldə etmək. Təbii ki, bunun üçün də tam hazırlıqlı olmalıydım.

Mərkəz.- 2011.-1 fevral.- S.7.