Qarabağ göylərində

Vətəni yalnız sevməklə vətən olmur, onun uğrunda gərək ölməyi də bacarasan. Bəli, «Torpaq əgər uğrunda ölən varsa, vətəndir». Azərbaycan torpağı uğrunda ölməyi bacaran şəhid övladların qarşısında baş əyməyə dəyər. Belə oğullardan biri haqqında söhbət açacağıq. O oğullardan ki, «qisas» deyib düşmən üstünə gedərkən onun qarşısını nə arxada qoyduğu iki balası, nə də digər əzizləri-doğmaları kəsib. O vətənpərvər oğul vətən naminə ölməyi bacaran Milli Qəhrəman Yavər Əliyevdir.

14 sentyabr 1992-ci ildə Milli Qəhrəman adına layiq görülən Yavər Əliyev 1956-cı il iyunun 27-də Bakıda anadan olub. Pirallahı adasında 253 saylı orta məktəbi bitirib. Daha sonra o, Kremençuq şəhərindəki aviasiya məktəbinə daxil olub. Uşaqlıqdan təyyarəçi olmaq arzusu ilə böyüyüb, arzularını gerçəkləşdirən Yavər peşəkar təyyarəçi kimi vətən naminə böyük işlər görüb. Azərbaycanda hərbi qüvvələrin yaranmasında fəallıq göstərib, bir neçə dəfə Mİ 24 vertolyotunda Qarabağa uçuşlar edib. Bu uçuşlar zamanı ermənilərə sarsıdıcı zərbələr vurub. Yavər Əliyevin adı 843-cü vertolyot alayının siyahısına düşüb. Hərbi Hava Qüvvələrinin birinci xüsusi vertolyot ekskadrilyasına, Artyom adasındakı 235 saylı məkətəbə onun adı verilib.

Bakıxanov qəsəbəsindəki orta məktəbdə Yavərin adını daşıyan muzey də fəaliyət göstərir.

Yavər Əliyevlə fəxr etdiyini deyən Milli Qəhrəmanın həyat yoldaşı Valentina Petrovna vətən naminə həyatından keçən ömür-gün yoldaşının övladlarına da bir nümunə olduğunu söylədi. «Mənim iki övladım var - Riad və Sərdar. Hər ikisi atasının adına layiq oğul kimi böyüyüb. Onlar hər zaman gözlərini yummadan vətən, torpaq uğrunda ölümə belə getməyə hazırdırlar, çünki bu vətənvpərvərlik övladlarıma atalarından keçib». Valentina xanımla Yavərin keçdiyi ömür yoluna birgə nəzər salırıq: «Yavər mülki aviasiyada işlədiyinə görə çox narahatçılığım yox idi. Onun vertolyotçular dəstəsi kənd təsərrüfatında xidmət edirdilər. Bir dəfə 1991-ci ildə İran İslam Respublikasına köməyə də getmişdilər. Ermənilər ölkəmizə təcavüz edən gündən narahat günlərimiz başlandı. Yavər və onun vertolyotçular dəstəsi böyük fədakarlıqlar göstərdi. Yavərgil öz ata-baba yurdundan didərgin salınan soydaşlarımızı dağ rayonlarından təhlukəsiz yerlərə daşıyır, Şuşa, Xankəndi, Xocalı, Ağdam, Ağdərə kimi qaynar nöqtələrə hava xətti yaradırdılar».

Hərbi vertolyotların sirrini mükəmməl şəkildə bilən Yavərin dəstəsi 1992-ci il fevralın 17-də Qarabağda erməni qüvvələrinə ağır zərbələr endirirlər. Bu zərbələr erməniləri əməlli-başlı şoka salmışdı.

Fevralın 26-da ermənilərin törətdiyi Xocalı faciəsi hamı kimi onu da sarsıtmışdı. Hətta «bu qisası ermənilərdə qomayacam», - deyib and da içmişdi.

Amma andına sonadək sadiq qala bilmədi. Növbəti uçuşların birində düşmən gülləsinə tuş gəldi. Düşmənə ağır zərbə vuran Yavər qəhrəmancasına həlak oldu.

Yavərin xatirəsi təkcə ailəsinin deyil, xalqımızın da qəlbində yaşayır!

Cəvahir SƏLİMQIZI

Mərkəz.- 2011.- 24 fevral.- S.15.