“Evlənmə” baş tutdu

Təmirə dayansa da, Azərbaycan Dövlət Musiqili Komediya Teatrı tamaşaçılarını yaddan çıxarmayıb. Teatrın yaradıcı kollektivi seyrçilərini müntəzəm olaraq paytaxtın müxtəlif teatrlarında bir araya cəm edir. Növbəti dəfə Dövlət Gənc Tamaşaçılar Teatrında tamaşaçılarını qarşılayan Musiqili Komediya Teatrının yaradıcı heyəti dünən əməkdar incəsənət xadimi Bəhram Osmanov tərəfindən quruluş verilən «Evlənmə» tamaşasının premyerasını təqdim etdi. Görkəmli rus yazıçısı Qoqolun eyniadlı əsəri əsasında səhnələşdirilən tamaşa fərqli ampluada və fərqli yozumda ərsəyə gəlib.

Tamaşaya digər teatrlardan da aktyorlar cəlb olunub. Belə ki, tamaşada respublikanın xalq artistləri, Akademik Milli Dram Teatrının aktrisası Məleykə Əsədova, Rus Dram və İbrus Teatrının aktrisası Şükufə Yusupova 100 illik səhnə ocağının aktyorları ilə birlikdə çıxış ediblər. Əsərdə Aqafya Tixonovna obrazı Məleykə Əsədovaya, Fyokla İvanovna surəti Şükufə Yusupovaya həvalə olunub. Onu da qeyd edək ki, «Evlənmə» həmin aktrisaların Musiqili Komediya Teatrında debut tamaşasıdır. Podkalyosin rolu isə Gənc Tamaşaçılar Teatrının aktyoru Qurban İsmayılova həvalə olunub.

Müxtəlif teatrların aktyorının eyni səhnədə görünməsi bir məqsədə xidmət edir; teatrlararası mübadilə və təmas, eyni zamanda, yeniliyə maraq. Xatırladaq ki, bu tamaşa böyük rus yazıçısı Qoqolun 200 illik yubileyinə həsr edilir. Tamaşanın musiqi rəhbəri əməkdar incəsənət xadimi, professor Yalçın Adıgözəlov, dirijoru Fəxrəddin Atayev, quruluşçu rəssamı Nabat Səmədova, xormeysteri Vaqif Məstanov, baletmeysterləri Zakir və Yelena Ağayevlərdir. Digər rollarda tanınmış gülüş ustaları - xalq artisti Arif Quliyev, əməkdar artistlər Elçin Həmidov, Ramiz Məmmədov, aktyorlar Emma Məlikova, Çingiz Əhmədov, Ülviyyə Novruzova, Ziyadxan cəbrayılov, Möylə Mirzəliyev, Elxan İsmayılov, Məhərrəm Qurbanov, Vüqar Hacıyev çıxış edirlər. Rejissor tərəfindən fərqli yozumda təqdim olunan və qeyri-adi hadisə kimi səciyyələnən tamaşa seyrçilər tərəfindən böyük maraqla qarşılanıb. Uğurlu çıxışla bərabər, tamaşaçıda maraq oyadan digər məqamlar da vardı. Məsələn, əsasən dramatik obrazların oyunçusu kimi tanınan Məleykə Əsədovanın birdən-birə komik rolda-Aqafya Tixonovna obrazında görünməsi tamaşaçı üçün bir yenilik idi. Elə aktrisanın özü üçün də bu məqam maraqı olub.

Tamaşaçıların reaksiyasından belə başa düşmək olurdu ki, aktrisa ona həvalə olunan işin öhdəsindən uğurla gəlib. Tamaşanın uğurundan danışarkən bir məqamı da diqqətdən qaçırmamalıyıq; əslində, səhnə əsəri komediya janrında olsa da, böyük məna yükü, dərin məzmunu ilə tamaşaçını düşünməyə məcbur edirdi. Yəni, burda aktyorlar tamaşaçını yalnız güldürmürdü, həm də düşündürürdü. Eləcə də digər aktyorlar musiqili Komediya Teatrının aktyorları - əməkdar artist Çingiz Əhmədov, Elçin Həmidov digər teatrlarda çalışan həmkarları ilə birgə eyni səhnəni bölüşməkdən məmnun qaldıqlarını dilə gətirdilər. «Bu, bir yenilik idi və düşünürəm ki, birgə işimizlə tamaşaçılarımızda məmnunluq hissi yaşada bildik»-deyən Elçin Həmidov təkcə öz rolundan deyil, həmkarlarının da uğurundan həvəslə danışdı. Xüsusilə xalq artisti Məleykə Əsədova ilə tərəf müqabili olmasından zövq aldığını deyən aktyor gələcəkdə də böyük məmnuniyyətlə Məleykə xanımla eyni səhnəni bölüşməyə hazır olduğunu bildirdi.

Rejissor Bəhram Osmanov isə öz işi barədə danışmağa xəsislik etdi. Yekun sözü tamaşaçıların öhdəsinə buraxdı.

Tamaşanın premyerası bu gün də davam edəcək. Müxtəlif teatrların aktyorlarının birgə məhsulu olan «Evlənmə»yə tamaşa etmək istəyirsinizsə, axşam saat 19-da Gənc Tamaşaçılar Teatrına yollanın. Həm gülün, həm də düşünün. Çünki etiraf etməliyik ki, bu gün Azərbaycan teatrlarınının düşündürücü komediya əsərlərinə böyük ehtiyacı var.

Cəvahir SƏLİMQIZI

Mərkəz.- 2011.- 25 fevral.- S. 11.