«Mərkəz»in baş redaktoru TÜSİAB-ın sədri ilə görüşdü

Dünən "Mərkəz" qəzetinin baş redaktoru Nigar Almanqızı TÜSİAB-ın (Azərbaycan-Türk Sənayeçi və İş Adamları Beynəlxalq Cəmiyyəti) İdarə heyətinin sədri (Yönetim Kurulu başkanı) Yavuz Keleşlə görüşdü. TÜSİAB-ın katibi Yasin Göral və "Mərkəz" qəzetinin köşə yazarı Cəlil cavanşir də görüşdə iştirak etdi.

Görüşdə Türkiyə-Azərbaycan münasibətlərinin indiki vəziyyəti, mətbuatımız və türkiyəli iş adamlarının Azərbaycandakı fəaliyyəti haqqında maraqlı müzakirələr oldu.

N.Almanqızı TÜSİAB-ın Azərbaycanda göstərdiyi fəaliyyəti yüksək qiymətləndirdiklərini bildirdi. Bundan sonrakı fəaliyyətində də TÜSİAB idarə heyətinin sədrinə uğurlar arzuladı.

Y.Keleş Azərbaycan mətbuatını yaxından izlədiyini, "Mərkəz" qəzetinin Türkiyə-Azərbaycan münasibətlərinin genişlənməsinə diqqət ayırmasını təqdir etdiklərini bildirdi. Türkiyəli iş adamlarının da bu münasibətlərin genişlənməsində maraqlı olduqlarını söyləyən Y.Keleş bu cür görüşlərin mütəmadi keçirilməsinin vacibliyini diqqətə çatdırdı.

Məlumat üçün bildirək ki, TÜSİAB türkiyəli iş adamlarının Azərbaycana investisiya yatırmasını təmin etmək, iki qardaş ölkə arasında iqtisadi əlaqələri genişləndirmək, dil, din, tarix birliyinə söykənən dostluğun daha da güclənməsinə yardım etmək məqsədi ilə 16 noyabr 1994-cü ildə Bakıda yaradılıb. TÜSİAB-ın məqsədi Türkiyə-Azərbaycan arasındakı münasibətlərə lazımi sosial, ictimai, mədəni dəstəyi vermək, türkiyəli iş adamlarına Azərbaycan haqqında dolğun məlumatlar çatdırmaqdır. Onu da xatırladaq ki, türkiyəli iş adamları çətin günlərimizdə Azərbaycan iqtisadiyyatının dirçəldilməsində xüsusi rol oynayıblar. Hazırda da türk iş adamları Azərbaycana qoyduqları sərmayəyə görə öndədirlər. Belə ki, ölkədə olan 230-dan artıq türk şirkətinin yatırımı 2 milyard dollardan artıqdır.

Ayhan

Mərkəz.-2011.-15 fevral.- S.3.