Sabir Rüstəmxanlı Güney Azərbaycan türklərinə müraciət edib

Xalq şairi, millət vəkili, Dünya Azərbaycanlıları Konqresinin (DAK) həmsədri Sabir Rüstəmxanlı İranda yaşayan Azərbaycan türklərinə «Azadlıq yolu hər bir yurddaşın qeyrətindən keçir (Güneyə məktub)» adlı müraciət ünvanlayıb. Bu barədə «Mərkəz»ə DAK mətbuat xidmətindən məlumat verilib.

Müraciətdə qeyd olunur ki, Rusiya ilə Qacar səltənəti arasında baş verən müharibədən sonra Gülüstan və Türkmənçay müqaviləsinin şərtləri əsasında Azərbaycan ikiyə bölünüb: «Bu siyasi bölgü bizi heç vaxt ayıra bilməyib; eyni ləhcə ilə danışır, eyni acıları yaşayır, eyni mahnıları oxuyur, eyni ağılara ağlayırıq... Türk dünyasını parçalamaq istəyən böyük güclərin yardımı ilə keçən əsrin 20-ci illərində İranın minillik türk hakimiyyəti devrilib farslara təslim edildi və bu qədim türk yurdunu tədricən Farsistana çevirmək siyasətinə rəvac verildi. Pəhləvi rejiminin və İslam cümhuriyyəti başçılarının apardığı assimliyasiya siyasəti indi də davam edir və ildən-ilə genişlənir. Bütün bunlara baxmayaraq, İran adlanan ölkədə 35, Azərbaycan Respublikasında 10 milyon türk yaşayır. Bir neçə milyonumuz da dünya ölkələrinə səpələnib!.. Bu bölgədə farsların, ermənilərin gəlişindən çox-çox əvvəllərdən yaşayan və 5-6 minillik tarixi olan, son min ildə İranı birləşdirib böyük dövlətə çevirən, Səlcuq, Atabəylər, Qaraqoyunlar, Ağqoyunlar, Səfəvilər dövlətlərini quranlar bizik. Azərbaycan türkləri! Lakin bu gün tarixlə öyünmək zamanı deyil! Bu günümüzə və gələcəyimizə baxmalıyıq! Baxmalıyıq və düşünməliyik!.. Biz ya kənar qüvvələrin və türk düşmənlərinin bizi düşürdüyü durumla barışaraq, başqalarına xidmət göstərərək param-parça bir şəkildə məhvə doğru gedəcəyik, ya da iradəmizi, ağlımızı, gücümüzü ortaya qoyaraq öz tarixi coğrafiyamızda azad gələcəyimizi qurmaq uğrunda vahid, müstəqil, bütöv Azərbaycan uğrunda mübarizə aparacağıq! Ya əsarətə boyun əyərək, adımızı, dilimizi unudaraq, atalarımızın qəhrəmanlıq ruhuna xəyanət edərək farslaşıb yox olacağıq, ya da «yetər, bizi məhv edə, varlığımızı, kimliyimizi, ruhumuzu əlimizdən ala bilməzsiniz!», - deyib ayağa qalxacağıq! Başqa yol qalmayıb!»

Məktubda İranın Ermənistanla sıx əlaqələr qurması da pislənilir və Azərbaycan türkləri dövlətin bu siyasətinə qarşı çıxmağa çağırılır: «Dünyanın bütün böyük dövlətləri Azərbaycanın ərazi bütövlüyünü dəstəkləyir. Ancaq bu, İranı ilgiləndirmir. Bu, necə İslam vəhdəti, müsəlman həmrəyliyidir?! Bunu hansı insanlıq qanununa, qonşuluq, dinc yanaşı yaşamaq ənənələrinə aid etmək olar?! Belə ikiüzlü siyasətin adı nədir?»

İranda insan hüquqlarının pozulmasına diqqəti yönəldən S.Rüstəmxanlı məktubunda zülm və ədalətsizliyin məhşərə kimi davam edə bilməyəcəyini qeyd edib: «… İraqın, Əfqanıstanın taleyi göstərir ki, xoşbəxtliyi, demokratiyanı, ədaləti kənardan gözləmək gülünc və xəyanətdir. Ancaq əmir, şah, kral, şeyx, ayətullah, prezident, baş nazir adı altında müsəlman dünyasına hakim kəsilmiş despotizmin, tirançılığın, qanunsuzluğun, milli və insani haqların tapdalanmasının da bir sonu olmalıdır və olacaq! Torpaqlarımızı erməni işğalından təmizləyəcəyimizə, tarixi ərazilərimizdə bütöv, azad, demokratik, inkişaf etmiş bir Azərbaycan quracağımıza inanırıq! Bunun yolu hər bir azərbaycanlının şüurundan və qeyrətindən keçir! Güneydə də, Quzeydə də!»

Səxavət Həmid

Mərkəz.- 2011.-4 fevral.- S.5.