BDM Bəxtiyar Vahabzadəni yad edib

Fevralın 13-də Azərbaycanın və türk dünyasının böyük oğlu, xalq şairi Bəxtiyar Vahabzadənin vəfatından 2 il ötdü. Beynəlxalq Diaspor Mərkəzi (BDM) Vətənpərvərliyin Təbliğinə Dəstək İctimai Birliyi ilə birgə bununla bağlı BDM-in ofisində milli şairi anma tədbiri keçirib. BDM-in mətbuat xidmətindən «Mərkəz»ə verilən məlumata görə, tədbiri açan qurumun sədri İsmayıl Ağayev şairin Azərbaycanın milli-azadlıq hərəkatındakı xidmətlərindən danışaraq ölkəmizin istiqlaliyyət əldə etməsində, imperiyaya qarşı mübarizədə, millətimizin azadlıq səsinin dünyaya çatdırılmasında xalq şairi B.Vahabzadənin böyük rol oynadığını bildirib.

Vətənpərvərliyin Təbliğinə Dəstək İctimai Birliyinin sədri Şəmistan Əlizamanlı B.Vahabzadənin türk dünyasında olan hörmətindən danışaraq onun dünyada türklərin birliyi, həmrəyliyi istiqamətində göstərdiyi xüsusi xidmətləri qeyd edib. Ş.Əlizamanlı xalq şairi ilə bağlı xatirələrindən birini tədbir iştirakçıları ilə bölüşüb. O, 1998-ci ildə Avropaya səfəri zamanı oradakı türk federasyonu təmsilçilərinin B.Vahabzadəyə etdikləri bir xahişi dilə gətirib. Onların istəyi şairin türk millətinin böyük oğlu, mərhum Alparslan Türkeş haqqında şeir yazması olub. Ş.Əlizamanlı bu xahişi həmin vaxt B.Vahabzadəyə çatdırdığını və qısa müddətdə yazılan şeirə musiqi bəstələdiyini bildirib. Vətənpərvərlik mahnılarının mahir ifaçısı Ş.Əlizamanlının sözügedən şeirə yazılmış mahnını, daha sonra Azərbaycan-Türkiyə və bozqurd nəğmələrini səsləndirməsi tədbir iştirakçılarını duyğulandırıb.

Daha sonra tədbirdə iştirak edən akademik Vəli Əliyev, Milli Qeyri-Hökumət Təşkilatları Forumunun prezidenti Rauf Zeyni, filoloq Əziz Ələkbərli, Əfqanıstan Veteranları İctimai Birliyinin İdarə Heyətinin üzvü Musa Həsənli, BDM-in aparat rəhbəri Samir Adıgözəlli və digərləri öz çıxışlarında B.Vahabzadənin ana dilimiz uğrunda apardığı mübarizədən, 1959-cu ildə yazdığı «Gülüstan» poeması ilə parçalanmış Azərbaycanın bütövlüyü uğrunda gənc nəslin yetişdirilməsi istəyindən, milli vətənpərvərlik ruhunda göstərdiyi xidmətlərdən bəhs ediblər. Sonda xalq şairinin səs yazıları dinlənilib.

Səxavət HƏMİD

Mərkəz.- 2011.-15 fevral.-S. 8.